Read Ariun Bible 2013 – Ариун Библи 2013 Зехариа 4 Bible Online

Зехариа 4 - Ariun Bible 2013 – Ариун Библи 2013 bible

Зехариа 4

¹Тэгээд надтай ярилцаж байсан тэнгэрэлч эргэж, нойрноос сэрсэн хүн мэт намайг босгов.

²Тэр надаас —Чи юу харж байна вэ? гэсэнд би —Би харж байна. Оройдоо хул бүхий цул алтан дэнлүүний суурь болон түүн дээр орой дээрх дэнлүү тусбүрд хамаарах долоон сувгуудтай долоон дэнлүүг харлаа.

³Мөн дэргэд нь хоёр чидун мод байна. Нэг нь хулны баруун гарт, нөгөө нь зүүн гарт нь байна гэсний

⁴дараа би надтай ярилцаж байсан тэнгэрэлчид хариулан —Эзэн минь, эдгээр нь юу вэ? гэсэнд

⁵надтай ярилцагч мөнөөх тэнгэрэлч надад хандан —Эдгээр нь юу болохыг чи мэдэхгүй гэж үү? хэмээсэнд би —Мэдэхгүй, эзэн минь гэв.

⁶Тэгээд тэр надад —Энэ бол Зеруббабелд хандсан ЭЗЭНий үг юм. “Хүч чадлаар ч бус, эрх мэдлээр ч бус, харин Миний Сүнсээр” гэж түг түмдийн ЭЗЭН айлдаж байна.

⁷“Агуу уул аа! Чи юу юм бэ? Зеруббабелын өмнө чи тал газар болно. Тэр «Нигүүлсэл, түүнд нигүүлсэл байг!» гэж хашхиран оройн чулууг урагш авчирна” гэв.

⁸Мөн ЭЗЭНий үг надад ирж айлдсан нь —

⁹Зеруббабелын гар энэ өргөөний суурийг тавьсан бөгөөд түүний гар үүнийг дуусгах болно. Тэгээд та нар түг түмдийн ЭЗЭН та нар уруу намайг илгээснийг мэдэх болно.

¹⁰Жижиг юмсын өдрийг үзэн ядагсад нь Зеруббабелын гар дахь тэгшлүүрийг хараад баярлах болно. Харин эдгээр долоо нь дэлхий даяар хэрэн хэсэх ЭЗЭНий нүд юм гэв.

¹¹Дараа нь би түүнд —Дэнлүүний суурийн баруун, зүүн тал дахь энэ хоёр чидун мод нь юу вэ? гэв.

¹²Би хоёр дахь удаагаа түүнд —Хоёр алтан цоргоор тосоо юүлэн гаргагч чидуны хоёр мөчир нь юу вэ? гэсэнд

¹³тэр надад —Эдгээр нь юу болохыг чи мэдэхгүй гэж үү? хэмээсэнд би —Үгүй, эзэн минь гэв.

¹⁴Тэгээд тэр —Эдгээр нь бүх л газар дэлхийн Эзэний дэргэд зогсож байдаг тослогдсон хоёр хөвгүүн юм гэв.