Read Ariun Bible 2013 – Ариун Библи 2013 Амос 5 Bible Online

Амос 5 - Ariun Bible 2013 – Ариун Библи 2013 bible

Амос 5

¹Израилийн гэр ээ, та нарт гашуудлын дуу болгон өргөж буй үгийг минь сонс.

²Онгон Израиль унаад, дахин үл босно. Тэр нутагтаа хаягдсан. Түүнийг босгох хэн ч алга.

³Учир нь Эзэн БУРХАН айлдаж байна. “Израилийн гэрт мянгатыг гаргагч хот нь зуутай үлдэнэ. Зуутыг гаргагч нь аравттай л үлдэнэ”

⁴Учир нь Израилийн гэрийг ЭЗЭН ийнхүү айлдаж байна. “Хай Намайг, тэгвэл амьд үлдэнэ.

⁵Харин Бетелийг бүү хай, Гилгал уруу бүү оч, Беершебагаар бүү дайр. Учир нь Гилгал заавал олзлогдон явж, Бетелд золгүй явдал учирна

⁶Хай ЭЗЭНийг, тэгвэл амьд үлдэнэ. Эс тэгвэл Иосефын гэрт Тэр гал мэт гарч, цөлмөх болно. Бетелд түүнийг унтраах хэн ч үгүй.

⁷Шүүхийг шарилж болгож, Зөвт байдлыг та нар газар хаядаг”

⁸Тэр долоон бурхан, мичдийг бүтээсэн, Үхлийн харанхуйг ч өглөөгөөр сольдог. Мөн өдрийг шөнө болгон харанхуйлуулж, Тэнгисийн усыг дуудан Газрын гадаргуу дээр асгадаг Түүний нэр ЭЗЭН.

⁹Хүчтэн дээр сүйрлийг цахилуулж, Бэхлэлтэд сүйрлийг ирүүлэгч нь Тэр юм.

¹⁰Дааман хаалган дээр зэмлэдэг хүнийг тэд үзэн яддаг, Чигч шударгаар ярьдаг хүнийг тэд зэвүүцдэг.

¹¹Та нар ядуу хүнд татвар ногдуулж, Тэднээс тарианы алба гувчуур авдаг тул Та нар зассан чулуугаар байшингууд барьсан ч Тэндээ амьдрахгүй. Та нар тааламжит усан үзмийн төглүүдийг тарьсан ч Дарснаас нь уухгүй.

¹²Учир нь та нарын гэмт үйлдлүүд, Үлэмж нүглийг чинь Би мэднэ. Зөвтийг шахаж, хахууль авч, Ядууг дааман хаалган дээр хилсдүүлэхэд

¹³Хашир нь дуугаа хураадаг энэ үе Юутай ёрын муу цаг вэ!

¹⁴Хай, ёрын мууг бус, сайныг хай, Тэгвэл амьд үлдэнэ. Та нарын хэлсэн ёсоор түг түмдийн Бурхан ЭЗЭН Тийнхүү та нартай хамт байх болтугай.

¹⁵Мууг үзэн яд, сайныг хайрла Дааман хаалган дээр шүүхийг тогтоо. Тэгвэл түг түмдийн Бурхан ЭЗЭН Иосефын үлдэгсдэд нигүүлсэнгүй хандаж магад.

¹⁶Иймд түг түмдийн Бурхан ЭЗЭН Эзэн ийнхүү айлдаж байна. “Талбай бүрд орилох дуу сонсогдож, Гудамж бүрд «Аа-аа, аа-аа» гэцгээнэ. Тэд бас тариачдыг гашуудахаар дуудаж, Мэргэжсэн гашуудагсдыг эмгэнэлд дуудна.

¹⁷Усан үзмийн цэцэрлэг бүрд орь дуу гарна. Учир нь Би дундуур чинь өнгөрөх болно” гэж ЭЗЭН айлдаж байна.

¹⁸ЭЗЭНий өдрийг хүсэмжлэгч та нар хөөрхий еэ. ЭЗЭНий өдөр нь та нарт ямар хэрэгтэй вэ? Тэр нь гэрэл биш, харанхуй байх болно.

¹⁹Хүн чонын амнаас гарч барын аманд орох, Гэртээ хариад, гараараа хана түшин могойд хатгуулах мэт буюу.

²⁰ЭЗЭНий өдөр нь гэрэл бус харанхуй байх биш үү? Гэгээ үгүй түнэр харанхуй бус уу?

²¹“Найр наадмуудыг чинь үзэн ядав, Би тэднээс татгалзав. Тусгай чуулаануудыг чинь Би эс таалав

²²Шатаалт тахил, Идээн өргөлүүдийг Надад өргөсөн ч Би эс хүлээн авна. Эвийн тахилын тарган мал уруу чинь ч хүртэл Эс харна, Би.

²³Дуунуудынхаа чимээг Надаас зайлуул. Ятгын эгшгийг чинь ч эс сонсоно, Би.

²⁴Харин шүүлт ус мэт, Зөвт байдал мөнх урсах урсгал мэт хуйлран бууг.

²⁵Израилийн гэр ээ, та нар цөлд дөчин жилийн туршид Надад тахил, идээн өргөлийг өргөн барьсан бил үү?

²⁶Та нар бас өөрсдөдөө хийсэн Сиккут хааныгаа, Кийун хөргүүдээ, бурхдынхаа одыг авч явсан.

²⁷Тиймд Би та нарыг Дамаскийн чанадад цөллөгт явуулна” гэж ЭЗЭН айлдаж байна. Түүний нэр бол түг түмдийн Бурхан.