Read Ariun Bible 2013 – Ариун Библи 2013 Тооллого 25 Bible Online

Тооллого 25 - Ariun Bible 2013 – Ариун Библи 2013 bible

Тооллого 25

¹Израиль Шиттимд амьдарсан бөгөөд ард түмэн Моабын охидтой садарлаж эхлэв.

²Тэд бурхдынхаа тахилд ард түмнийг урьсан бөгөөд ард түмэн идэж, тэдний бурхдад мөргөжээ.

³Израиль өөрсдийгөө Пеорын Баалтай нийлүүлжээ. Тэгэхэд ЭЗЭНий уур хилэн Израилийн эсрэг дүрэлзэв.

⁴Мосед ЭЗЭН —Ард түмний бүх удирдагчийг авч, тэднийг гэгээн цагаан өдрөөр[24] ЭЗЭНий өмнө дүүжлэгтүн. Ингэснээр ЭЗЭНий догшин хилэн Израилиас эргэх юм гэж айлдав.

⁵Мосе Израилийн шүүгчдэд —Та нарын хүн нэгбүр чинь Пеорын Баалтай өөрсдийгөө нийлүүлсэн хүмүүсээ алагтун гэлээ.

⁶Тэгтэл харагтун, Израилийн хөвгүүдийг уулзалтын майхны үүдэнд уйлж байхад Израилийн хөвгүүдийн нэг нь ирж, Мосегийн нүдний өмнө болон Израилийн хөвгүүдийн даяар хотол түмний нүдний өмнө ах дүүсийнхээ дунд нэгэн мидиан эмэгтэйг авчрав.

⁷Тахилч Аароны ач, Елеазарын хүү Финехас үүнийг хармагцаа хотол түмний дундаас босож, гартаа жад авав.

⁸Тэрээр израиль эрийн араас майханд орж, израиль эрийг бас эмэгтэйн хэвлийг цоо сүлбэн, хоёуланг нь нэвт жадлав. Тийнхүү Израилийн хөвгүүд дээр байсан гамшиг зогслоо.

⁹Гамшгаар үхэгсэд хорин дөрвөн мянга болжээ.

¹⁰ЭЗЭН, Мосетэй ярин —

¹¹Би Израилийн хөвгүүдийг Өөрийн хардалтаар устгахгүйн тулд тэдний дунд Миний төлөө хардсанаараа тахилч Аароны ач, Елеазарын хүү Финехас Израилийн хөвгүүдээс Миний уур хилэнг эргүүлжээ.

¹²Тиймээс ийн хэл “Харагтун, Би түүнд амар тайвны гэрээгээ өгч байна.

¹³Тэр өөрийн Бурханы төлөө хардаж, Израилийн хөвгүүдэд эвлэрүүллийг хийсэн учраас түүнд болон дараах үр удамд нь энэ нь мөнхийн тахилчийн үйлчлэлийн гэрээ байна” хэмээн хэл гэв.

¹⁴Мидиан эмэгтэйтэй хамт алуулсан хүн буюу алуулсан израиль эрийн нэр Салугийн хүү Зимри бөгөөд тэрээр Симеоны дунд эцгийн бүлийн удирдагч байв.

¹⁵Алуулсан мидиан эмэгтэйн нэр Козби бөгөөд тэрээр Мидианы эцгийн бүлийн ард олны тэргүүн Зурын охин байлаа.

¹⁶ЭЗЭН, Мосетэй ярин —

¹⁷Мидианчуудтай дайсагнан, тэднийг бут цохь.

¹⁸Учир нь тэд өөрсдийн заль мэхээр та нарт дайсагнан, Пеорын улмаас болсон гамшгийн өдөр алуулсан өөрийн эгч, Мидианы удирдагчийн охин Козбийн хэрэг болон Пеорын хэргээр та нарыг хууран мэхэлсэн гэж айлдлаа.