Read Ariun Bible 2013 – Ариун Библи 2013 Тооллого 9 Bible Online

Тооллого 9 - Ariun Bible 2013 – Ариун Библи 2013 bible

Тооллого 9

¹Тэднийг Египет нутгаас гарсны дараа хоёр дахь жилийн эхний сард Синаин цөлд ЭЗЭН, Мосетэй ярин —

²Израилийн хөвгүүдээр тогтоогдсон цагт нь Алгасалыг сахиул.

³Уг сарын арван дөрөвний өдөр, үдшийн бүрийгээр та нар үүнийг тогтоогдсон цагт нь сахигтун. Та нар үүнийг бүх зарлиг, бүх тогтоомжийнх нь дагуу сахигтун гэлээ.

⁴Мосе Израилийн хөвгүүдэд Алгасалыг сахих тухай хэлэв.

⁵Тэд Синаин цөлд байхдаа эхний сарын арван дөрөвний өдөр, үдшийн бүрийгээр Алгасалыг сахив. Мосед ЭЗЭНий тушаасан бүхний дагуу Израилийн хөвгүүд тийн үйлдэв.

⁶Гэтэл үхсэн хүнээс болж бузартсан хэсэг хүн тэр өдөр Алгасалыг сахиж чадсангүй. Тиймээс тэд Мосе, Аарон нарын өмнө тэр өдөр ирээд,

⁷тэд түүнд —Бид үхсэн хүнээс болж бузартсан. Гэвч Израилийн хөвгүүдийн дотор тогтоогдсон цагт нь ЭЗЭНий өргөлийг авчрахыг юунд бидэнд хориглов? гэлээ.

⁸Мосе тэдэнд —Байж бай. Та нарын талаар ЭЗЭН юу тушаахыг би сонсъё гэв.

⁹ЭЗЭН, Мосетэй ярин —

¹⁰Израилийн хөвгүүдэд “Үхсэн хүнээс болж бузар болсон эсвэл холын аянд явж байгаа, та нарын мөн үр удмын чинь хэн нь ч ЭЗЭНд Алгасалыг сахиж болно.

¹¹Тэд үүнийг хоёрдугаар сарын арван дөрөвний өдрийн үдшийн бүрийгээр сахиж, үүнийг исгээгүй талх, гашуун ногоотой хамт идэх болой.

¹²Тэд өглөө болтол үүнээс юуг ч үлдээх ёсгүй бөгөөд ясыг нь хугалж болохгүй. Алгасалын бүх зарлигийн дагуу тэд үүнийг сахих ёстой.

¹³Харин цэвэр байгаа болон холын аянд яваагүй атлаа Алгасалыг сахихгүй хүн байх аваас тэрээр ЭЗЭНий тахилыг тогтоогдсон цагт нь өргөөгүй тул тэр хүн ард олноосоо таслагдаж гэм нүглээ үүрнэ.

¹⁴Хэрэв ирмэл хүн та нарын дунд түр сууж байгаад ЭЗЭНд Алгасалыг сахих аваас тэр үүнийг Алгасалын зарлиг, хууль цаазынх нь дагуу хийх ёстой. Ирмэл хүнд ч нутгийн уугуул хүнд ч та нар нэг л зарлигтай байх ёстой” гэж хэл хэмээн айлдлаа.

¹⁵Асрыг босгосон тэр өдөр гэрчлэлийн майхан буюу асрыг үүл бүрхэж, үдшээс өглөө хүртэл асрын дээр гал мэт үзэгдэв.

¹⁶Энэ нь тийнхүү үргэлжлэн, өдөр нь үүл түүнийг бүрхэж, шөнө нь гал мэт үзэгдэж байлаа.

¹⁷Асрын дээрээс үүл дээшлэх болгонд Израилийн хөвгүүд хөдөлж, үүл буун тогтсон газарт Израилийн хөвгүүд буудаллаж байв.

¹⁸ЭЗЭНий тушаалаар Израилийн хөвгүүд аянд гарч, ЭЗЭНий тушаалаар тэд буудалладаг байв. Үүл асрын дээр тогтон байх үед тэд буудаллан үлддэг байлаа.

¹⁹Үүл асрын дээр олон хоногоор саатахад Израилийн хөвгүүд ЭЗЭНий журам зааврыг сахин, аянд гардаггүй байв.

²⁰Зарим үед үүл асрын дээр хэдэн хоногоор саатах аваас тэд ЭЗЭНий тушаалын дагуу буудаллан үлддэг бөгөөд ЭЗЭНий тушаалын дагуу аянд гардаг байлаа.

²¹Зарим үед үүл үдшээс өглөө болтол саатан, өглөө нь үүл өргөгдөх аваас тэд хөдөлдөг байв. Үүл өдрөөр эсвэл шөнөөр, хэзээ өргөгдөнө тэр үед тэд аянд гардаг байв.

²²Хоёр өдрөөр эсвэл сараар эсвэл жилээр ч үүл асрын дээр саатаж тэнд байхад Израилийн хөвгүүд буудаллан үлддэг бөгөөд аянд гардаггүй байлаа. Харин түүнийг өргөгдөх үед тэд аянд гардаг байлаа.

²³Тэд ЭЗЭНий амаар буудаллаж, ЭЗЭНий амаар аянд гардаг байв. Мосегоор дамжсан ЭЗЭНий амаар тэд ЭЗЭНий журам зааврыг сахидаг байлаа.