Read Ariun Bible 2013 – Ариун Библи 2013 Тооллого 15 Bible Online

Тооллого 15 - Ariun Bible 2013 – Ариун Библи 2013 bible

Тооллого 15

²Израилийн хөвгүүдтэй ярьж, “Миний та нарт өгч буй, та нарын амьдрах тэр нутагт орохдоо та нар

³ам өчгийн биелэл, сайн дурын өргөл эсвэл товлосон үеүдийн шатаалт тахил, нядлах тахилыг ЭЗЭНд тааламжит үнэр болгохын тулд өөрсдийн үхэр сүрэг, хонин сүргээсээ ЭЗЭНд галан тахилаар өргөгтүн.

⁴ЭЗЭНд өргөлөө авчрагч нэгэн нь хинийн дөрөвний нэг тосонд багсарсан ефагийн аравны нэгэн сайн гурилан идээн өргөлийг авчрах ёстой.

⁵Шатаалт тахил эсвэл нядлах тахилтай хамт хурга бүрд хинийн дөрөвний нэг дарсыг ундаан өргөлд бэлд.

⁶Эсвэл хуцанд хинийн гуравны нэг тосонд багсарсан ефагийн аравны хоёр сайн гурилыг идээн өргөл болгон бэлд.

⁷Ундаан өргөлд хинийн гуравны нэг дарсыг ЭЗЭНд тааламжит үнэр болгон өргөгтүн.

⁸Ам өчгөө биелүүлэх мөн эвийн тахилд ЭЗЭНд шатаалт тахил эсвэл нядлах тахил болгон үхрийн төлийг бэлтгэхдээ

⁹үхрийн төлтэй хамт тэрээр хагас хин тосонд багсарсан ефагийн аравны гурван сайн гурилан идээн өргөлийг өргөх ёстой.

¹⁰Ундаан өргөл болгон хагас хин дарсыг галан тахилаар, ЭЗЭНд тааламжит үнэр болгон өргөгтүн.

¹¹Үхэр, хуц, эр хурга, ямаа бүрд тийн хийгдэх болой.

¹²Бэлдсэн тооныхоо дагуу, тэдний тооны дагуу нэгбүрд нь тийн хийгтүн.

¹³ЭЗЭНд тааламжит үнэр болгон галан тахилыг авчрахдаа уугуул нутгийнхан бүгдээрээ эдгээр зүйлийг энэ маягаар хийх ёстой.

¹⁴Хэрэв та нарын дунд түр суугч ирмэл хүн эсвэл хамаг үеийнхний чинь дотор та нарын дунд байх хэн боловч, тэрээр ЭЗЭНд тааламжит үнэр болгон галан тахилыг өргөхийг хүсэх аваас та нарын хийсэн шиг түүнчлэн тэр хийх ёстой.

¹⁵Чуулганы доторх та нарт болон та нартай хамт түр сууж буй ирмэл хүнд нэг л зарлиг байх бөгөөд хамаг үеийнхэнд чинь мөнхийн зарлиг байх ёстой. Ирмэл хүн ЭЗЭНий өмнө та нарын адил байх ажгуу.

¹⁶Та нарт болон та нартай хамт түр сууж буй ирмэл хүнд нэг хууль, нэг хэв маяг байх ёстой” гэж тэдэнд хэл гэв.

¹⁷Дараа нь ЭЗЭН, Мосетэй ярин —

¹⁸Израилийн хөвгүүдтэй ярьж тэдэнд ийн хэл. “Би та нарыг аваачих тэр нутагт та нар ороод

¹⁹тэр нутгийн талхыг идэхдээ та нар ЭЗЭНд хандив өргөгтүн.

²⁰Зуурсан эхний гурилаасаа та нар хандив болгон нэг бинг өргөх бөгөөд түүнийгээ үтрэмийн хандив болгон өргө.

²¹Та нарын хамаг үеийнхэн зуурсан эхний гурилаасаа ЭЗЭНд хандив өгөгтүн.

