Read Ariun Bible 2013 – Ариун Библи 2013 Тооллого 23 Bible Online

Тооллого 23 - Ariun Bible 2013 – Ариун Библи 2013 bible

Тооллого 23

¹Тэгээд Балаам, Балакт —Энд надад долоон тахилын ширээг босгож, надад долоон бух, долоон хуцыг бэлтгэгтүн гэлээ.

²Балаамын хэлсэн ёсоор Балак хийв. Балак Балаам нар тахилын ширээ бүр дээр бух ба хуцыг өргөв.

³Балаам —Шатаалт тахилынхаа дэргэд зогс, харин би явъя. ЭЗЭН надтай уулзахаар ирж магад. Түүний надад үзүүлсэн бүхнийг би чамд хэлнэ гэж Балакт хэлэв. Тийнхүү тэр толгод уруу явлаа.

⁴Бурхан, Балаамтай уулзсан бөгөөд Балаам Түүнд —Би долоон тахилын ширээг босгон тахилын ширээ бүр дээр бух болон хуцыг өргөв гэж өгүүллээ.

⁵ЭЗЭН, Балаамын аманд үг хийгээд —Балак уруу буцан очиж, ийн хэлтүгэй гэв.

⁶Тэр түүн дээр буцаж очиход, харагтун, тэр болон Моабын түшмэлүүд бүгд шатаалт тахилынхаа дэргэд зогсож байв.

⁷Тэрээр зүйр зөнгөө хэлж —Моабын хаан Балак, намайг Арамаас, Дорнын уулсаас авчирч, “Ирж, миний төлөө Иаковыг хараагтун. Ирж, Израилийг буруушаагтун” гэв.

⁸Бурханы хараагаагүй хүнийг би хэрхэн хараах билээ? ЭЗЭНий буруушаагаагүй хүнийг би хэрхэн буруушаах билээ?

⁹Хадны оройгоос би түүнийг харж, толгодын дээрээс би түүнийг ажигласан. Харагтун, үндэстнүүдийн дунд тоологдолгүй, Ангид орших ард түмэн байна.

¹⁰Иаковын тоос шороог хэн тоолж чадах вэ? Израилийн дөрөвний нэгийг хэн бүртгэж чадах вэ? Зөвтийн үхлээр намайг үхүүлтүгэй, Төгсгөл маань түүнийхтэй адил байх болтугай гэлээ.

¹¹Тэгэхэд Балак, Балаамд —Чи надад юу хийчихэв ээ? Би чамайг дайснаа хараалгахаар авчирсан атал, харагтун, чи тэднийг ерөөлөө гэв.

¹²Балаам хариу болгон —Аманд минь ЭЗЭН юу хийснийг би анхааран ярих ёсгүй гэж үү? гэлээ.

¹³Балак түүнд —Тэднийг харж болох өөр газар өөд надтай хамт яваач. Чи тэндээс тэднийг бүхэлд нь биш зөвхөн наад захыг нь л харна. Тэндээс чи миний төлөө тэднийг хараагтун гэлээ.

¹⁴Тэр түүнийг Зофимийн хээр талд, Писгагийн оройд аваачиж, долоон тахилын ширээ босгон, тахилын ширээ бүр дээр бух, хуцыг өргөв.

¹⁵Балаам, Балакт —Намайг тээр тэнд уулзаж байх зуур шатаалт тахилынхаа дэргэд энд зогсож байгтун гэв.

¹⁶ЭЗЭН Балаамтай уулзаж, түүний аманд үгийг хийгээд —Балак уруу буцан очиж, ийн хэлтүгэй гэж айлдав.

¹⁷Тэр түүн дээр очиход, харагтун, тэр болон түүнтэй хамт Моабын түшмэлүүд бүгд шатаалт тахилынхаа дэргэд зогсож байв. Балак түүнээс —ЭЗЭН юу айлдав? гэж асуулаа.

¹⁸Балаам зүйр зөнгөө хэлж —Балак аа, босоод сонсогтун. Зиппорын хүү, над уруу чих тавигтун!

¹⁹Бурхан бол худал хэлдэг хүн биш, Гэмшин харамсдаг хүмүүн ч бус. Тэрээр айлдчихаад, Түүнийгээ хийхгүй гэж үү? Эсвэл Тэр ярьчихаад, Түүнийгээ сайн болгохгүй гэж үү?

²⁰Харагтун, ерөөхийг би хүлээн авсан. Тэр ерөөсөн байхад Би түүнийг нь эргүүлж чадахгүй.

²¹Золгүй явдлыг тэрээр Иаковын дотроос үзээгүй. Зовлонг бас Израилийн дотроос хараагүй. Бурхан ЭЗЭН нь түүнтэй хамт бөгөөд Хааны уухай тэдний дунд байна.

²²Бурхан тэднийг Египетээс гарган авчирчээ. Тэдний хувьд Тэрээр зэрлэг үхрийн эвэр мэт юм.

²³Иаковын эсрэг ямар ч ид шид алга, Израилийн эсрэг ямар ч мэргэ төлгө байхгүй.[20] Зохистой цагт Иаков ба Израилийн талаар хэлэгдэнэ. Бурхан юу хийснийг үз!

²⁴Хараач, ард түмэн эрслэн мэт өндийж, Арслан мэт босож байна. Тэр олзоо залгитлаа, алагдагсдын цусыг уутлаа буцаж хэвтэхгүй гэлээ.

²⁵Харин Балак, Балаамд —Тэднийг ердөө бүү хараагтун, ердөө ч бүү ерөөгтүн гэв.

²⁶Гэвч Балаам хариуд нь —“ЭЗЭНий айлдсан болгоныг би хийх ёстой” гэж би чамд хэлээгүй гэж үү? гэж Балакт хэлэв.

²⁷Харин Балак Балаамд —Ирээч, би чамайг өөр газарт аваачъя. Бурханы мэлмийд зөв байж, тэндээс чи миний төлөө тэднийг харааж чадаж магад гэв.

²⁸Балак Балаамыг зэлүүд нутаг харагдах Пеорын оройд аваачив.

²⁹Балаам —Энд надад долоон тахилын ширээг босгож, надад долоон бух, долоон хуцыг бэлтгэгтүн гэж Балакт хэллээ.

³⁰Балаамын хэлсэн ёсоор Балак хийсэн бөгөөд тахилын ширээ бүр дээр бух болон хуцыг өргөв.