Read Ariun Bible 2013 – Ариун Библи 2013 Тооллого 19 Bible Online

Тооллого 19 - Ariun Bible 2013 – Ариун Библи 2013 bible

Тооллого 19

¹Дараа нь ЭЗЭН, Мосе Аарон нартай ярин —

²ЭЗЭНий тушаасан хуулийн зарлиг нь энэ болой. Тэрээр “Ямар ч өө сэвгүй, ямар ч согоггүй, буулганд орж байгаагүй ухаагч бярууг та нарт авчрахыг Израилийн хөвгүүдэд хэлэгтүн.

³Та нар түүнийг тахилч Елеазарт өгөх бөгөөд бярууг хуарангийн гадна авчран, тахилчийн өмнө[12] нядлах болой.

⁴Тахилч Елеазар түүний цуснаас хуруун дээрээ аваад, уулзалтын майхны урд талыг чиглүүлэн долоон удаа сүрчих болой.

⁵Тэгээд охин бярууг тахилчийн нүдний өмнө шатаана. Түүний арьс, мах, цус болон сэвсийг шатаах болой.

⁶Тахилч хуш мод, балуун болон хүрэн улаан даавууг авч, шатаж буй охин бярууны голд чулуудна.

⁷Тэгээд тахилч хувцсаа угаан биеэ усанд булхаад, дараа нь хуаранд орох болой. Тэрээр үдэш болтол бузартсан байх болно.

⁸Бярууг шатаагч нэгэн нь усанд хувцсаа угаан, биеэ усанд булхах бөгөөд үдэш болтол бузартсан байх болой.

⁹Цэвэр хүн охин бярууны үнсийг цуглуулан авч, хуарангийн гадна цэвэр газарт асгана. Үүнийг Израилийн хөвгүүдийн хотол түмний бузрыг зайлуулах усанд зориулан хадгалах юм. Энэ нь нүглийн цэвэршүүлэлт болой.

¹⁰Охин бярууны үнсийг цуглуулсан нэгэн нь хувцсаа угаах бөгөөд үдэш болтол бузартсан байх юм. Энэ нь Израилийн хөвгүүдэд болон тэдний дунд түр сууж буй ирмэл хүнд улиран үргэлжлэх зарлиг болой.

¹¹Аливаа хүний цогцост хүрсэн хүн нь долоо хоног бузартсан байх ажгуу.

¹²Тэрээр гурав дахь өдөр ба долоо дахь өдөр өнөөх усаар өөрийгөө цэвэршүүлснээр цэвэр болно. Гэвч тэр хүн гурав дахь өдөр ба долоо дахь өдөр өөрийгөө эс цэвэршүүлэх аваас цэвэр болохгүй.

¹³Үхсэн хүний цогцост хүрээд өөрийгөө цэвэршүүлээгүй аливаа хүн ЭЗЭНий асрыг бузарлана. Тэр хүн Израилиас таслагдах ёстой. Бузрыг зайлуулах ус түүний дээр цацагдаагүйн улмаас тэрээр бузартсан байх бөгөөд бузар нь түүний дээр хэвээр байна.

¹⁴Майхан дотор хүн үхэх үеийн хууль нь ийм билээ. Майханд орсон хүн бүр болон майханд байсан хүн бүр долоо хоног бузартсан байх болой.

¹⁵Амыг нь бүтээгээгүй юмуу уяагүй онгорхой сав бүр бузар болох ажгуу.

¹⁶Мөн илдээр алагдсан нэгэнд хээр талд байхдаа хүрсэн эсвэл үхсэн нэгэнд эсвэл хүний яс, булшинд хүрсэн хэн нэгэн байвал тэр хүн долоо хоног бузартсан байх болно.

¹⁷Бузартсан хүнд зориулж тэд нүглээс цэвэршүүлэх шатаалтын үнснээс хэсгийг аваад, саванд хийн дээр нь урсгал усыг нэмэх болой.

¹⁸Цэвэр хүн балууныг аваад усанд дүрж, майхан болон бүх тавилга дээр мөн тэнд байсан хүмүүст мөн ясанд эсвэл алагдсан хүнд эсвэл зүгээр л үхсэн нэгэнд эсвэл булшинд хүрсэн хүн дээр сүрчих ажгуу.

¹⁹Цэвэр хүн нь бузартсан хүн дээр гурав дахь өдөр ба долоо дахь өдөр сүрчих ёстой. Долоо дахь өдөрт нь тэр өнөөх хүнийг бузраас нь цэвэршүүлэх бөгөөд өөрийн хувцсыг угаан, усанд булхаад, үдэш гэхэд цэвэр болох болой.

²⁰Харин бузартсан бөгөөд өөрийгөө бузраас цэвэршүүлээгүй хүн ЭЗЭНий ариун газрыг бузарласан учраас чуулганы дундаас таслагдах ёстой. Бузрыг цэвэршүүлэх ус түүний дээр цацагдаагүй тул тэрээр бузартсан хэвээр болой.

²¹Бузрыг цэвэршүүлэх усыг сүрчсэн хүн хувцсаа угаах ёстой бөгөөд бузрыг цэвэршүүлэх усанд хүрсэн хүн үдэш болтол бузарлагдсан байна гэдэг нь тэдэнд зориулагдсан улиран үргэлжлэх зарлиг болох ажгуу.

²²Түүнчлэн бузартсан хүний хүрсэн юм болгон бузар болох бөгөөд тэдгээрт хүрсэн хүн үдэш болтол бузартсан байх ажгуу” гэв.