Read Ariun Bible 2013 – Ариун Библи 2013 Тооллого 14 Bible Online

Тооллого 14 - Ariun Bible 2013 – Ариун Библи 2013 bible

Тооллого 14

¹Даяар хотол түмэн дуугаа өндөрсгөн хашхирч, тэр шөнө ард олон уйлалдав.

²Израилийн бүх хөвгүүд Мосе Аарон нарын эсрэг гонгинолдож байв. Даяар хотол түмэн тэдэнд —Бид Египет нутагт үхэцгээсэн ч болоосой! Эсвэл бид энэ цөлд үхэцгээсэн ч болоосой!

³ЭЗЭН юунд биднийг энэ нутагт авчирч байна вэ? Эхнэрүүд болон бяцхан хүүхдүүдийг маань олз болгохоор, биднийг илдэнд унагаахаар уу? Египет уруу буцсан нь бидэнд дээр байх юм биш үү? гэцгээж байв.

⁴Тийнхүү тэд бие биендээ —Цөмөөрөө тэргүүлэгчийг томилоод Египет уруу буцацгаая гэв.

⁵Тэгэхэд Мосе Аарон нар Израилийн хөвгүүдийн хотол түмэн даяар чуулганы өмнө нүүрээрээ унав.

⁶Нутгийг тандсан хүмүүс дотроос Нуны хүү Иошуа болон Иефуннегийн хүү Калеб нар хувцсаа урж,

⁷Израилийн хөвгүүдийн даяар хотол түмэнд ярин —Бидний тандахаар туулан өнгөрсөн нутаг бол дэндүү сайхан нутаг билээ.

⁸Хэрэв ЭЗЭН, биднийг таалбал Тэр биднийг тэр нутагт аваачиж, тэрхүү сүү зөгийн бал урссан нутгийг бидэнд өгөх болно.

⁹Зөвхөн ЭЗЭНий эсрэг л бүү тэрсэл. Тэр нутгийн ард олноос бүү ай. Тэд бидний хоол болно. Хамгаалалт нь тэднээс зайлуулагдсан бөгөөд ЭЗЭН бидэнтэй хамт байна. Тэднээс бүү айгтун гэлээ.

¹⁰Харин даяар хотол түмэн —Тэднийг чулуугаар шид гэцгээж байлаа. Тэгтэл ЭЗЭНий цог жавхлан уулзалтын майхан дотор Израилийн бүх хөвгүүдэд үзэгдэв.

¹¹Мосед ЭЗЭН —Энэ ард түмэн хэр удаан Намайг хилэгнүүлэх вэ? Тэдний дунд Миний бүтээсэн бүх тэмдэг байсаар байхад тэд Надад итгэхгүй хэр удаан байх юм бэ?

¹²Би тэднийг тахлаар цохиж, сүйрүүлэх болно. Би тэднээс илүү агуу, илүү хүчирхэг үндэстнийг чамаас бий болгоно гэв.

¹³Гэвч Мосе, ЭЗЭНд —Та Өөрийн хүчээр энэ ард олныг тэдний дундаас гаргасан тул египетчүүд үүнийг сонсоод,

¹⁴энэ нутгийн оршин суугчдад ярих болно. Өө ЭЗЭН, Та энэ ард олны дунд байгаа. ЭЗЭН Та болон тэд нүүр нүүрээ хардаг, Таны үүл тэдний дээр тогтон байдаг бөгөөд Та тэдний өмнө өдөр нь үүлэн баганаар, шөнө нь галан баганаар явдаг гэдгийг тэд сонсоцгоосон билээ.

¹⁵Хэрэв Та энэ ард олныг ганц хүн мэт алж хороох аваас Таны алдар сууг сонссон үндэстнүүд ярихдаа

¹⁶“ЭЗЭН энэ ард түмнийг тангараглан амласан нутагтаа аваачих чадалгүй байсан учраас Тэр тэднийг цөлд алав” гэх болно.

¹⁷Тиймээс гуйж байна. Таны ийн хэлсэн шиг Эзэний хүч чадал нь агуу байг.

¹⁸“ЭЗЭН уурлахдаа удаан, хайр энэрлээр өгөөмөр, хилэнц, гэмт үйлдлийг уучилдаг ч шийтгэлгүй орхидоггүй бөгөөд эцгүүдийнх нь хилэнцийг гурав, дөрөв дэх үед нь хүртэл буулгадаг.”

¹⁹Би гуйя, Та энэ ард түмнийг Египетээс одоог хүртэл уучилсаар ирсэн шигээ хайр энэрлийнхээ аугаагаар энэ ард түмний хилэнцийг өршөөгөөч гэлээ.

²⁰Тийнхүү ЭЗЭН айлдахдаа —Чиний үгээр Би тэднийг өршөөлөө.

²¹Гэвч Би амьд! Бүх дэлхий ЭЗЭНий яруу алдраар дүүрэх болно.

