Read Ariun Bible 2013 – Ариун Библи 2013 Тооллого 10 Bible Online

Тооллого 10 - Ariun Bible 2013 – Ариун Библи 2013 bible

Тооллого 10

¹ЭЗЭН, Мосетэй цааш нь ярин —

²Өөртөө хоёр мөнгөн бүрээг хийгтүн. Чи тэдгээрийг давтаж хийх ёстой. Хотол түмнийг дуудан цуглуулахад болон хуаранг аялуулан нүүлгэхэд чи тэдгээрийг ашиглах болой.

³Хоёуланг нь үлээхэд даяар хотол түмэн уулзалтын майхны үүдэн дээр чам уруу цуглах ёстой.

⁴Харин нэгийг нь үлээхэд Израилийн удирдагчид буюу овгуудын тэргүүнүүд чиний өмнө цуглах ажгуу.

⁵Чамайг түгшүүрийн дохио үлээхэд зүүн талд буудалласан хуарангууд хөдлөн нүүх ёстой.

⁶Чамайг түгшүүрийн дохиог хоёр дахь удаа үлээхэд өмнө талд буудалласан хуарангууд хөдлөн нүүх бөгөөд тэднийг аялуулан нүүлгэхийн тулд түгшүүрийн дохио үлээх ажгуу.

⁷Харин чуулганыг цуглуулахдаа чи түгшүүрийн дохиогүйгээр бүрээ үлээгтүн.

⁸Аароны тахилч хөвгүүд бүрээг үлээх бөгөөд эдгээр нь хамаг үеийнхэнд чинь мөнхийн зарлиг байх болтугай.

⁹Чам уруу довтлох өстөн дайсны эсрэг өөрийн нутагт дайнд явахдаа бүрээг түгшүүрийн дохиогоор үлээгтүн. Тэгвэл чи Бурхан ЭЗЭНийхээ өмнө дурсагдаж, дайснуудаасаа аврагдах болно.

¹⁰Мөн баярлан баясах өдрүүд, тогтоогдсон баяр наадмууд болон сарын эхний өдрүүдэд чи шатаалт тахилуудынхаа дээр, эвийн тахилуудын нядлах тахилуудынхаа дээр бүрээг үлээх ёстой. Тэдгээр нь Бурханы тань өмнө та нарын төлөөх санамж болох ажгуу. Би ЭЗЭН, та нарын Бурхан гэж айлдлаа.

¹¹Хоёр дахь жилийн хоёрдугаар сарын хоринд гэрчлэлийн асрын дээрээс үүл өргөгдсөн бөгөөд

¹²Израилийн хөвгүүд Синаин цөлөөс аянд гарав. Дараа нь үүл Параны цөлд бууж тогтов.

¹³Тэд Мосегоор дамжуулсан ЭЗЭНий тушаалын дагуу анх удаа аялан нүүлээ.

¹⁴Эхэнд Иудагийн хөвгүүдийн хуарангийн туг дайчдын бүлэглэлүүдээрээ хөдөлсөн ба Амминадабын хүү Нахшон дайчдынх нь захирагч байв.

¹⁵Иссахарын хөвгүүдийн овгийн дайчдын захирагч нь Зуарын хүү Нетанел,

¹⁶Зебулуны хөвгүүдийн овгийн дайчдын захирагч нь Хелоны хүү Елиаб байв.

¹⁷Дараа нь асрыг буулгасан бөгөөд Гершоны хөвгүүд ба Мерарийн хөвгүүд асрыг үүрэн хөдлөв.

¹⁸Дараа нь Реубений хуарангийн туг дайчдын бүлэглэлүүдээрээ хөдөлсөн ба Шедеурын хүү Елизур дайчдынх нь захирагч байв.

¹⁹Симеоны хөвгүүдийн овгийн дайчдын захирагч нь Зуришаддаин хүү Шелумиел,

²⁰Гадын хөвгүүдийн овгийн дайчдын захирагч нь Деуелийн хүү Елиасаф байв.

²¹Дараа нь кохатчууд ариун зүйлсийг үүрэн хөдөлсөн бөгөөд тэднийг хүрч очихоос өмнө асар босгогдсон байлаа.

²²Дараа нь Ефраимын хөвгүүдийн хуарангийн туг дайчдын бүлэглэлүүдээрээ хөдөлсөн ба Аммихудын хүү Елишама дайчдынх нь захирагч байв.

²³Манассегийн хөвгүүдийн овгийн дайчдын захирагч нь Педахзурын хүү Гамалиел,

²⁴Бениамины хөвгүүдийн овгийн дайчдын захирагч нь Гидеоны хүү Абидан байв.

²⁵Дараа нь бүх хуарангийн арын хамгаалалт болох Даны хөвгүүдийн хуарангийн туг дайчдын бүлэглэлүүдээрээ хөдөлсөн ба Аммишаддаин хүү Ахиезер дайчдынх нь захирагч байв.

²⁶Ашерын хөвгүүдийн овгийн дайчдын захирагч нь Охраны хүү Пагиел,

²⁷Нафталийн хөвгүүдийн овгийн дайчдын захирагч нь Енаны хүү Ахира байв.

²⁸Израилийн хөвгүүд хөдлөх үед тэдний дайчдын бүлэглэлүүдээр жагсах дараалал нь энэ юм.

²⁹Дараа нь Мосе хадам эцэг мидиан хүн Реуелийнхээ хүү Хобабд —“Үүнийг би та нарт өгөх болно” гэж ЭЗЭНий айлдсан тэр газар уруу бид нүүж явна. ЭЗЭН Израилийн талаар сайныг амласан тул бидэнтэй хамт явагтун. Бид танд сайныг хийх болно гэв.

³⁰Харин тэрээр Мосед —Би явахгүй. Би өөрийн нутаг, төрөл садан уруугаа явна гэв.

³¹Тэгтэл Мосе —Биднийг бүү орхиоч. Биднийг цөлд хаана буудаллах ёстойг та мэдэх учраас та бидэнд нүд мэт байх болно.

³²Хэрэв та бидэнтэй хамт явах аваас бидний төлөө ЭЗЭНий хийх аливаа сайныг бид таны төлөө хийх болно гэв.

³³Ингээд тэд гурав хоногийн аянаар ЭЗЭНий уулнаас хөдлөн явсан бөгөөд амрах газрыг тэдэнд олохоор ЭЗЭНий гэрээний авдар тэдний урд талд гурван өдрийн туршид явав.

³⁴Тэднийг хуарангаас хөдлөх үед, ЭЗЭНий үүл өдрөөр тэдний дээр байв.

³⁵Авдрыг хөдлөх үед Мосе —ЭЗЭН, босооч! Таны дайснууд бутран тарж, Таныг үзэн ядагчид Таны өмнөөс зугтах болтугай гэдэг байв.

³⁶Амрах болоход тэрээр —ЭЗЭН минь ээ Та, Мянга түмэн израильчууддаа ирээч[2] хэмээдэг байлаа.