Read Ariun Bible 2013 – Ариун Библи 2013 Тооллого 2 Bible Online

Тооллого 2 - Ariun Bible 2013 – Ариун Библи 2013 bible

Тооллого 2

¹ЭЗЭН Мосе, Аарон нартай ярин —

²Израилийн хөвгүүд, хүн бүр өөрийн тугийн дэргэд, эцгүүдийнхээ бүлийн тэмдгүүдийн дэргэд буудаллах ёстой. Тэд уулзалтын майхан тийш харан хүрээлж буудаллах ёстой.

³Зүүн талд буюу наран мандах зүгт Иудагийн хуарангийн туг дайчдынхаа бүлэглэлүүдээр буудаллана. Иудагийн хөвгүүдийн удирдагч Амминадабын хүү Нахшон бөгөөд

⁴түүний дайчид, тэдний тоолуулсан эрчүүд нь далан дөрвөн мянга зургаан зуу болой.

⁵Түүний дэргэд буудаллагсад нь Иссахарын овог байна. Иссахарын хөвгүүдийн удирдагч Зуарын хүү Нетанел бөгөөд

⁶түүний дайчид, тэдний тоолуулсан эрчүүд нь тавин дөрвөн мянга дөрвөн зуу болой.

⁷Дараа нь Зебулуны овог байна. Зебулуны хөвгүүдийн удирдагч Хелоны хүү Елиаб бөгөөд

⁸түүний дайчид, тэдний тоолуулсан эрчүүд нь тавин долоон мянга дөрвөн зуу болой.

⁹Иудагийн хуарангийн дайчдынхаа бүлэглэлүүдээр тоолуулсан эрчүүд зуун наян зургаан мянга дөрвөн зуу байна. Тэд эхэнд хөдлөх ёстой ажгуу.

¹⁰Өмнөд талд нь Реубений хуарангийн туг дайчдынхаа бүлэглэлүүдээр байна. Реубений хөвгүүдийн удирдагч Шедеурын хүү Елизур бөгөөд

¹¹мөн түүний дайчид, тэдний тоолуулсан эрчүүд нь дөчин зургаан мянга таван зуу болой.

¹²Түүний дэргэд буудаллагсад нь Симеоны овог байна. Симеоны хөвгүүдийн удирдагч Зуришаддаин хүү Шелумиел бөгөөд

¹³түүний дайчид, тэдний тоолуулсан эрчүүд нь тавин есөн мянга гурван зуу болой.

¹⁴Дараа нь Гадын овог байна. Гадын хөвгүүдийн удирдагч Деуелийн хүү Елиасаф бөгөөд

¹⁵түүний дайчид, тэдний тоолуулсан эрчүүд нь дөчин таван мянга зургаан зуун тавь болой.

¹⁶Реубений хуарангийн дайчдынхаа бүлэглэлүүдээр тоолуулсан эрчүүд зуун тавин нэгэн мянга дөрвөн зуун тавь байна. Тэд хоёрдугаарт хөдлөх ёстой.

¹⁷Хуарангуудын гол дунд нь уулзалтын майхан левичүүдийн хуарантай хамт хөдлөх ёстой. Хүн бүр өөрийн байранд, тугийнхаа дэргэд байж, буудалласантайгаа адил мөн тэгж хөдлөх ёстой.

¹⁸Баруун талд нь Ефраимын хуарангийн туг дайчдынхаа бүлэглэлүүдээр байна. Ефраимын хөвгүүдийн удирдагч Аммихудын хүү Елишама бөгөөд

¹⁹түүний дайчид, тэдний тоолуулсан эрчүүд нь дөчин мянга таван зуу болой.

²⁰Дэргэд нь Манассегийн овог байна. Манассегийн хөвгүүдийн удирдагч Педахзурын хүү Гамалиел бөгөөд

²¹түүний дайчид, тэдний тоолуулсан эрчүүд нь гучин хоёр мянга хоёр зуу болой.

²²Дараа нь Бениамины овог байна. Бениамины хөвгүүдийн удирдагч Гидеоны хүү Абидан бөгөөд

²³түүний дайчид, тэдний тоолуулсан эрчүүд нь гучин таван мянга дөрвөн зуу болой.

²⁴Ефраимын хуарангийн дайчдынхаа бүлэглэлүүдээр тоолуулсан эрчүүд зуун найман мянга нэг зуу байна. Тэд гуравдугаарт хөдлөх ёстой ажгуу.

²⁵Хойд талд нь Даны хуарангийн туг дайчдынхаа бүлэглэлүүдээр байна. Даны хөвгүүдийн удирдагч Аммишаддаин хүү Ахиезер бөгөөд

²⁶түүний дайчид, тэдний тоолуулсан эрчүүд нь жаран хоёр мянга долоон зуу болой.

²⁷Дэргэд нь буудаллагсад Ашерын овог байна. Ашерын хөвгүүдийн удирдагч Охраны хүү Пагиел бөгөөд

²⁸түүний дайчид, тэдний тоолуулсан эрчүүд нь дөчин нэгэн мянга таван зуу болой.

²⁹Дараа нь Нафталийн овог байна. Нафталийн хөвгүүдийн удирдагч Енаны хүү Ахира бөгөөд

³⁰түүний дайчид, тэдний тоолуулсан эрчүүд нь тавин гурван мянга дөрвөн зуу болой.

³¹Даны хуарангийн тоолуулсан эрчүүд зуун тавин долоон мянга зургаан зуу байна. Тэд тугаа барин сүүлд хөдлөх ёстой гэж айлдав.

³²Эд Израилийн хөвгүүдээс эцгүүдийнхээ бүлийн дагуу тоолуулсан эрчүүд болой. Хуарангуудад дайчдын бүлэглэлээрээ тоолуулсан эрчүүд зургаан зуун гурван мянга таван зуун тавь байв.

³³Харин Мосед ЭЗЭНий тушаасан ёсоор левичүүд Израилийн хөвгүүдийн дунд тоолуулсангүй.

³⁴Мосед ЭЗЭНий тушаасан бүхний дагуу Израилийн хөвгүүд үйлдэж, өөр өөрсдийн тугийн дэргэд буудаллан, хүн бүр өөрийн ургаар, эцгүүдийнхээ бүлийн дагуу хөдлөн нүүж байв.