²²Харин Мосед ЭЗЭНий айлдсан эдгээр бүх тушаалыг та нар сахихдаа санамсаргүй алдаж,

²³Мосегоор дамжуулан ЭЗЭНий та нарт тушаасан бүхнийг ЭЗЭН тушаалаа өгсөн тэр өдөр ба түүнээс хойших хамаг үеийнхэн чинь үл сахих аваас,

²⁴тэгээд үүнийг хотол түмэн санамсаргүйгээр мэдэлгүй үйлдсэн байх аваас хотол түмэн шатаалт тахилд үхрийн төл нэг бухыг ЭЗЭНд тааламжит үнэр болгон, зарлигийн дагуу идээн өргөл ба ундаан өргөлийнх нь хамт, мөн нүглийн тахилд ямаан сүргээс нэг ухныг өргөгтүн.

²⁵Израилийн хөвгүүдийн даяар хотол түмний төлөө тахилч эвлэрүүллийг хийх бөгөөд энэ нь санамсаргүй байсан учир тэд ЭЗЭНд өөрсдийн өргөл, галан тахил болон алдааныхаа төлөө нүглийн тахилыг ЭЗЭНий өмнө авчрах ба тэд уучлагдах болно.

²⁶Бүх ард түмэн үүнийг санамсаргүйгээр хийсэн учраас Израилийн хөвгүүдийн даяар хотол түмэн болон тэдний дунд түр сууж буй ирмэл хүн ч уучлагдах болно.

²⁷Хэрэв хүн санамсаргүйгээр нүгэл үйлдэх аваас тэрээр нүглийн тахилд охин борлон өргөх ёстой.

²⁸Санамсаргүй нүгэл үйлдэж алдсан хүнд ЭЗЭНий өмнө тахилч эвлэрүүллийг хийнэ. Тэр хүнд эвлэрүүллийг хийх бөгөөд тэр уучлагдах болно.

²⁹Израилийн хөвгүүд дундах нутгийн уугуул ч бай, тэдний дунд түр сууж буй ирмэл хүн ч бай санамсаргүй нүгэл үйлдэгчийн хувьд та нар нэг хуультай байх ёстой.

³⁰Харин санаатайгаар үйлдэгч хүн нутгийн уугуул ч бай, ирмэл ч бай тэр нь ЭЗЭНийг доромжилж буй юм. Тэр хүн ард олныхоо дундаас таслагдах болой.

³¹Тэр хүн ЭЗЭНий үгийг үл тоомсорлож, Түүний тушаалыг зөрчсөн тул тэр хүн бүрмөсөн таслагдаж, хилэнц нь өөр дээр нь байна” гэв.

³²Израилийн хөвгүүд цөлд байх зуураа Амралтын өдрөөр гишүү түүж буй хүнийг олов.

³³Гишүү түүж байхад нь түүнийг олсон хүмүүс түүнийг Мосе, Аарон ба даяар хотол түмэн дээр авчрав.

³⁴Түүнийг яах ёстой нь мэдэгдээгүй байсан тул тэд түүнийг хорионд байлгалаа.

³⁵Дараа нь Мосед ЭЗЭН —Тэр хүн заавал үхэх ёстой. Даяар хотол түмэн хуарангийн гадна түүнийг чулуугаар шидэх ёстой гэж айлджээ.

³⁶Тиймээс даяар хотол түмэн түүнийг хуарангаас гарган, Мосед ЭЗЭНий тушаасан ёсоор түүнийг үхтэл нь чулуугаар шидэв.

³⁷ЭЗЭН бас Мосетэй ярин —

³⁸Израилийн хөвгүүдтэй ярь. Үе уламжлан хувцасныхаа өнцгүүдэд цацаг хийн мөн өнцөг бүрийн цацаг дээр хөх уяа оруулагтун гэж тэдэнд хэл.

³⁹Үүнийг харж, ЭЗЭНий бүх тушаалыг санан үйлдэж, ингэснээр садар самуунд хөтөлдөг өөрсдийн зүрх болон нүднийхээ араас дагахгүй байхын тулд та нарт энэ цацаг чинь байх юм.

⁴⁰Ингэснээр та нар Миний бүх тушаалыг санан хийх бөгөөд Бурхандаа ариун байх билээ.

⁴¹Би ЭЗЭН, та нарын Бурхан. Та нарын Бурхан байхын тулд Египет нутгаас та нарыг авчирсан, Би ЭЗЭН, та нарын Бурхан гэв.