Read Ariun Bible 2013 – Ариун Библи 2013 Хосеа 14 Bible Online

Хосеа 14 - Ariun Bible 2013 – Ариун Библи 2013 bible

Хосеа 14

¹Израиль аа, Бурхан ЭЗЭН өөдөө эргэ. Хилэнцээсээ болж чи бүдэрсэн билээ.

²Үгсийг нь өөрсдөдөө аваад ЭЗЭН өөд эргэж “Хилэнц бүрийг минь хэлтрүүлээд, Хэлэх үгийг минь болгоогооч. Уруул юугаа бид тахил болгон өргөе.

³Ассири биднийг аврахгүй, Бид ч морь унахгүй. Өнчид Таны дотор өршөөлийг олдог тул Гарын бүтээлээ «Манай Бурхан» гэж дахин бид хэлэхгүй” гээрэй.

⁴Урвалтыг нь Би эдгээнэ, Нэхэлгүйгээр Би тэднийг хайрлана. Уур хилэн минь тэднээс холдсон.

⁵Израильд Би шүүдэр нь болж. Сараана цэцэг адил тэд дэлбээлэн Ливаны хуш мод мэт үндэслэнэ.

⁶Мөчрүүд нь нахиалж, Гоо үзэсгэлэн нь чидун мод шиг, Анхилуун үнэр нь Ливаных шиг болно.

⁷Сүүдэрт нь амьдрагсад Үр тариаг дахин ургуулж, Усан үзмийн мод шиг цэцэглэх болно. Анхилаа нь Ливаны усан үзмийн дарс шиг байна.

⁸Ефраим аа, Би шүтээнүүд шиг гэж үү? Хариу өгч, чамайг харгалзсан нь Би билээ. Би мөнх ногоон майлстай адил. Надаас чи үр жимсээ олно.

⁹Мэргэн хэн боловч эдгээр зүйлийг ойлгог. Ухаалаг нэгэн эдгээрийг мэдэг. ЭЗЭНий замууд зөв тул Чигч шударга нь түүгээр алхаж, Тэрслэгсэд харин түүнд нь бүдрэх болно.