Read Ariun Bible 2013 – Ариун Библи 2013 Иоел 1 Bible Online

Иоел 1 - Ariun Bible 2013 – Ариун Библи 2013 bible

Иоел 1

¹Петуелийн хүү Иоелд ирсэн, ЭЗЭНий үг.

²Сонсогтун, ахмадууд аа, Чих тавигтун, газрын бүх суугчид аа! Ийм зүйл, та нарын үед ч Эцэг өвгөдийн чинь үед ч болж байсан гэж үү?

³Хэл үүнийг, хөвгүүддээ, Хэлэг хөвгүүд чинь, хөвгүүддээ бас, Тэдний хөвгүүд нь дараагийн үедээ дамжуулаг.

⁴Авгалдайн үлдээснийг царцаа цөлмөв. Царцааны үлдээснийг дэвхрэг цөлмөв. Дэвхрэгийн үлдээснийг төөлүүр хорхой цөлмөв.

⁵Сэрэгтүн, согтуурагчид аа, уйлагтун. Амнаас чинь салсан усан үзмийн чихэрлэг дарсны төлөө, Усан үзмийн дарс уугч бүгд ээ, орилон уйлагтун.

⁶Тоолшгүй, хүчирхэг үндэстэн Нутгийг минь эзлэн авчээ. Шүд нь арслангийн шүд мэт, Тэр мөн эрслэнгийн араатай.

⁷Усан үзмийн модыг минь сүйтгэж, Инжрийн модыг минь тэд хугачжээ. Модны хальсыг хуулж, Мөчрүүд нь унаж өгрөв.

⁸Идэр залуу үеийнхээ эр нөхрийн төлөө Таар нөмөрсөн онгон бүсгүй шиг гашууд.

⁹Идээн өргөл болон ундаан өргөл нь ЭЗЭНий өргөөнөөс тасарч, ЭЗЭНий үйлчлэгч, тахилч нар гашуудна.

¹⁰Тариан талбай сүйтгэгдэж, газар гашуудна. Учир нь тариа сүйтгэгдэж, Усан үзмийн шинэ дарс ширгэн тос ч хатав.

¹¹Тариачид аа, ичицгээгтүн. Усан үзэм тариалагчид аа, Буудай, арвайнхаа төлөө уйлагтун. Учир нь талбайн ургац устгагджээ.

¹²Усан үзмийн мод гандан Инжрийн мод хатжээ. Анар, далдуу, алим гээд Талбайн бүх мод хувхайрав. Хүний хөвгүүдээс баяр баясгалан үгүй болов.

¹³Тахилч нар аа, Биедээ таар нөмөрч, гашуудагтун. Тахилын ширээний үйлчлэгчид ээ, Орилон уйлагтун. Бурханы минь үйлчлэгчид ээ, Ирж таар нөмрөн шөнийг өнгөрүүлэгтүн. Учир нь идээн өргөл, ундаан өргөл нь Бурханы чинь өргөөнөөс алдрав.

¹⁴Мацаг барилтыг ариусган, Тусгай чуулааныг зарлагтун. Ахмадууд болоод энэ газрын оршин суугч бүгдийг Бурхан ЭЗЭНийхээ өргөөнд цуглуулж, ЭЗЭНд хандаж хашхирагтун.

¹⁵Тэр өдөр гаслантай яа! Учир нь ЭЗЭНий өдөр ойрхон байна. Тэр өдөр нь Төгс Хүчит Нэгэнээс ирдэг Сүйрэлтэй адил ирнэ.

¹⁶Нүдний маань өмнө хоол хүнс тасарч, Бурханы маань өргөөнөөс Баяр баясгалан, инээд хөөр алга болсон биш үү?

¹⁷Үр шавар доороо хорчийж, Тариа хатсан тул агуулахууд эзгүйрч, зоориуд эвдэрлээ.

¹⁸Адгуус амьтад ямар их уухилан шуухиналдана вэ! Бэлчээргүйгээс болж үхэр сүрэг хэрэн тэнэж байна. Хонин сүрэг ч туйлдаж байна.

¹⁹ЭЗЭН, би Танд хашхирна. Хээрийн бэлчээрүүдийг гал залгиж, Талын бүх модыг дөл шатаав.

²⁰Адгуус амьтад ч хүртэл Танд тэмүүлнэ. Учир нь усны урсгалууд татарч, Хээрийн бэлчээрүүдийг гал залгилаа.