Read Ariun Bible 2013 – Ариун Библи 2013 Тооллого 24 Bible Online

Тооллого 24 - Ariun Bible 2013 – Ариун Библи 2013 bible

Тооллого 24

¹Израилийг ерөөх нь ЭЗЭНд таалагдсаныг Балаам хараад, тэрээр урьдын адил ид шид эрэлхийлж явсангүй, харин нүүрээ цөл уруу хандуулав.

²Балаам хараагаа өргөн, овог овогоороо буудаллан буй Израилийг харав. Бурханы сүнс түүн дээр ирлээ.

³Тэрээр зүйр зөнгөө хэлжээ. —Беорын хүү Балаам, Нүд нь нээлттэй хүн тунхаглаж байна.

⁴Бурханы үгсийг сонсдог, Төгс Хүчит Нэгэний үзэгдлийг үздэг, унадаг боловч нүд нь халхлагдаагүй хүн тунхаглаж байна.

⁵Иаков аа, чиний майхнууд, Израиль аа, чиний сууцнууд ямар үзэсгэлэнтэй вэ!

⁶Уудам тэнэгэр тал хөндий мэт, голын хөвөөн дэх цэцэрлэгүүд мэт, ЭЗЭНий тарьсан зуун настууд мэт, усны дэргэдэх хуш модод мэт.

⁷Түүний хувингуудаас[21] нь ус урсах агаад түүний үр нь их устай байж, түүний хаан нь Агагаас илүү өндөрт байх бөгөөд түүний хаанчлал нь өргөмжлөгдөнө.

⁸Түүнийг Египетээс гаргасан Бурхан Түүнд зэрлэг үхрийн эвэр мэт болой. Өөрийн дайсан болох үндэстнүүдийг тэрээр цөлмөнө, Ясыг нь яйруулж, сумаараа тэднийг сүлбэнэ.

⁹Тэрээр мярааж хэвтэх нь арслан мэт, эрслэн мэт. Түүнийг босгож хэн зүрхлэх вэ? Чамайг ерөөх бүхэн ерөөгдөж, чамайг хараах бүхэн хараагдах болтугай гэв.

¹⁰Тэгэхэд Балаамын эсрэг Балакийн уур шатаж, тэрээр хоёр гараа хавсарч цохив. Балак, Балаамд —Би дайснуудаа хараалгахаар чамайг дуудсан билээ. Гэтэл харагтун, чи тэднийг гурвантаа дараалан ерөөлөө.

¹¹Иймээс өөрийн газар уруугаа зугтагтун. Би чамайг үлэмж ихээр хүндэтгэхээр зэхэж байсан. Гэтэл харагтун, ЭЗЭН чамайг хүндлэлээс буцаан татав гэв.

¹²Балаам, Балакт —Чиний над уруу илгээсэн элч нарт би

¹³“Балак мөнгө алтаар дүүрэн гэрээ надад өгөх байсан ч би ЭЗЭНий тушаалын эсрэг өөрийн хүслээр сайн, муу юу ч хийж чадахгүй. ЭЗЭН юу айлдсаныг л би ярих болно” гэж хэлээгүй гэж үү?

¹⁴Одоо харагтун, би ард түмэн уруугаа явах гэж байна. Ирэгтүн, ирэх өдрүүдэд энэ ард түмэн чиний ард түмэнд юу хийхийг би чамд мэдүүлье гэлээ.

¹⁵Тэрээр зүйр зөнгөө хэлж —Беорын хүү Балаам, нүд нь нээлттэй хүн тунхаглаж байна.

¹⁶Бурханы үгсийг сонсдог ба Хамгийн Дээд Нэгэний мэдлэгийг мэддэг, Төгс Хүчит Нэгэний үзэгдлийг үздэг, унадаг боловч нүд нь халхлагдаагүй хүн тунхаглаж байна.

¹⁷Би түүнийг хардаг ч одоо биш. Би түүнийг үздэг ч ойр биш. Иаковаас од гарч ирж, Израилиас очирт таяг босож, Моабын зах хязгаарыг довтлон дийлж, Шетийн бүх хөвгүүдийг[22] сүйрүүлнэ.

¹⁸Едом нь эзлэгдэж, Сеир ч дайснууддаа эзлэгдэнэ. Харин Израиль цэргийн хүчээ авна.

¹⁹Иаковаас нэгэн ноёрхогч гарч, хотоос үлдэгсдийг устгах болно гэв.

²⁰Тэрээр Амалек уруу хараад зүйр зөнгөө хэлжээ —Амалек нь үндэстнүүдийн тэргүүн байсан боловч, төгсгөл нь сүйрэл болно гэлээ.

²¹Тэрээр Кенийг хараад зүйр зөнгөө хэлжээ. —Чиний сууц бат бөх, чиний үүр хадан дээр засагджээ.

²²Гэлээ ч Ашур нь чамайг олзонд байлгах хүртэл Каин нь тонуулан сүйрнэ гэв.[23]

²³Тэрээр зүйр зөнгөө хэлжээ. —Бурхан үүнийг хийхэд амьд байгч нэгэн золгүй еэ!

²⁴Хөлөг онгоцнууд Киттимийн эргээс ирж, Ашурыг мөн Еберийг зовооно. Ингээд тэд ч бас сүйрнэ гэлээ.

²⁵Дараа нь Балаам босож өөрийнхөө газар уруу салан явсан бөгөөд Балак ч замаараа явав.