Read Ariun Bible 2013 – Ариун Библи 2013 Мика 3 Bible Online

Мика 3 - Ariun Bible 2013 – Ариун Библи 2013 bible

Мика 3

¹Тэгээд би тийнхүү хэлэв. “Сонсогтун, Иаковын тэргүүлэгч нар, Израилийн гэрийн захирагчид аа!, Шүүлтийг та нар мэдэх ёсгүй гэж үү?

²Та нар сайныг үзэн ядаж, мууг хайрлан, Тэдний арьсыг хуулж, яснаас нь махыг нь салгадаг бөгөөд

³Миний ард түмний биеийг идэж, Тэдний арьсыг нь хуулан, ясыг нь хугалж, Тогоо саван дахь мах адил тэднийг хэрчдэг”

⁴Тэгээд тэд ЭЗЭН өөд хашхирах боловч Тэр эс хариулна. Муу муухай зүйлийг тэд үйлдсэн тул Тэр цагт Тэрээр нүүрээ тэднээс нууна.

⁵Миний ард түмнийг төөрөгдүүлдэг эш үзүүлэгчдийн талаар ЭЗЭН ийнхүү айлдаж байна. Тэд шүдээрээ хазах юмтай байхдаа “Амар амгалан” гэж хашхирдаг. Харин аманд нь юу ч хийдэггүй хүний эсрэг Тэд дайн зарладаг.

⁶Тиймээс энэ нь та нарт үзэгдэлгүй шөнө, Мэргэ төлгөгүй харанхуй болно. Нар эш үзүүлэгчид дээр шингэж, Өдөр нь тэдний дээр хар болно.

⁷Үзмэрчид гутамшиг болж, Мэргэчид ичих болно. Бурханаас ямар ч хариу ирэхгүй тул Тэд үнэхээр бүгд амаа таглах болно.

⁸Тэгэхэд би, Иаковт гэмт үйлдлийг нь, Израильд нүглийг нь мэдүүлэхийн тулд Хүч чадлаар, ЭЗЭНий Сүнсээр, Шүүлт, эр зоригоор дүүрэн байна.

⁹Сонсогтун үүнийг, шүүлтийг жигшиж, Чигч шулуун болгоныг мушгидаг Иаковын гэрийн тэргүүлэгчид ба Израилийн гэрийн захирагчид аа!

¹⁰Та нар Сионыг цусаар, Иерусалимыг гажуудлаар босгодог.

¹¹Тэргүүн нар хахууль аван шүүж, Тахилч нар нь хөлсөөр зааварчлан, Эш үзүүлэгчид нь мөнгөний төлөө мэргэлдэг. Гэсэн ч тэд ЭЗЭНд түшиглэн, “ЭЗЭН бидний дунд байхгүй гэж үү? Бидэн дээр гай буухгүй” гэж хэлдэг.

¹²Тиймээс та нараас болж Сион талбай мэт хагалагдаж, Иерусалим сүйрч, Өргөөний уул нь модот өндөрлөгүүд адил болно.