Read Ariun Bible 2013 – Ариун Библи 2013 Тооллого 12 Bible Online

Тооллого 12 - Ariun Bible 2013 – Ариун Библи 2013 bible

Тооллого 12

¹(Мосе куш[5] эмэгтэйтэй гэрлэсэн байсан тул) Мосегийн гэрлэсэн куш эмэгтэйн улмаас Мириам, Аарон нар түүний эсрэг яриа гаргав.

²Тэд —ЭЗЭН зөвхөн Мосед[6] ярьсан гэж үү? Тэр бидэнд ч[7] гэсэн яриагүй юу? гэхэд ЭЗЭН сонсов.

³(Мосе гэгч хүн газрын хөрсөн дээрх хэнээс ч илүүгээр маш даруу нэгэн байлаа.)

⁴ЭЗЭН гэнэт Мосе, Аарон, Мириам нарт —Та гурав уулзалтын майханд хүрч ир гэж айлдав. Тэр гурав ч хүрч ирлээ.

⁵ЭЗЭН үүлэн багана дотор доош бууж, асрын үүдэн дээр зогсов. Тэрээр Аарон Мириам нарыг дуудсан бөгөөд тэр хоёр ч урагш гарав.

⁶Тэрээр —Үгийг минь сонсогтун. Хэрэв та нар дунд эш үзүүлэгч байвал[8] ЭЗЭН Би түүнд үзэгдлээр Өөрийгөө мэдүүлж, Би түүнтэй зүүдэнд нь ярьдаг юм.

⁷Миний зарц Мосегийн хувьд тийм биш бөгөөд тэр Миний бүхий л гэрт итгэмжит билээ.[9]

⁸Түүнтэй Би оньсого таавраар биш, харин ам амаараа, илэн далангүй ярьдаг бөгөөд тэр ЭЗЭНий дүр төрхийг хардаг. Тэгтэл та нар юунд Миний зарц Мосегийн эсрэг ярихдаа эмээсэнгүй вэ? гэлээ.

⁹Ингээд ЭЗЭНий уур хилэн тэдний эсрэг шатаж, Тэр салж явав.

¹⁰Үүл асрын дээрээс салж явахад, харагтун, Мириам цас мэт уяман өвчтэй болов. Аароныг Мириам уруу эргэхэд, харагтун, тэр уяман өвчтэй болсон байлаа.

¹¹Дараа нь Аарон, Мосед —Ээ, эзэн минь, гуйя. Бидний мунхаглан үйлдсэн энэхүү нүглийг бидэнд бүү тохооч.

¹²Түүнийг эхийнхээ хэвлийгээс гарахдаа хагас махбод нь өмхөрсөн, үхсэн нэгэнтэй адил бүү болгооч гэв.

¹³Мосе, ЭЗЭН өөд хашхиран —Бурхан, түүнийг эдгээгээч, гуйж байна! гэв.

¹⁴ЭЗЭН, Мосед —Хэрэв түүний эцэг нүүр уруу нь нулимсан бол тэрээр долоо хоногийн турш ичгүүрээ үүрэхгүй байсан гэж үү? Түүнийг долоо хоногийн турш хуарангийн гадна хорьж дараа нь эргүүлэн авч болох юм гэв.

¹⁵Тийнхүү Мириам долоо хоногийн турш хуарангийн гадна хоригдсон бөгөөд түүнийг эргэн ирэхээс нааш ард олон аянд гарсангүй.

¹⁶Дараа нь ард олон Хазеротоос нүүж, Параны цөлд буудаллав.