Read Ariun Bible 2013 – Ариун Библи 2013 Тооллого 32 Bible Online

Тооллого 32 - Ariun Bible 2013 – Ариун Библи 2013 bible

Тооллого 32

¹Реубений хөвгүүд болон Гадын хөвгүүд маш олон мал сүрэгтэй байлаа. Иазерын нутаг болон Гилеадын нутгийг мал сүрэгт үнэхээр тохирох газар болохыг тэд хараад,

²Гадын хөвгүүд, Реубений хөвгүүд ирж, Мосе, тахилч Елеазар болон хотол түмний удирдагчдад —

³Атарот, Дибон, Иазер, Нимра, Хешбон, Елеале, Себам, Небо болон Беон

⁴буюу Израилийн хотол түмний өмнө ЭЗЭНий эзэлсэн нутаг нь мал сүргийн нутаг билээ. Тэгээд ч зарц нар тань мал сүрэгтэй болой гэв.

⁵Тэд —Хэрэв бид таны нүдэнд тааллыг олсон аваас энэ нутгийг зарц нартаа эзэмшил болгон өгч биднийг Иорданыг бүү гатлуулаач гэж хэлэв.

⁶Харин Гадын хөвгүүд, Реубений хөвгүүдэд Мосе —Та нарыг энд суурьших зуур ах дүүс чинь дайнд явах ёстой гэж үү?

⁷ЭЗЭНий тэдэнд өгсөн нутаг уруу гатлан явахад нь Израилийн хөвгүүдийн зүрхийг та нар юунд мохооно вэ?

⁸Би уг нутгийг харуулахаар танай эцгүүдийг Кадеш-барнеагаас илгээхэд тэд үүнтэй адил зүйлийг хийсэн юм.

⁹Тэд Ешколын хөндий уруу очиж уг нутгийг үзчихээд, Израилийн хөвгүүдийн зүрхийг ЭЗЭНий тэдэнд өгсөн нутаг уруу явахгүй болтол нь мохоосон.

¹⁰Тэр өдөр ЭЗЭНий уур хилэн шатаж, Тэр тангараглан,

¹¹“Египетээс гарч ирсэн хүмүүс Намайг бүрэн дагаагүй тул тэднээс хорь ба түүнээс дээш насны нэг ч хүн, Абрахам, Исаак, Иаковт Миний амласан тэр нутгийг харахгүй.

¹²Зөвхөн кениз хүн Иефуннегийн хүү Калеб, Нуны хүү Иошуа нар л ЭЗЭНийг бүрэн дагасан учраас тэд харах болно” гэсэн.

¹³ЭЗЭНий уур хилэн Израилийн эсрэг шатаж, ЭЗЭНий мэлмийд ёрын мууг үйлдсэн хүмүүсийн бүхэл үеийнхэн устах хүртэл Тэр тэднийг цөлд дөчин жил тэнүүчлүүлсэн билээ.

¹⁴Харагтун, нүгэлт хүмүүсийн үр удам аа, та нар Израилийн эсрэг ЭЗЭНий шатаж буй уур хилэнг улам нэмэхээр эцгүүдийнхээ байранд бослоо.

¹⁵Хэрэв та нар Түүнийг дагахаас эргэх аваас Тэр дахин нэг удаа тэднийг цөлд хаяж орхих бөгөөд та нар энэ бүх ард олныг устгах болно гэлээ.

¹⁶Тэд түүнд ойртон ирж —Бид энд мал сүрэгтээ хонины хашаа хороо, багачууддаа хот барьж босгох болно.

¹⁷Харин бид Израилийн хөвгүүдийг нутагт нь аваачих хүртэлээ зэвсэглээд Израилийн хөвгүүдийн өмнө явахад бэлэн байна. Тэр хооронд манай багачууд уг нутгийн оршин суугчдын улмаас бэхлэгдсэн хотуудад амьдарч байх болно.

¹⁸Израилийн хөвгүүд, хүн нэгбүр өөрийн өвийг эзэмштэл бид гэр орондоо буцахгүй.

¹⁹Иорданы чанадад буюу зүүн зүгт бидэнд өв маань ирсэн учир Иорданы нөгөө талд тэдэнтэй хамт бидэнд өв байхгүй гэв.

