Read Ariun Bible 2013 – Ариун Библи 2013 Обадиа 1 Bible Online

Обадиа 1 - Ariun Bible 2013 – Ариун Библи 2013 bible

Обадиа 1

¹Обадиагийн үзэгдэл. Едомын талаарх Эзэн БУРХАНы айлдвар. ЭЗЭНээс бид мэдээ сонсов, “Босогтун, Едомын эсрэг тулалдаанд гарцгаая” гэж Үндэстнүүдийн дунд элч илгээгдэв.

²“Харагтун, Би чамайг үндэстнүүдийн дунд өчүүхэн болгоно. Чи үлэмж ихээр басамжлагдана.

³Хадны ангалаар амьдарч, Газрын өндөрлөгт нутагладаг чамайг Зүрхний чинь ихэрхэл хуурчээ. «Хэн намайг газарт буулгах вэ?» гэж Зүрхэндээ чи хэлнэ үү?

⁴Чи бүргэд адил өндрөө авч, Оддын дунд үүрээ зассан ч Би чамайг тэндээс доош унагана” гэж ЭЗЭН тунхаглаж байна.

⁵“Хэрэв хулгайч нар танай уруу ирвээс, Шөнөөр дээрэмчид орвоос Чи яаж сүйрэх бол! Хулгайлахдаа тэд хэрэгцээгээрээ авна гэж үү? Усан үзмийг хураагчид чам дээр ирвээс Тэд үлдэгдэл үлдээх үү?

⁶Есавыг сандаачиж, Хэрхэн нууцлагдсан эрдэнэсийг нь Хайн гаргаж ирэх бол доо!

⁷Холбоотон байсан бүхэн чинь Хилийн зүг чамайг шахаж, Эв найртай гэгдэх хүмүүс Чамайг мэхэлж түрэмгийлнэ. Талхыг чинь идэж явсан тэд Дор чинь урхи тавина. Үүнийг гэх хүн үгүй.

⁸Мэргэдийг Едомоос, Ухааныг Есавын уулаас устгах минь Тэр өдөр биш үү?” хэмээн ЭЗЭН тунхаглаж байна.

⁹“Теман аа, дайчин эрс чинь айдаст автан Есавын уулын хүн бүр Егүүтгэлээр таслагдана

¹⁰Дүү Иаковтаа[1] үйлдсэн хүчирхийллээс болж Ичгүүр чамайг нөмрөх агаад Эгнэгт таслагдах болно, чи.

¹¹Тэр өдөр чи холхон зогсож, Тэр өдөр гаднынхан түүний баялгийг авч одсон. Гулдан хаалгаар нь гаднынхан орж ирэн Иерусалимын төлөө шавга хаях тэр өдөр Чи ч гэсэн тэдний нэг мэт байсан.

¹²Дүүгийнхээ тэр өдрийг, Харшлах аюулын өдрийг нь Тавлаж бүү хар. Сүйрлийн өдөрт нь Иудагийн хөвгүүдийн тухайд бүү баяс. Зовлон шаналант өдөр нь чи Амаа бардамнаж бүү нээ.

¹³Миний ард түмний гамшгийнх нь өдөр Үүд хаалгаар нь бүү ор. Гамшгийнх нь өдөр гай зовлонг нь бүү хар. Гамшгийнх нь өдөр эд хөрөнгөнд нь гар бүү хүр.

¹⁴Оргон дайжигсдыг нь цавчих гэж замын уулзварт бүү зогс. Амьд үлдэгсдийг нь зовлон шаналангийн өдөрт бүү тушаа.

¹⁵Учир нь ЭЗЭНий өдөр бүх үндэстэн уруу ойртож байна. Чиний үйлдсэнчлэн, тэр нь чамд үйлдэгдэх болно. Чиний үйл толгойд чинь эргэж буух болно.

¹⁶Ариун ууланд минь та нарын уусантай адил Бүх үндэстэн үргэлжлүүлэн уух болно. Урьд хэзээ ч оршиж байгаагүй мэт тэд ууж, Залгилж мөн хэзээ ч байгаагүй мэт байх болно.

¹⁷Гэвч Сион уулан дээр аврал оршиж, Энэ уул нь ариун байх болно. Иаковын гэр нь өөрсдийн эд хөрөнгийг эзэмшихэд

¹⁸Иаковын гэр гал, Иосефын гэр дөл болж, Есавын гэр харин сүрэл мэт болох тул Тэд Есавын гэрээс нэг ч хүн амьд үлдэхгүй болтол нь Тэднийг галд хаяж шатаана.” Учир нь ЭЗЭН айлджээ.

¹⁹Дараа нь Есавын уулыг негевчүүд, Филистийн талыг шефелачууд эзэмших болно. Мөн тэд Ефраимын нутаг, Самарийн нутгийг эзэмших бөгөөд Гилеадыг Бениамин эзэмших болно.

²⁰Халад байгаа Израилийн хөвгүүдийн цөлөгдөгсөд нь Зарефат хүртэлх нутгийг эзэмших бөгөөд Сефарадад буй Иерусалимын цөлөгдөгсөд нь Негевийн хотуудыг эзэмших болно.

²¹Аврагч нар Есавын уулыг шүүхээр Сион уул өөд өгсөж, Хаанчлал ЭЗЭНийх болно.