Read Ariun Bible 2013 – Ариун Библи 2013 Хосеа 7 Bible Online

Хосеа 7 - Ariun Bible 2013 – Ариун Библи 2013 bible

Хосеа 7

¹Би Израилийг эмчлэх үед Ефраимын хилэнц, Самарийн муухай үйлдлүүд илчлэгдэнэ. Учир нь тэд хуурмагийг үйлджээ. Хулгайч дотогшоо орж, Дээрэмчид гадаа тоноцгооно.

²Би бүх хилэнцийг нь санаж буйг Тэд зүрхэндээ эргэцүүлдэггүй. Одоо тэдний үйлдлүүд өөрсдийг нь тойрон байна. Тэд нүүрний минь өмнө байна.

³Цөвт байдлаараа тэд хааныг Заль мэхээрээ тэд ноёдыг баярлуулна.

⁴Зуурсан гурил нухагдаад исэх хүртэл Галаа эс хөдөлгөх талхчны халаасан зуух шиг Тэд бүгд садарлагчид юм.

⁵Манай хааны өдөрт Ноёд нь дарсанд цохиулан өвчтэй болцгоов. Тэр тохуурхагчидтай хамт гараа сунгамуй.

⁶Тэд хуйвалдаанаа хэрэгжүүлэх үед Зүрх нь зуух мэт байх ажээ. Уур нь шөнөжин дүрэлзэж, Өглөө болоход бадарсан гал мэт шатдаг.

⁷Тэд бүгд зуух мэт халуун бөгөөд Шүүгчдээ түймэрддэг. Бүх хаад нь унасан, Тэдний хэн нь ч Намайг эс дуудна.

⁸Ефраим өөрөө ард түмнүүдтэй хутгалдсан. Ефраим эргүүлээгүй бин болжээ.

⁹Гаднынхан хүч чадлыг нь цөлмөх боловч Тэрээр үүнийг мэддэггүй. Мөн үсэн дээр нь ов тов буурал орсон ч Тэрээр үүнийг мэддэггүй.

¹⁰Израилийн эсрэг бардамнал нь гэрчлэвч ЭЗЭН Бурхандаа тэд эс эргэв. Энэ бүгдийн улмаас ч Түүнийг эс эрэв.

¹¹Ефраим ухвар мөчид, Тэнэг тагтаа мэт болжээ. Тэд Египетийг дуудаж, Ассири уруу явцгаана.

¹²Тэднийг явмагц Би Тороо дээр нь хаях болно. Би тэднийг огторгуйн шувууд мэт доош буулгана. Хотол түмэндээ тунхагласных нь дагуу Би тэднийг жанчих болно.

¹³Надаас зугтсан тул тэд золгүй еэ! Тэд Надаас урвасан учир Сүйрэл тэднийх билээ! Би тэднийг авармаар байвч Миний эсрэг тэд худал ярьдаг.

¹⁴Тэд зүрхнээсээ Над уруу хашхирсангүй, Харин орондоо орилно. Буудай, шинэ дарсны төлөө цугларцгааж, Надаас тэд эргэн холддог.

¹⁵Би сургаж, гарыг нь тэнхрүүлсэн ч тэд Миний эсрэг ёрын мууг сэддэг.

¹⁶Тэд эргэсэн боловч дээш ханддаггүй. Тэд сэвтэй нум мэт болжээ. Ноёд нь хэлнийхээ догшролоос болж илдэнд унана. Египет газарт тэдний тухай Доог тохуу их болох болно.