²⁰Мосе тэдэнд —Хэрэв та нар үүнийг хийвэл, дайнд явахаар ЭЗЭНий өмнө зэвсэглэж,

²¹ЭЗЭН дайснуудаа өмнөөсөө хөөн зайлуулах хүртэл танай зэвсэглэсэн эрчүүд бүгд ЭЗЭНий өмнө Иорданыг гатлан явж,

²²ЭЗЭНий өмнө тэр нутаг дийлэгдэх аваас дараа нь та нар буцах бөгөөд ЭЗЭНий өмнө болон Израилийн өмнө гэмгүй байх болно. Энэ нутаг ч ЭЗЭНий өмнө та нарын эзэмшил болох юм.

²³Гэвч та нар ингэхгүй аваас харагтун, та нар ЭЗЭНий өмнө нүгэл үйлдэх бөгөөд нүгэл чинь та нарыг олно гэдгийг сайн мэдтүгэй.

²⁴Багачууддаа хот, хониндоо хашаа хороо барьж босгон, амласан зүйлээ хийгтүн гэлээ.

²⁵Гадын хөвгүүд, Реубений хөвгүүд Мосетэй ярин —Боолууд тань эзнийхээ тушаасан ёсоор хийх болно.

²⁶Бидний багачууд, эхнэрүүд, бидний бог малын сүрэг болон бүх үхэр сүрэг маань энд Гилеадын хотуудад үлдэнэ.

²⁷Харин эзнийхээ хэлсэн ёсоор таны боолууд, хүн бүр маань дайнд зэвсэглээд тулалдахаар ЭЗЭНий оршихуйд гатлан явах болно гэлээ.

²⁸Мосе тэдний тухай тахилч Елеазар, Нуны хүү Иошуа болон Израилийн хөвгүүдийн овгууд дахь эцгүүдийн бүлийн тэргүүнүүдэд тушаал өгөв.

²⁹Мосе тэдэнд —Хэрэв Гадын хөвгүүд, Реубений хөвгүүд, хүн бүр нь тулаанд зэвсэглэн ЭЗЭНий оршихуйд та нартай хамт Иорданыг гатлаад, уг нутаг та нарт дийлэгдэх аваас та нар тэдэнд Гилеадын нутгийг эзэмшил болгон өгөгтүн.

³⁰Харин тэд зэвсэглэн та нартай хамт гатлахгүй бол тэд Канаан нутагт та нарын дунд эзэмшилтэй байх болно гэв.

³¹Гадын хөвгүүд, Реубений хөвгүүд хариулан —Таны боолуудад ЭЗЭНий айлдсан ёсоор бид хийх болно.

³²Бид зэвсэглэн ЭЗЭНий оршихуйд Канаан нутагт гатлан орох бөгөөд бидний өвийн эзэмшил нь Иорданы чанадад бидэнд үлдэх болно гэлээ.

³³Ингээд Гадын хөвгүүд, Реубений хөвгүүд болон Иосефын хүү Манассегийн овгийн хагаст аморичуудын хаан Сихоны хаанчлалыг мөн Башаны хаан Огийн хаанчлалыг, тэдний хотууд болон нутаг дэвсгэрийг, эргэн тойрон дахь газрын хотуудтай нь хамт Мосе өгөв.

³⁴Гадын хөвгүүд Дибон, Атарот, Ароер,

³⁵Атрот-шофан, Иазер, Иогбеха,

³⁶Бет-нимра, Бет-харан буюу бэхлэлт хотуудыг барьж, хониндоо хашаа хороо босгов.

³⁷Реубений хөвгүүд Хешбон, Елеале, Кириатаим,

³⁸Небо, Баал-меон (эдгээрийн нэрс өөрчлөгдсөн), Сибмаг барьсан бөгөөд барьсан хотууддаа өөр нэрс өгөв.

³⁹Манассегийн хүү Махирын хөвгүүд Гилеад уруу явж, түүнийг эзлэн, тэнд байсан аморичуудыг зайлуулав.

⁴⁰Манассегийн хүү Махирт Мосе Гилеадыг өгч, тэр тэнд амьдрав.

⁴¹Манассегийн хүү Иаир явж, тэндхийн суурингуудыг эзлэн, тэдгээрийг Хаввот-иаир гэж нэрлэв.

⁴²Ноба явж Кенат ба түүний гацаануудыг эзлээд өөрийнхөө нэрээр Ноба гэж нэрлэв.