²²Египет болон цөлд Миний цог жавхланг болон Миний бүтээсэн тэмдгүүдийг харсан атлаа ийнхүү арван удаа Намайг сорин, Миний дууг сонсоогүй бүх хүн,

²³эцэг өвгөдөд нь Миний амласан тэр нутгийг үзэхгүй бөгөөд Намайг өдөөн хатгасан хүмүүсийн хэн нь ч түүнийг үзэхгүй.

²⁴Харин Миний зарц Калеб өөр сүнстэй байж, Намайг бүрэн дагасан тул түүний орсон тэр нутагт нь Би түүнийг аваачих бөгөөд үр удам нь тэр газрыг эзэмших болно.

²⁵Амалекчууд болон канаанчууд хөндий талд амьдарч байгаа. Маргааш та нар буцаж, Улаан тэнгис уруу хөтлөх замаар цөл тийш хөдлөгтүн гэв.

²⁶Мосе Аарон нартай ЭЗЭН ярин айлдахдаа —

²⁷Энэ ёрын муу олон түмэн Миний эсрэг хэр удаан гонгинох вэ? Миний эсрэг гонгинолдож буй Израилийн хөвгүүдийн гоншгонооныг Би сонслоо.

²⁸Тэдэнд ийн хэл. ЭЗЭН айлдаж байна. “Би амьд! Та нар Миний чихэнд ярьсантай адил түүнчлэн Би та нарт үйлдэх болно.

²⁹Миний эсрэг гонгиносон, хорь ба түүнээс дээш насны тоолуулсан бүх хүний цогцос тооныхоо дагуу энэ цөлд унах болно.

³⁰Та нарыг суурьшуулахаар Миний тангарагласан тэр нутагт Иефуннегийн хүү Калеб болон Нуны хүү Иошуа нараас өөр хэн ч орохгүй.

³¹Харин олз болох нь хэмээн та нарын хэлсэн балчир хүүхдүүдийг чинь Би оруулж, та нарын үл ойшоон голсон тэр нутгийг тэд мэдэх болно.

³²Харин та нарын хувьд, цогцсууд чинь энэ цөлд унах болно.

³³Цогцсыг чинь цөлд унах хүртэл та нарын садарлалыг хөвгүүд чинь үүрч цөлд дөчин жилийн турш хоньчид байх болно.

³⁴Та нар уг нутгийг тандсан өдрүүд буюу дөч хоногийн тоо ёсоор, өдөр бүрийн төлөө нэг жил буюу дөчин жилийн турш хилэнцээ үүрнэ. Ийнхүү та нар Миний дургүйцлийг мэдэх болно.

³⁵ЭЗЭН Би айлдав. Миний эсрэг хамтдаа цугласан энэ ёрын олон түмэнд бүхэлд нь Би үүнийг хийх болно. Тэд энэ цөлд устгагдаж, энд үхэцгээх болно” гэв.

³⁶Уг нутгийг тандуулахаар Мосегийн илгээсэн, буцаж ирээд уг нутгийн талаар базаахгүй мэдээ авчирч даяар хотол түмнийг түүний эсрэг гомдоллон гонгинолдоход хүргэсэн хүмүүс

³⁷буюу уг нутгийн талаар базаахгүй мэдээ авчирсан тэдгээр хүмүүс ЭЗЭНий өмнө тахлаар үхэв.

³⁸Харин нутгийг тандахаар явсан хүмүүсээс Нуны хүү Иошуа, Иефуннегийн хүү Калеб нар амьд үлдэв.

³⁹Мосе эдгээр үгсийг Израилийн бүх хөвгүүдэд хэлэхэд ард олон үлэмж гашуудацгаав.

⁴⁰Тэд өглөө эртлэн босож, уулархаг нутаг өөд явж —Харагтун. Бид үнэхээр нүгэл үйлдсэн. Гэхдээ ЭЗЭНий амласан газар уруу явах болно гэв.

⁴¹Харин Мосе —Та нар юунд ЭЗЭНий тушаалыг зөрчиж байна вэ? Энэ чинь бүтэхгүй.

⁴²ЭЗЭН та нарын дунд байхгүй тул бүү яв. Эс бөгөөс та нар дайсныхаа өмнө цохигдоно.

⁴³Амалекчууд ба канаанчууд тэнд та нарын өмнө байх бөгөөд та нар илдэнд унах болно. ЭЗЭНийг дагахаас эргэж буцсан болохоор ЭЗЭН та нартай хамт байхгүй гэв.

⁴⁴Гэвч тэд уулархаг нутагт өгсөж очихоор зоригложээ. Харин ЭЗЭНий гэрээний авдар ч, Мосе ч хуаранг орхисонгүй.

⁴⁵Тэгтэл уулархаг нутагт амьдарч байсан амалекчууд болон канаанчууд буун ирж, тэднийг бут цохин, Хорма хүртэл тэднийг хядав.