Read Ariun Bible 2013 – Ариун Библи 2013 Хабаккук 1 Bible Online

Хабаккук 1 - Ariun Bible 2013 – Ариун Библи 2013 bible

Хабаккук 1

¹Эш үзүүлэгч Хабаккукийн үзсэн зөн.

²ЭЗЭН, би хэдий болтол тусламж хүсэн дуудаж, Та хэдий болтол сонсохгүй байх юм бэ? Би Тан уруу “Хүчирхийлэл!” хэмээн ориловч, Та аврахгүй юм.

³Ямар учраас Та надад ёс бусыг харуулж, Юунд бузар мууг үзүүлнэ вэ? Тийм ээ, сүйрэл болон хүчирхийлэл өмнө минь болж, Эвдрэлцэл гарч, тэмцэл өрнөж байна.

⁴Тиймээс хууль нь үл тоогдож, Шударга ёс нь огт мөрдөгдсөнгүй. Учир нь буруу хүмүүс зөвтүүдийг бүсэлдэг тул Шударга ёс гаждаг юм.

⁵Үндэстнүүдийн дунд хар! Ажиглацгаа! Алмайр! Гайхагтун! Учир нь та нар сонссон ч итгэж чадахааргүй нэгэн зүйлийг Би та нарын өдрүүдэд хийж байна.

⁶Үзэгтүн, догшин, шаламгай үндэстэн болох халдеичуудыг Би босгож байна. Тэд өөрсдийн бус газрыг эзэгнэхээр Дэлхийн энгээр жагсан урагшилдаг.

⁷Тэд сүрдмээр, аймшигтай Тэдний шударга ёс ба эрх мэдэл Өөрсдөөс нь үүссэн билээ.

⁸Тэдний хөлгүүд нь ирвэснээс ч хурдан, Үдэш гардаг чононуудаас ч гярхай. Тэдний морьтонгууд тэртээх алсаас давхин ирнэ. Тэд залгихаар дайрах бүргэд мэт элин халина.

⁹Тэд бүгдээрээ хүчирхийлэхээр ирнэ. Тоо томшгүй тэдний нүүр урагшлах бөгөөд Олзлогдогсдыг тэд элс мэт хураана.

¹⁰Тэд хаадыг дооглон, Захирагчдаар тоглоомын бай хийнэ. Тэд бэхлэлт бүрийг шоолон, Тэдгээрийг эзлэхээр бул чулуу овоолно.

¹¹Тэр хүмүүс салхи мэт хийсэн, өнгөрч одно. Харин өөрсдийн хүч чадалаа Өөрсдийн бурхан хэмээн бардамнагч тэд Гэм буруутайд тооцогдоно.

¹²Миний Ариун Нэгэн, ЭЗЭН, Бурхан минь, Та өнө мөнхөөс байсан бус уу? Бид үхэхгүй. ЭЗЭН, Та шүүлтийн төлөө тэднийг томилсон билээ. Хад минь, Та засан залруулахын тулд Тэднийг тогтоон тавьсан.

¹³Таны мэлмий муу муухайг зөвшөөрч чадахааргүй дэндүү ариун юм. Бузар харгис явдлыг Та таашаан харж чадахгүй билээ. Яагаад Та хар санаагаар үйлдэгчдийг таашаан харна вэ? Өөрсдөөс нь илүү зөвтийг Буруутууд залгиж байхад Юунд Та анир чимээгүй байна вэ?

¹⁴Яагаад Та хүмүүсийг тэнгисийн загас мэт, Дээрээ захирагчгүй мөлхөгч амьтад мэт бүтээсэн юм бэ?

¹⁵Халдеичууд тэднийг бүгдийг нь Дэгээгээр гохдон татаж, Тороороо шүүрдэн барьж, Загасчилдаг торондоо цуглуулмуй. Тэгээд тэд баярлалдан хөөрцөглөж байна.

¹⁶Тийм учраас тэд өөрсдийн торонд тахил өргөж, Загасчилдаг торондоо зориулан утлага уугиулдаг. Учир нь тэдний олз омог нь Эдгээр юмсаар арвин бөгөөд Хоол хүнс нь элбэг дэлбэг байдаг юм.

¹⁷Тэд тороо хоосолж, Үндэстнүүдийг хэлтрүүлэлгүй хядсаар л байх юм гэж үү?