Read Ariun Bible 2013 – Ариун Библи 2013 Тооллого 20 Bible Online

Тооллого 20 - Ariun Bible 2013 – Ариун Библи 2013 bible

Тооллого 20

¹Нэгдүгээр сард Израилийн хөвгүүд даяар хотол түмэн Зиний цөлд ирж, ард олон Кадешт буудаллав. Мириам тэнд өөд болж, тэндээ тавигдлаа.

²Хотол түмэнд уух ус тэнд байсангүй, тэгээд тэд Мосе Аарон нарын эсрэг цуглацгаав.

³Ард олон Мосетой маргалдан —Бидний ах дүүс ЭЗЭНий өмнө мөхөх үед бид ч мөхсөн болоосой!

⁴Биднийг болон мал амьтдыг маань энд үхүүлэхээр юунд чи ЭЗЭНий чуулган болох биднийг энэ цөлд авчрав?

⁵Биднийг энэ ёрын муу газар авчрахаар юунд чи биднийг Египетээс гаргав? Энэ чинь үр тариа, инжир, усан үзэм, анарын газар нутаг биш, бас энд уух ус ч алга гэцгээв.

⁶Тэгэхэд нь Мосе Аарон нар чуулганы дундаас уулзалтын майхны үүдэнд гарч очин, нүүрээрээ унахад ЭЗЭНий цог жавхлан тэдэнд үзэгдлээ.

⁷ЭЗЭН, Мосед —

⁸Таягаа ав. Чи өөрийн ах Ааронтай хамт даяар хотол түмнийг цуглуулаад, ус гаргуулахаар тэдний нүдний өмнө хадтай яригтун. Ингэж чи тэдэнд хаднаас ус гаргаж, даяар хотол түмэн ба тэдний мал амьтныг услагтун гэв.

⁹ЭЗЭНий тушаасан ёсоор Мосе Түүний өмнөөс таяг авав.

¹⁰Мосе Аарон нар хадны өмнө чуулганыг цуглуулаад тэр тэдэнд —Сонсогтун, тэрслэгчид ээ. Бид энэ хаднаас та нарт ус гаргах ёстой юу? гэлээ.

¹¹Мосе гараа өргөөд, таягаараа хадыг хоёр удаа цохив. Ус арвин ихээр оргилон гарч, хотол түмэн бас тэдний мал амьтад ууцгаав.

¹²Харин ЭЗЭН, Мосе Аарон нарт айлдахдаа —Израилийн хөвгүүдийн нүдний өмнө Намайг ариун хэмээн харагдуулахаар та нар Надад итгээгүй учраас Миний тэдэнд өгсөн нутагт энэ чуулганыг та нар аваачихгүй гэв.

¹³Энэ ус нь Мерибагийн[13] ус бөгөөд тэнд Израилийн хөвгүүд ЭЗЭНтэй тэрсэлдэж, Тэр тэдэнд үүгээр Өөрийн ариуныг нотолсон юм.

¹⁴Дараа нь Мосе Едомын хаан уруу Кадешаас элч нарыг илгээж —Таны дүү Израиль ийн хэлж байна. “Бидэн дээр буусан бүх хүнд бэрхшээлийг та мэднэ.

¹⁵Бидний эцэг өвгөд Египет уруу явж, бид Египетэд удаан хугацаагаар амьдран суусан бөгөөд египетчүүд бидэнд болон эцэг өвгөдөд маань муугаар хандаж байсан.

¹⁶Харин бид ЭЗЭНд хашхирахад Тэр дууг маань сонсон, тэнгэрэлчийг илгээгээд биднийг Египетээс гаргасан. Харагтун, одоо бид танай нутаг дэвсгэрийн захад орших Кадеш хотод байна.

¹⁷Нутгаар тань дамжин өнгөрөхийг бидэнд зөвшөөрөөч? Бид тариан талбай эсвэл усан үзмийн цэцэрлэгийг дайран өнгөрөхгүй, худгаас ч ус уухгүй. Бид нутгийг тань дамжин өнгөртлөө баруун тийш ч, зүүн тийш ч эргэлгүй хааны их замаар л[14] явах болно” гэв.

¹⁸Гэвч Едом түүнд —Чи манайхаар дамжин өнгөрч болохгүй. Эс бөгөөс би чиний эсрэг илдтэй гарах болно гэв.

¹⁹Израилийн хөвгүүд түүнд —Бид их замаар л явах болно. Хэрэв би болон мал амьтад маань танай уснаас уух аваас бид үнийг нь төлөх болно. Зөвхөн хөлөөрөө дамжин өнгөрөхийг зөвшөөрөөч, өөр юу ч хэрэггүй гэлээ.

²⁰Гэвч Едом —Чи дамжин өнгөрч болохгүй гэж хариулаад, их хүч, хатуу нударгаар тэдний эсрэг хөдлөв.

²¹Тийнхүү Едом нутаг дэвсгэрээрээ Израилийг дамжин өнгөрүүлэхээс татгалзжээ. Ингээд Израиль түүнээс эргэн холдов.

²²Израилийн хөвгүүд даяар хотол түмэн Кадешаас хөдлөн Хор ууланд хүрэв.

²³ЭЗЭН, Едомын нутгийн хил дээр Хор ууланд Мосе Аарон нартай ярин —

²⁴Та нар Мерибагийн усны дэргэд Миний тушаалын эсрэг тэрсэлсэн учраас Израилийн хөвгүүдэд Миний өгөх нутагт Аарон орохгүй. Харин өөрийн ард олон уруу аваачигдах болно.

²⁵Аарон болон түүний хүү Елеазарыг авч, тэднийг Хор ууланд авчрагтун.

²⁶Аароны хувцсыг тайлан, хүү Елеазарт нь өмсгөгтүн. Аарон өөрийн ард олонд аваачигдах бөгөөд тэндээ үхэх болно гэв.

²⁷Мосе, ЭЗЭНий тушаасан ёсоор хийж, тэд даяар хотол түмний нүдний өмнө Хор ууланд гарав.

²⁸Аароны хувцсыг Мосе тайлан авч хүү Елеазарт нь өмсгөв. Аарон тэнд уулын орой дээр үхжээ. Дараа нь Мосе Елеазар нар уулнаас буув.

²⁹Даяар хотол түмэн Аароны үхсэнийг хараад Израилийн бүх гэр Аароны хойноос гуч хоног уйлалдав.