Read Ariun Bible 2013 – Ариун Библи 2013 Нахум 2 Bible Online

Нахум 2 - Ariun Bible 2013 – Ариун Библи 2013 bible

Нахум 2

¹Цайзаа хамгаал, замыг ажигла. Ууцаа бэхэлж, бүх хүчээ хураа.

²Учир нь сүйтгэгчид тэднийг сүйтгэсэн ч, Усан үзмийн модных нь мөчрүүдийг хугалсан ч, ЭЗЭН Иаковын сүр хүчийг Израилийн сүр хүчийг ч бас сэргээх болно.

³Түүний хүчит эрсийн бамбайнууд нь улаан өнгөтэй, Дайчид нь час улаан өнгөөр хувцасласан. Түүнийг жагсаалд гарахаар бэлтгэх өдөр Тэрэгнүүд нь хэтний оч шиг улалзаж. Тэдний хүлгүүд дүүхэлзмүй.

⁴Тэрэгнүүд нь гудамжнуудаар галзууран уралдаж, Тэд талбайнуудаар зэрлэгээр давхилдана. Тэдний дүр төрх нь бамбар мэт, Тэд цахилах гялбаанууд мэт Цааш нааш цахилж байна.

⁵Тэр өөрийнхөө сурвалжтануудыг санадаг. Тэд алхаан дундаа бүдэрч, Хана хэрэм уруу нь яарцгаан, Бүслэлтийн хаалт босгоно.

⁶Голуудын гулдан хаалганууд нээгдэж Ордон сүйрчээ.

⁷Бүх юм шийдэгдсэн. Түүнийг нүцгэлж, авч одсон ажээ. Түүний шивэгчингүүд цээжээ дэлдэж, Тагтаа дуугарах мэт ёолно.

⁸Хэдийгээр Ниневе нь бүхий л өдрүүдийнхээ туршид Усан цөөрөм мэт байсан боловч Одоо тэд зугтаж байна. “Зогс, зогс” гэх боловч буцаж ирэх хэн ч алга.

⁹Мөнгийг олзол, алтыг олзол. Төрөл бүрийн эрдэнийн зүйлсийн бялхалд Хэмжээ хязгаар гэж ер алга.

¹⁰Сүйрэл, хоосрол бас хоосрол! Зүрхнүүд хайлж, өвдгүүд чичирч байна. Өвчин бүх биеэр тархаж Бүх нүүр зэвхий цайжээ.

¹¹Тэнд арслангуудын нүх, Залуу арслангуудын хооллох газар байсан. Тэнд эрслэн ба арслан бас Арслангийн гүег мярааж, Тэднийг хэн ч үргээн цочоодоггүй байсан.

¹²Арслан гүегүүддээ хангалттай ихийг урж тасчин Эрслэнгүүддээ ихийг алж, Агуйнуудаа олзоор, Нүхнүүдээ сэг зэмээр дүүргэжээ.

¹³“Харагтун, Би чиний эсрэг байна” гэж түг түмдийн ЭЗЭН тунхаглаж байна. “Би утаан дунд тэрэгнүүдийг чинь шатааж, чиний залуу арслангуудыг илд залгина. Би чиний олзыг газраас тасалж, чиний элч нарын дуу цаашид сонсогдохгүй.”