Read Ariun Bible 2013 – Ариун Библи 2013 Хабаккук 2 Bible Online

Хабаккук 2 - Ariun Bible 2013 – Ариун Библи 2013 bible

Хабаккук 2

¹Би манааныхаа байранд зогсож, Бэхлэлт дээр байрлан суух болно. Тэрээр надад юу айлдахыг Миний гомдлолд Тэр хэрхэн хариулахыг Би харуулдан харсаар л байх болно.

²Тэгтэл ЭЗЭН надад хариу айлдруун “Үзэгдлийг бичээд, хавтангууд дээр сийл. Уншсан нэг нь ухасхийг.

³Үзэгдэл нь тогтоогдсон цагийн төлөө юм. Төгсгөл уруугаа энэ нь яарах агаад эс хөсөрдөнө. Хоцорч байгаа боловч үүнийг хүлээгтүн. Хойшлолгүй заавал биелэгдэх болно.

⁴Харагтун, бардам нэгний сэтгэл нь зөв бус байдаг юм. Харин зөвт хүн итгэлээрээ амьдарна.

⁵Гэтэл бас ихэрхэг хүн дарсанд хууртан, зүгээр ч тогтож суудаггүй. Тэрээр Үхэгсдийн орон мэт идэх дур хүсэлээ ихэсгэж, Үхэлтэй адил хэзээ ч ханаж цадахгүй. Тэр бас бүх үндэстнийг өөртөө цуглуулан, Бүх ард түмнийг өөртөө хураана.

⁶Бүгдээрээ түүний эсрэг ёгт үг, шог дуун таавар гаргаад «Өөрийн бус юмыг өсгөж, Өөрийгөө зээлээр баяжуулагч нэгэн хөөрхий еэ! Хэдий болтол ингэх гэсэн юм бол?» гэхгүй гэж үү?

⁷Чамд зээлдүүлэгч нар гэнэт босож, Чамайг сэгсрэгчид сэрэхгүй гэж үү? Үнэхээр чи тэдний олз нь болно.

⁸Чи олон үндэстнийг тонон дээрэмдсэн учир Тэдгээр ард түмнүүдээс үлдэгсэд Бүгд чамайг тонох болно. Энэ нь газар нутаг, сууринд Оршин суугчдад нь үйлдсэн Хүний цус урсгалт, хүчирхийллээс болж байгаа юм.

⁹Гамшиг сүйрлийн савраас аврагдаж, Өндөрт үүрээ засахын тулд Ёс бусын олз ашгийг гэр орондоо хураагч нь хөөрхий еэ!

¹⁰Олон ард түмнийг мөхөлд хүргэснээрээ Чи гэртээ гутамшигт зүйлийг дуудаж, Өөрийнхөө ч эсрэг нүгэл үйлдэж байна.

¹¹Үнэхээр хана хэрэмнээс чулуу хашхирч, Модон байшингийн яс модод түүнд хариулах болно.

¹²Цус урсган хот босгож, Ёс бусаар суурин байгуулагч нь хөөрхий еэ!

¹³Ард түмнүүд галын төлөө нөр их хөдөлмөрлөн, Үндэстнүүд хоосон зүйлийн төлөө эцэж туйлдах нь Үнэндээ түг түмдийн ЭЗЭНээс болж байгаа бус уу?

¹⁴Юу гэвэл далай усаар дүүрэн байдгийн адил Дэлхий ЭЗЭНий яруу алдрын мэдлэгээр дүүрэх болно.

¹⁵Нүцгэн биеийг нь харахын тулд хор найруулан, Хөршөө согтоогч хүн хөөрхий еэ!

¹⁶Чи хүндэтгэлийн оронд доромжлолоор дүүрэх болно. Одоо чи өөрөө уун, нүцгэн биеэ дэлгэгтүн. ЭЗЭНий баруун мутарт буй аяга чам дээр ирж, Асар их гутамшиг алдрын чинь дээр буух болно.

¹⁷Ливанд үйлдэгдсэн хүчирхийлэл чамайг эзэмдэн, Амьтдынх нь сүйрэл чамайг айлгах болно. Энэ нь газар нутаг, суурин ба оршин суугчдад нь Хүмүүсийн үйлдсэн цус урсгалт, хүчирхийллээс болж байгаа юм.

¹⁸Шүтээнийг хүн сийлэн бүтээсэн хойно Ашиг тус нь юу вэ? Худал хуурмагийг заагч баримал хөргүүдийн Ашиг тус нь эсвэл юу вэ? Үүнийг хийгч нь ярьж чаддаггүй шүтээнүүдийг урлахдаа Гарын бүтээлдээ л итгэн найддаг билээ.

¹⁹Модны тайрдсанд хандан «Сэрээч!» гэж, Дүлий чулуунд «Босооч!» хэмээн хэлдэг хүн хөөрхий еэ! Тэр чамд зааж чадна гэж үү? Үзэгтүн, тэд чинь алт, мөнгөөр бүрүүлсэн Амьсгаа дотор нь байхгүй эд.

²⁰Харин ЭЗЭН ариун сүмдээ заларсан байдаг. Бүх дэлхий Түүний өмнө дуугүй байх болтугай.”