Read Ariun Bible 2013 – Ариун Библи 2013 Тооллого 30 Bible Online

Тооллого 30 - Ariun Bible 2013 – Ариун Библи 2013 bible

Тооллого 30

¹Дараа нь Мосе Израилийн хөвгүүдийн овгийн тэргүүнүүдтэй ярин, хэлэхдээ —ЭЗЭНий тушаасан үг нь энэ болой.

²Хэрэв эр хүн сэтгэлээ үүрэгт хүлэхээр ЭЗЭНд ам өчиг өгч, тангараг өргөсөн бол тэр өөрийн үгийг зөрчих ёсгүй. Тэрээр амнаасаа гаргасан бүхний дагуу үйлдэх ёстой.

³Хэрэв эмэгтэй хүн залуу насандаа эцгийнхээ гэрт өөрийгөө үүрэгт хүлээд, ЭЗЭНд ам өчиг өгөх үед

⁴түүний ам өчиг болон сэтгэлээ хүлсэн үүргийг эцэг нь сонсоод, түүнд юу ч хэлэхгүй бол, охины бүх ам өчиг нь батлагдах бөгөөд сэтгэлээ хүлсэн үүрэг бүр нь батлагдах болой.

⁵Гэвч эцэг нь сонссон өдрөө л түүнийг хориглох аваас охины андгай болон сэтгэлээ хүлсэн түүний үүргийн аль нь ч тогтохгүй. Эцэг нь түүнийг хориглосон тул ЭЗЭН тэр охиныг уучлах болно.

⁶Хэрэв эмэгтэй андгай дор эсвэл сэтгэлээ хүлсэн амныхаа яаруу тунхаглал дор байхдаа нөхөрт гарвал,

⁷нөхөр нь сонсоод, сонссон өдрөө түүнд юу ч хэлэхгүй бол, эмэгтэйн ам өчиг болон сэтгэлээ хүлсэн үүрэг нь батлагдах ажгуу.

⁸Гэвч нөхөр нь сонссон өдрөө л түүнийг хориглох буюу тэр эмэгтэйн ам өчиг болон сэтгэлээ хүлсэн амных нь яаруу тунхгийг нөхөр нь хүчингүй болгох аваас ЭЗЭН тэр эмэгтэйг уучлах болно.

⁹Харин бэлэвсэн эмэгтэй ба салсан эмэгтэйн сэтгэлээ хүлсэн ам өчиг болгон нь түүнийг хүлэх болно.

¹⁰Хэрэв тэрээр нөхрийнхөө гэрт ам өчиг өгсөн буюу сэтгэлээ үүрэг дор тангаргаар хүлсэн бөгөөд

¹¹нөхөр нь сонсоод түүнд юу ч хэлээгүй, хориглоогүй байх аваас түүний бүх ам өчиг батлагдах ба сэтгэлээ хүлсэн үүрэг бүр нь батлагдах ажгуу.

¹²Гэвч нөхөр нь сонссон өдрөө л тэдгээрийг хүчингүй болгох аваас тэр эмэгтэйн ам өчиг болон сэтгэлээ үүрэгт холбон амнаасаа гаргасан юу нь ч тогтохгүй. Түүний нөхөр тэдгээрийг хүчингүй болгосон бөгөөд ЭЗЭН тэр эмэгтэйг уучлах болно.

¹³Тэр эмэгтэйн ам өчиг бүр мөн сэтгэлээ номхтгохоор хүлэх тангараг бүрийг нөхөр нь баталж эсвэл нөхөр нь хүчингүй болгож болно.

¹⁴Гэвч нөхөр нь өдрөөс өдөрт түүнд юу ч хэлэхгүй байвал түүний дээр байгаа бүх ам өчиг, бүх үүргийг нь тэрээр баталж байна. Нөхөр нь сонссон өдрөө л түүнд юу ч хэлээгүй учраас тэдгээрийг тогтоосон байна.

¹⁵Харин тэрээр сонсчихоод хэсэг хугацааны дараа хүчингүй болговол эмэгтэйн хилэнцийг тэр үүрнэ гэв.

¹⁶Эдгээр нь нөхөр ба эхнэрийн хооронд мөн залуу насандаа, эцгийнхээ гэрт байгаа охин ба эцгийн хооронд байх, Мосед ЭЗЭНий тушаасан зарлигууд юм.