Read Ariun Bible 2013 – Ариун Библи 2013 Тооллого 13 Bible Online

Тооллого 13 - Ariun Bible 2013 – Ариун Библи 2013 bible

Тооллого 13

¹Дараа нь ЭЗЭН, Мосетэй ярин —

²Израилийн хөвгүүдэд Миний өгөх гэж буй Канаан нутгийг тандуулахаар өөрсдөөсөө хүмүүсийг илгээ. Эцгүүдийнх нь овог бүрээс, тэдний дунд удирдагч болох хүн бүрийг чи илгээгтүн гэв.

³Ингээд Мосе Израилийн хөвгүүдийн тэргүүнүүд болох тэр бүх хүнийг ЭЗЭНий тушаалаар Параны цөлөөс илгээлээ.

⁴Тэдгээрийн нэрс нь энэ байв. Реубен овгоос Заккурын хүү Шаммуа,

⁵Симеон овгоос Хорийн хүү Шафат,

⁶Иуда овгоос Иефуннегийн хүү Калеб,

⁷Иссахар овгоос Иосефын хүү Игал,

⁸Ефраим овгоос Нуны хүү Хошеа,

⁹Бениамин овгоос Рафугийн хүү Палти,

¹⁰Зебулун овгоос Содийн хүү Гаддиел,

¹¹Иосефын овгоос, Манассе овгийн Сусигийн хүү Гадди,

¹²Дан овгоос Гемаллигийн хүү Аммиел,

¹³Ашер овгоос Михаелын хүү Сетур,

¹⁴Нафтали овгоос Вофсийн хүү Нахби,

¹⁵Гад овгоос Махийн хүү Геуел нар байлаа.

¹⁶Эдгээр нь уг нутгийг тандуулахаар Мосегийн илгээсэн хүмүүсийн нэрс ажгуу. Харин Нуны хүү Хошеаг Иошуа гэж Мосе нэрлэв.

¹⁷Мосе тэднийг Канаан нутгийг тандуулахаар илгээхдээ тэдэнд —Тийшээ Негев яваад, уулархаг нутагт өгсөж оч.

¹⁸Тэр нутаг ямархуу болохыг, тэнд амьдарч буй ард олон нь хүчтэй юу, дорой юу, тэд цөөн үү эсвэл олон уу гэдгийг хараад ирэгтүн.

¹⁹Тэдний амьдарч буй нутаг нь ямар болох, энэ нь сайн уу эсвэл муу юу? Тэдний амьдардаг хотууд нь ямар болох, тэдгээр нь задгай хуарангууд уу эсвэл бэхлэлтүүд үү?

²⁰Газар нь ямар болох, үржил шимтэй юу эсвэл тарчиг уу? Тэнд модтой юу эсвэл үгүй юу? Та нар зоригтой байж, уг нутгийн үр жимснээс авчир. Одоо эхний усан үзэм боловсрох үе юм гэлээ.

²¹Ингээд тэд өгсөж яваад, Зиний цөлөөс Хаматад хүрэх Рехобыг хүртэлх нутгийг тандав.

²²Тэд Негев уруу явж Хебронд хүрч ирэв. Тэнд Анакийн үр удам болох Ахиман, Шешаи, Талмаи нар амьдарч байв. (Хеброн нь Египет дэх Зоанаас долоон жилийн өмнө баригдсан байжээ.)

²³Дараа нь тэд Ешколын голын хөндийд ирж, тэндээс усан үзмийн ганц хонгорцог бүхий мөчрийг огтлон авч, түүнийгээ хоёр хүний дамжлах дамнуурга дээр тавин авч явав. Тэд бас хэсэг анар болон инжир авч иржээ.

²⁴Израилийн хөвгүүдийн тэндээс огтолж авсан хонгорцгийн улмаас тэр газар Ешколын[10] хөндий гэж нэрлэгдсэн байлаа.

²⁵Тэд уг нутгийг тандаад, дөч хоногийн эцэст буцжээ.

²⁶Тэд явсаар Кадеш дахь Параны цөлд Мосе Аарон нар ба Израилийн хөвгүүдийн даяар хотол түмэн дээр ирж, тэдэнд болон даяар хотол түмэнд хариу үг авчирч, уг нутгийн үр жимсийг тэдэнд үзүүллээ.

²⁷Тэд түүнд ийнхүү хэлэв. —Таны биднийг илгээсэн нутагт бид очлоо. Тэр нь үнэхээр сүү, зөгийн бал урссан нутаг мөн бөгөөд түүний үр жимс энэ байна.

²⁸Гэхдээ тэр нутагт амьдарч буй ард түмэн нь хүчирхэг, хотууд нь бэхлэгдсэн агаад маш том юм. Бид тэнд Анакийн үр удмыг үзэв.

²⁹Амалекчууд Негевийн нутагт амьдарч байна. Хитчүүд, иебусчууд, аморичууд нь уулархаг нутагт амьдарч байна. Канаанчууд далайн эрэг болон Иорданы эрэг хавиар амьдарч байна гэлээ.

³⁰Гэтэл Калеб ард олныг[11] Мосегийн өмнө намжаагаад —Бид гарцаагүй дийлж чадах учир өгсөж очоод түүнийг эзэлж авцгаая гэв.

³¹Харин түүнтэй хамт явж байсан хүмүүс —Тэд биднээс хэтэрхий хүчирхэг тул бид тэр ард түмний өөдөөс өгсөж очиж чадахгүй гэсээр байв.

³²Тийнхүү өөрсдийн тагнасан нутгийн талаар тэд Израилийн хөвгүүдэд базаахгүй мэдээ дэлгэрүүлж —Бидний тагнан туулсан тэр нутаг нь оршин суугчдаа цөлмөж иддэг нутаг бөгөөд тэнд бидний харсан бүх ард түмэн нь хэмжээгүй том хүмүүс юм.

³³Тэнд бид Нефилимийг харсан. (Анакийн хөвгүүд нь Нефилимээс гаралтай байлаа.) Бид өөрсдийнхөө нүдэнд царцаа мэт болсон бөгөөд тэдний нүдэнд ч тийнхүү байлаа гэв.