Read Ariun Bible 2013 – Ариун Библи 2013 Тооллого 35 Bible Online

Тооллого 35 - Ariun Bible 2013 – Ариун Библи 2013 bible

Тооллого 35

¹Иерихогийн харалдаах Иорданы дэргэд, Моабын талд ЭЗЭН, Мосетэй ярин —

²Эзэмшлийнхээ өвөөс левичүүдэд амьдрах хотуудыг өгөхийг Израилийн хөвгүүдэд тушаагтун. Та нар левичүүдэд тэр хотуудын эргэн тойрон дахь бэлчээрийг нь бас өг.

³Хотууд нь тэдний амьдран суух газар болох бөгөөд бэлчээрүүд нь тэдний үхэр сүрэг, эд зүйлс хийгээд бүх мал амьтных нь болох юм.

⁴Та нарын левичүүдэд өгөх хотуудын бэлчээр хотын хэрэмнээс гадагш тойруулан мянган тохой байх ёстой.

⁵Та нар төвд нь хотыг оруулан хотоос гадагшаа зүүн талд хоёр мянган тохой, өмнөд талд хоёр мянган тохой, баруун талд хоёр мянган тохой, хойд талд хоёр мянган тохойг хэмжигтүн. Энэ нь тэдний хотуудын бэлчээр нутаг болой.

⁶Левичүүдэд та нарын өгөх хотууд дотроос, хүн алсан нэгнийг зугтан очиход зориулан өгөх зургаан хоргодох хот байх болой. Тэдгээрт нэмэлт болгон та нар дөчин хоёр хотыг өг.

⁷Левичүүдэд та нарын өгөх бүх хот нь бэлчээр нутгийнхаа хамт дөчин найман хот байх болой.

⁸Израилийн хөвгүүдийн эзэмшлээс өгөх хотуудын тухайд, та нар илүү ихтэйгээс ихийг авч, багатайгаас багыг авч өг. Овог бүр өвлөх эзэмшлийнхээ дагуу левичүүдэд хотуудаасаа өгөх ёстой гэж айлдлаа.

⁹Дараа нь ЭЗЭН, Мосетэй ярин —

¹⁰Израилийн хөвгүүдтэй ярьж, тэдэнд ийн хэлэгтүн. “Та нар Иорданыг гатлан Канаан нутагт орох үедээ,

¹¹хоргодох хот чинь болох хотуудыг өөрсдөдөө сонгон авагтун. Тэгвэл санамсаргүйгээр хүн алсан алуурчин нь тийшээ зугтах юм.

¹²Хүн алсан нэгэн нь хотол түмний өмнө шүүгдэхээр зогсохоосоо өмнө үхэхгүйн тулд тэр хотууд та нарт өшөө авагчаас хоргодох газар болно.

¹³Та нарын өгөх хотууд нь та нарын хоргодох зургаан хот байх ёстой.

¹⁴Та нар гурван хотыг Иорданы чанадад, гурван хотыг Канаан нутагт өгөх бөгөөд тэдгээр нь хоргодох хот болох ёстой.

¹⁵Санамсаргүйгээр хүн алсан аливаа хүн тийш зугтан очихын тулд энэ зургаан хот Израилийн хөвгүүдэд ч мөн тэдний дунд буй ирмэл хүн, түр суугчид ч хоргодох газар болог.

¹⁶Гэвч нэг нь нөгөөгөө төмөр зүйлээр цохисноос болж өнөөх нь үхэх аваас тэрээр алуурчин мөн. Алуурчин заавал үхэх ёстой.

¹⁷Хэрэв хүнийг үхүүлж болохоор чулуу гартаа барин нэг нь нөгөөгөө цохиж, өнөөх нь үхэх аваас тэрээр алуурчин мөн. Алуурчин заавал үхэх ёстой.

¹⁸Эсвэл хүнийг үхүүлж болохоор модон багаж гартаа барин нэг нь нөгөөгөө цохиж, өнөөх нь үхэх аваас тэрээр алуурчин мөн. Алуурчин заавал үхэх ёстой.

¹⁹Цусан өшөө авагч өөрөө уг алуурчныг ална. Тэр түүнтэй учрах үедээ түүнийг ална.

²⁰Хэрэв үзэн ядсанаас болж нэг нь нөгөөгөө түлхэх эсвэл отож байгаад аливаа зүйлийг түүн уруу шидэж, өнөөх хүн үхэх аваас

²¹эсвэл өс хонзон санан түүнийг гараараа цохисон бөгөөд өнөөх хүн үхэх аваас түүнийг цохисон нэгэн нь алуурчин мөн тул заавал үхэх ёстой. Цусан өшөө авагч нь алуурчинтай учрах үедээ түүнийг ална.

²²Харин нэг нь нөгөөгөө өс хонзон саналгүйгээр гэнэт түлхсэн эсвэл отоогүй байгаад аливаа зүйлийг түүн уруу шидсэн

²³эсвэл түүнийг харалгүй, хүнийг үхүүлж болохоор чулууг дээрээс нь унагаснаас болж өнөөх хүн үхэх аваас тэр түүний дайсан байгаагүй, түүнд хор хүргэх гээгүй учраас

²⁴хүн алсан хүн болон цусан өшөө авагчийн хоорондохыг эдгээр хууль цаазын дагуу хотол түмэн шүүх ёстой.

²⁵Алуурчныг цусан өшөө авагчийн гараас хотол түмэн аварч, зугтан очсон хоргодох хотод хотол түмэн үүнийг буцаах ёстой. Тэр хүн, ариун тосоор тослогдсон тэргүүн тахилчийг өөд болтол тэнд амьдрах ажгуу.

²⁶Хэрэв алуурчин өөрийн зугтан очсон хоргодох хотынхоо хилээс гадагш гарахад,

²⁷цусан өшөө авагч нь хоргодох хотын хилийн гадна түүнийг олоод, алуурчныг албал цусны буруутан болохгүй.

²⁸Учир нь тэргүүн тахилчийг өөд болтол тэрээр хоргодох хотдоо үлдэх ёстой байв. Харин тэргүүн тахилчийг өөд болсны дараа алуурчин эзэмшил нутагтаа буцаж болно.

²⁹Энэ зүйлс та нарын хамаг үеийнхэнд, амьдрах газар бүрд чинь хууль ёсны зарлиг байх болтугай.

³⁰Хэрэв хэн нэгэн нь хүн албал, уг алуурчин гэрч нарын амаар алагдах ёстой. Харин ганц гэрчийн хариулснаар ямар ч хүнийг алах ёсгүй.

³¹Түүнчлэн, үхэлд буруутай алуурчны амийн төлөө та нар золиос авч болохгүй. Харин тэр заавал үхэх ёстой.

³²Мөн хоргодох хот уруугаа зугтсан хүнд тахилчийг өөд болохоос өмнө нутагтаа амьдрахаар буцахыг зөвшөөрөн түүний төлөө та нар золиос авч болохгүй.

³³Та нар өөрсдийн байгаа нутгаа бузарлах ёсгүй. Учир нь цус газрыг бузарладаг бөгөөд газар дээр урссан цусны төлөө цус урсгагчийн цуснаас өөр хийгдэж болох эвлэрүүлэл байхгүй.

³⁴Дунд нь Би оршин, дотор нь та нар амьдрах нутгийг та нар бүү бузарла. Учир нь ЭЗЭН Би Израилийн хөвгүүдийн дунд оршин байна” гэж айлдлаа.