Read Ariun Bible 2013 – Ариун Библи 2013 Марк 1 Bible Online

Марк 1 - Ariun Bible 2013 – Ариун Библи 2013 bible

Марк 1

¹Бурханы Хүү[1] Есүс Христийн сайнмэдээний эхлэл.

²Эш үзүүлэгч Исаиагийн номд «“Харагтун, Би түрүүнд чинь зарлага элчээ илгээнэ. Тэрээр замыг чинь бэлтгэнэ” гэсэнчлэн

³Цөлд хашхирагч нэгний дуу нь “Эзэний замыг бэлтгэцгээ, Жимийг нь шулуун болгогтун” гэнэ» гэж бичигджээ.

⁴Баптисч Иохан цөлд гарч ирэн, баптисм хүртээж, нүгэл уучлагдах гэмшлийн баптисмыг тунхаглаж[2] байлаа.

⁵Бүх Иудей нутгийнхан, Иерусалимынхан бүгд түүн дээр очоод, нүглээ улайн, Иордан голд түүгээр баптисм хүртэж байв.

⁶Иохан тэмээний хялгасан хувцастай агаад бүсэлхийдээ суран бүстэй аж. Тэрээр царцаа, зэрлэг зөгийн бал иддэг байв.

⁷Тэр тунхаглахдаа —Харин Надаас илүү хүчирхэг Нэгэн миний араас ирж байна. Би бөхийж Түүний шаахайн үдээсийг ч тайлах үнэ хүндгүй.

⁸Би та нарт усаар баптисм хүртээсэн, харин Тэр та нарт Ариун Сүнсээр баптисм хүртээнэ гэв.

⁹Тэр өдрүүдэд Галилын Назар хотоос Есүс ирж, Иордан голд Иоханаас баптисм хүртжээ.

¹⁰Уснаас гарч ирсэн даруйд нь тэнгэр заагдан, Сүнс тагтаа мэт Өөр дээр нь буухыг Тэр үзэв.

¹¹Тэнгэрээс дуун гарч —Хайрт Хүү минь Чи билээ. Таалал минь Чамд оршдог гэв.

¹²Тэр даруй Сүнс Есүсийг цөл уруу гаргав.

¹³Есүс Сатанд сориулан цөлд дөч хоног байв. Тэнд Тэр зэрлэг амьтдын дунд байсан бөгөөд тэнгэрэлч нар Түүнд үйлчилж байлаа.

¹⁴Иоханыг баривчлагдсаны дараа Есүс Галилд ирж, Бурханы сайнмэдээг тунхаглан —

¹⁵Тэр цаг биелэлээ оллоо. