Read Ariun Bible 2013 – Ариун Библи 2013 Тооллого 28 Bible Online

Тооллого 28 - Ariun Bible 2013 – Ариун Библи 2013 bible

Тооллого 28

¹Дараа нь ЭЗЭН, Мосетэй ярин —

²Израилийн хөвгүүдэд тушаан, “Та нар товлогдсон цагуудад Миний өргөл, тааламжит үнэр буюу галаар өргөх тахилын хүнсийг авчрахдаа анхаар” гэж тэдэнд хэл.

³Чи тэдэнд “Та нарын ЭЗЭНд өргөх галан тахил энэ юм. Согоггүй хоёр эр хургыг байнгын шатаалт тахил болгон өдөр бүр өргөгтүн.

⁴Нэг хургыг чи өглөө өргөж, нөгөө хургыг үдшийн бүрийгээр өргөгтүн.

⁵Идээн өргөлд хинийн дөрөвний нэг цохисон тосонд багсарсан ефагийн аравны нэг сайн гурилыг өргөгтүн.

⁶Энэ нь ЭЗЭНд тааламжит үнэр, галан тахил болгон Синаи уулан дээр тогтоогдсон байнгын шатаалт тахил юм.

⁷Мөн хурга бүрд хинийн дөрөвний нэг ундаан өргөл байна. Сархдаар хийгдсэн ундаан өргөлийг ариун газарт ЭЗЭНд асгана.

⁸Нөгөө хургыг та нар үдшийн бүрийгээр өргөх ёстой. Үүний хамт өглөөнийх шиг идээн өргөл, ундаан өргөлийг та нар ЭЗЭНд тааламжит үнэр, галан тахил болгон өргөгтүн.

⁹Харин Амралтын өдөр согоггүй хоёр эр хурга ба идээн өргөл болгон тосонд багсарсан ефагийн аравны хоёр сайн гурил, үүний ундаан өргөлийг өргөгтүн.

¹⁰Энэ нь байнгын шатаалт тахил болон үүний ундаан өргөлөөс гадна Амралтын өдөр бүрийн шатаалт тахил болой.

¹¹Сар бүрийн эхэнд та нар ЭЗЭНд согоггүй хоёр залуу бух, нэг хуц, долоон эр хургыг шатаалт тахил болгон өргө.

¹²Нэг буханд идээн өргөл болгон тосонд багсарсан ефагийн аравны гурван сайн гурил мөн нэг хуцанд идээн өргөл болгон тосонд багсарсан ефагийн аравны хоёр сайн гурилыг,

¹³мөн нэг хурганд идээн өргөл болгон тосонд багсарсан ефагийн аравны нэг сайн гурилыг ЭЗЭНд тааламжит үнэр, галан тахил болгон шатаалт тахилд өргөгтүн.

¹⁴Ундаан өргөлүүд нь буханд хагас хин дарс, хуцанд хинийн гуравны нэг дарс, хурганд хинийн дөрөвний нэг дарс байх ёстой. Энэ нь жилийн саруудын туршид сар бүрийн шатаалт тахил юм.

¹⁵Ямаан сүргийн нэг ухныг ЭЗЭНд нүглийн тахил болго. Энэ нь байнгын шатаалт тахил болон үүний ундаан өргөлөөс гадна өргөгдөх болой.

¹⁶Эхний сарын арван дөрөвний өдөр ЭЗЭНий Алгасал байна.

¹⁷Энэ сарын арван тавны өдөр наадам болох бөгөөд долоо хоногийн турш исгээгүй талх идэх ёстой.

¹⁸Эхний өдөр ариун цуглаан болох бөгөөд та нар ямар ч ажил бүү хий.

¹⁹Та нар галан тахил болгон согоггүй хоёр залуу бух, нэг хуц, долоон эр хургаар ЭЗЭНд шатаалт тахил өргө.

²⁰Идээн өргөл нь тосонд багсарсан сайн гурил байна. Энэ нь буханд ефагийн аравны гурав, хуцанд аравны хоёр,

²¹долоон хурга тусбүрд ефагийн аравны нэг байх юм.

²²Мөн өөрсдөдөө эвлэрүүллийг хийхийн тулд нүглийн тахилд нэг ухныг өргөгтүн.

²³Эдгээрийг та нар байнгын шатаалт тахил болох өглөөний шатаалт тахилаас гадна өргөх ёстой.

²⁴Та нар долоон өдрийн туршид өдөр бүр ЭЗЭНд тааламжит үнэр, галан тахилын хүнсийг ийм маягаар авчрах ёстой. Үүнийг байнгын шатаалт тахил болон үүний ундаан өргөлөөс гадна өргөх болой.

²⁵Долоо дахь өдөр нь та нар ариун цуглаан хийх бөгөөд хүнд хүчир ямар ч ажил хийж болохгүй.

²⁶Түүнчлэн анхны үр жимсний өдөр, шинэ ургацаас идээн өргөлийг Долоо хоногуудын баяр дээр ЭЗЭНд өргөх үедээ та нар ариун цуглаан хийх бөгөөд хүнд хүчир ажил хийж болохгүй.

²⁷Та нар ЭЗЭНд хоёр залуу бух, нэг хуц, долоон эр хургаар тааламжит үнэр болгох шатаалт тахилыг өргөгтүн.

²⁸Идээн өргөл нь болох тосонд багсарсан сайн гурилыг, нэг буханд ефагийн аравны гурвыг, нэг хуцанд аравны хоёрыг,

²⁹долоон хурга тусбүрд аравны нэгийг өргө.

³⁰Мөн өөрсдөдөө эвлэрүүллийг хийхээр нэг ухныг өргөгтүн.

³¹Эдгээрийг та нар байнгын шатаалт тахил болон үүний идээн өргөл, ундаан өргөлүүдээс нь гадна өргө. Тэдгээр нь согоггүй байх ёстой.