Read Ariun Bible 2013 – Ариун Библи 2013 Тооллого 21 Bible Online

Тооллого 21 - Ariun Bible 2013 – Ариун Библи 2013 bible

Тооллого 21

¹Негевд амьдарч байсан канаан хүн, Арадын хаан нь Израилийг Атаримын замаар ирж явааг сонсоод Израилийн эсрэг дайтаж, тэдний заримыг нь олзлов.

²Тиймээс Израиль ЭЗЭНд ам өчиг өгч —Хэрэв Та энэ ард түмнийг миний гарт өгөх аваас би тэдний хотуудыг бүрмөсөн сүйрүүлэх[15] болно гэв.

³ЭЗЭН Израилийн дуу хоолойг сонсож, канаанчуудыг тэдэнд өгөв. Израильчууд тэднийг болон хотуудыг нь бүрмөсөн сүйрүүлэв. Тэр газрын нэрийг Хорма[16] гэж дуудах болжээ.

⁴Дараа нь тэд Едомын нутгийг тойрон явахаар Хор уулаас хөдлөн Улаан тэнгисийн замаар явав. Аяны улмаас ард түмэн сэтгэл мятрав.

⁵Ард түмэн Бурханы болон Мосегийн эсрэг ярьж —Энэ цөл газарт үхүүлэхээр юунд чи биднийг Египетээс гарган авчрав? Учир нь энд талх ч алга, ус ч алга. Энэ заваан хүнснээс ой гутаж байна гэцгээлээ.

⁶ЭЗЭН ард түмний дунд хорт галт могойнуудыг илгээхэд тэдгээр нь ард олныг хатгаж, Израилийн олон хүн үхэв.

⁷Ард түмэн Мосе дээр ирж —Бид ЭЗЭНий, мөн таны эсрэг ярьснаас болж нүгэл үйлдэв. Биднээс могойнуудыг зайлуулахаар ЭЗЭНд зуучлан залбираач гэв. Мосе ард олны төлөө зуучлан залбирав.

⁸Мосед ЭЗЭН —Галт могой хийж, түүнийг шураг дээр байрлуулагтун. Тэгвэл хатгуулсан аливаа хүн түүнийг харах аваас амьдрах болно гэв.

⁹Мосе хүрэл могой хийж, түүнийг шураг дээр байрлуулав. Хэн нэгэн хүнийг могой хатгасан байвал тэр хүн хүрэл могойг хараад амьд үлдэж байлаа.

¹⁰Израилийн хөвгүүд нүүж Оботод буудаллав.

¹¹Тэд Оботоос хөдлөн явж, наран мандах зүүн зүгт Моабын харалдаа орших цөлд, Ии-Абаримд буудаллав.

¹²Тэндээс тэд хөдөлж, Зередийн хөндийд буудаллалаа.

¹³Тэндээс тэд хөдөлж, аморичуудын нутгийн хил хүртэл үргэлжлэх зэлүүд талд, Арноны нөгөө талд буудаллажээ. Учир нь моаб ба аморичуудын хоорондох Моабын хил хязгаар нь Арнон байв.

¹⁴Тиймээс ч ЭЗЭНий Дайн тэмцлийн номд “Суфа дахь Вахеб ба Арнон гол нь

¹⁵Аарын талбай уруу тэлж, Моабын хязгаарыг даган сунасан байдаг” гэсэн нь бий.

¹⁶Тэндээс тэд Беер уруу явав. Мосед “Ард олныг цуглуулагтун. Би тэдэнд ус өгье” гэж ЭЗЭНий айлдсан худаг нь энэ юм.

¹⁷Израиль энэхүү дууг дуулан Оргилон дүүрэгтүн, худаг аа! Түүнд дуулагтун.

¹⁸Удирдагчид малтаж, ард олны ихэс дээдэс шүүхийн очирт таягуудаараа ухсан худаг гэв. Цөлөөс тэд Маттана уруу

¹⁹Маттанагаас Нахалиел, Нахалиелаас Бамот,

²⁰Бамотаас тэд цөл тийш харсан Писгагийн өндөрлөг дээр орших Моабын нутаг дахь хөндий уруу явав.

²¹Дараа нь Израиль аморичуудын хаан Сихонд элч нарыг илгээж —

²²Намайг нутгаараа дамжин өнгөрүүлээч. Бид тариан талбай эсвэл усан үзмийн цэцэрлэгийн зүг хазайхгүй, худгуудаас ус ч уухгүй. Бид танай нутгийн хилээр өнгөртөл хааны их замаар[17] л явах болно гэлээ.

²³Гэвч Сихон өөрийн хилээр дамжин өнгөрөхийг Израильд зөвшөөрсөнгүй. Тэгээд Сихон бүх ард түмнээ цуглуулан, Израилийг довтлохоор цөлд гарч, Иахаз уруу ирж Израилийн эсрэг дайтав.

²⁴Израиль түүнийг илдний ирээр цохиж, Арнонаас Иаббок хүртэл, Аммоны хөвгүүдийг хүртэлх түүний газрыг эзлэн авав. Учир нь Аммоны хөвгүүдийн хил нь бат бөх байлаа.

²⁵Израиль тэдгээр бүх хотыг авсан бөгөөд аморичуудын бүх хотод, Хешбон болон түүний бүх тосгонд Израиль амьдрав.

²⁶Учир нь Хешбон нь аморичуудын хаан Сихоны хот байлаа. Тэрээр Моабын урьдын хааны эсрэг дайтан, Арнон хүртэлх түүний бүх нутгийг гараас нь авсан байв.

²⁷Тиймээс сургаалт зүйрлэлд “Хешбонд ирэгтүн. Сихоны хот баригдан бат тогтог!

²⁸Учир нь Хешбоноос гал, Сихоны хотоос галын дөл гарчээ. Тэр нь Моабын Аарыг, Арноны ноёрхогч өндөрлөгүүдийг цөлмөв.

²⁹Моаб аа, чи золгүй еэ! Хемошийн ард олон оо, та нар сүйрсэн байна! Тэрээр Аморийн хаан Сихонд Таран бутарсан хөвгүүд охидоо олз болгон өгөв.

³⁰Бид тэднийг харваж, Хешбон нь Дибоныг хүртэл сүйрэв. Бид Медебагийн зэргэлдээх Нофаг хүртэл тэднийг бут ниргэв”[18] гэсэн байдаг.

³¹Ингээд Израиль нь аморичуудын нутагт амьдрав.

³²Иазерыг тагнахаар Мосе хүн илгээсэн ба тэд тосгодыг нь эзэлж, тэнд байсан аморичуудыг хөөв.

³³Дараа нь тэд эргэж, Башаны замаар өгсөв. Башаны хаан Ог бүх ард түмнээ дагуулан Едреид тэдэнтэй дайтахаар явав.

³⁴Гэвч Мосед ЭЗЭН —Түүнийг болон түүний бүх ард түмэн, газар нутгийг нь Би чиний гарт өгсөн тул түүнээс бүү ай. Чи Хешбонд амьдарч байсан аморичуудын хаан Сихонд үйлдсэний адил түүнд үйлдэнэ гэж айлдав.

³⁵Тэд түүнийг болон хөвгүүдийг нь мөн бүх ард түмнийг нь ганц ч хүн үлдэхгүй болтол хядаж, нутгийг нь эзэмшив.