Read Ariun Bible 2013 – Ариун Библи 2013 Матай 4 Bible Online

Матай 4 - Ariun Bible 2013 – Ариун Библи 2013 bible

Матай 4

¹Есүс тэгээд диаволд соригдохын тулд Сүнсээр цөл уруу хөтлөгдөв.

²Тэр дөчин өдөр, дөчин шөнө мацаг барьсны эцэст өлсжээ.

³Соригч ирээд, Түүнд —Чи Бурханы Хүү мөн аваас энэ чулуунуудыг талх бол гэж тушаа гэв.

⁴Гэвч Есүс —“Хүн зөвхөн талхаар бус, харин Бурханы амнаас гарах үг бүрээр амьдарна” гэж бичигдсэн байдаг хэмээв.

⁵Тэгэхэд диавол Түүнийг ариун хотод аваачин сүмийн орой дээр зогсоогоод,

⁶Түүнд —Хэрэв Чи Бурханы Хүү мөн юм бол доош үсэр. Учир нь “Тэрээр тэнгэрэлч нартаа Чиний талаар тушаана. Чамайг хөлөө чулуунд цохичих вий гэсэндээ Тэд гар дээрээ Чамайг өргөөд явна” гэж бичигдсэн байдаг шүү дээ гэв.

⁷Есүс —“Бурхан Эзэнээ бүү сорь” гэж бас бичигдсэн байдаг гэв.

⁸Диавол дахин Түүнийг асар өндөр ууланд аваачаад, ертөнцийн бүх хаанчлал болон сүр хүчийг нь үзүүлээд —

⁹Хэрэв Чи сөхрөн, надад мөргөвөөс энэ бүхнийг би Чамд өгье гэж хэлэхэд

¹⁰Есүс —Зайл, Сатан[2] аа! “Бурхан Эзэндээ чи мөргөж, зөвхөн Түүнд үйлчил” гэж бичигдсэн байдаг юм гэлээ.

¹¹Тэгээд диавол Түүнийг орхиход, гэнэт тэнгэрэлч нар ирж, Түүнд үйлчлэв.

¹²Иохан баривчлагдсаныг Есүс сонсоод Галил тийш зайлан одов.

¹³Тэр Назарыг орхиж, Зебулун ба Нафтали мужийн нуурын дэргэдэх Капернаумд очиж суурьшив.

¹⁴Энэ нь эш үзүүлэгч Исаиагаар хэлүүлсэн нь биелэгдсэн хэрэг бөгөөд

¹⁵«Тэнгис хүрэх зам дээрх Зебулун нутаг ба Нафталийн нутаг, Иорданы чанад, Харийнхны Галил аа

¹⁶Харанхуйд суугч ард түмэн их гэрлийг үзэв. Үхлийн сүүдэрт нутагт суугчдын дээр гэрэл тусав» гэсэн юм.

¹⁷Тэр цагаас эхлэн Есүс —Гэмшицгээ! Тэнгэрийн хаанчлал айсуй гэж тунхаглаж эхлэв.

¹⁸Тэрээр Галил нуурын эргээр явж байхдаа, нуурт тор шидэж буй ах дүү хоёрыг харжээ. Нэг нь Петр гэгддэг Симон, нөгөө нь түүний дүү Андрей байв. Тэд загасчид аж.

¹⁹Есүс тэдэнд —Намайг дага, Би та нарыг хүмүүсийн загасчид болгоно гэв.

²⁰Тэд тэр даруй тороо орхиж, Түүнийг дагалаа.

²¹Тэр тэндээсээ цааш явж Зебедеен хүү Иаков, түүний дүү Иохан гэдэг бас нэгэн ах дүү хоёрыг завин дотроо эцэг Зебедеенхээ хамт тороо сэлбэж байгааг хараад дуудав.

²²Тэд тэр даруй эцгээ завьтайгаа орхиж, Түүнийг дагалаа.

²³Есүс Галил даяар явахдаа синагогуудад нь зааж, хаанчлалын сайнмэдээг тунхаглаж, ард олны доторх алив төрлийн өвчин эмгэгийг эдгээж байлаа.

²⁴Түүний тухай зар Сири даяар тархсанд, зовж шаналсан, чөтгөр шүглэсэн, гараг саа, саа өвчтэй бүхнийг хүмүүс Түүн дээр авчирч, Есүс тэднийг эдгээжээ.

²⁵Галил, Декаполь, Иерусалим, Иудей түүнчлэн Иорданы тэртээгээс үй олноороо Түүнийг дагалаа.