Read Ariun Bible 2013 – Ариун Библи 2013 Амос 2 Bible Online

Амос 2 - Ariun Bible 2013 – Ариун Библи 2013 bible

Амос 2

¹ЭЗЭН ийнхүү айлдаж байна. “Моабын гурав дөрвөн гэмт үйлдлийн шийтгэлийг Би эс болиулна. Едомын хааны ясыг үнс болтол шатаасан тул

²Моабын дээр Би гал илгээнэ. Тэр гал Кериотын цайзуудыг залгих болно. Моаб бужигнаан дунд, дайны уухай, бүрээн дуунд мөхнө.

³Би дундаас нь шүүгчийг тастан Бүх жононг нь хамт бас алах болно” гэж ЭЗЭН айлдаж байна.

⁴ЭЗЭН ийнхүү айлдаж байна. “Иудагийн гурав дөрвөн гэмт үйлдлийн шийтгэлийг Би эс болиулна. Учир нь тэд ЭЗЭНий хуулиас татгалзаж, Тушаалуудыг нь сахиагүй. Эцгүүдийнхээ дагаж байсан Худлаар тэд төөрөгдсөн тул

⁵Иуда дээр Би гал илгээнэ. Иерусалимын цайзуудыг тэр залгих болно”

⁶ЭЗЭН ингэж айлдаж байна. “Израилийн гурав дөрвөн гэмт үйлдлийн шийтгэлийг Би эс болиулна. Тэд зөвт нэгнийг мөнгөөр, Гачигдсаныг хос шаахайгаар худалдсан.

⁷Үгээгүй нэгний толгойг газрын шороонд дэвсэх тэд Дорой нэгний замыг эргүүлдэг. Ариун нэрийг минь бузарлахаар эцэг хүү хоёул Нэг охин дээр ордог.

⁸Тахилын ширээ бүрийн дэргэд Тэд барьцаа болгож авсан хувцаснууд дээр сунайж, Торгуулагсдын дарсыг Бурханыхаа гэрт уудаг.

⁹Хуш мод шиг өндөр, Царс мэт хүчтэй байсан Аморичуудыг тэдний өмнө Устгасан нь Би бус уу. Дээдэх жимс, доодох үндсийг нь ч Би устгасан.

¹⁰Египет нутгаас та нарыг авчирсан нь Би байсан. Та нарт аморичуудын нутгийг эзэмшүүлэхээр, Дөчин жил та нарыг цөлд Би удирдсан.

¹¹Дараа нь та нарын зарим хөвгүүдийг эш үзүүлэгчид байхаар, Зарим залуусыг чинь назир[2] байхаар Би өсгөсөн. Израилийн хөвгүүд ээ, тийм байгаагүй гэж үү?” хэмээн ЭЗЭН тунхаглаж байна.

¹²“Гэвч та нар назир хүмүүст дарс уулгаж, Эш үзүүлэгчдэд «Та нар эш үзүүлж болохгүй» гэж тушаасан.

¹³Харагтун, юүжилсэн тариагаар дүүрэн тэрэг доош дардаг шиг Би та нарыг дарах үед

¹⁴Шалмаг нь хурдлавч эс зайлна, Чадалтай нь хүчээ үл сэлбэнэ. Баатарлаг нь амиа эс аварна.

¹⁵Нум атгагч нь үл тэснэ. Хурдан хөлтөн нь эс зайлна. Морьтон нь ч амиа үл аварна.

¹⁶Хүчтэнгүүдийн мятаршгүй нь хүртэл Тэр өдөр шалдан зугтана” гэж ЭЗЭН тунхаглаж байна.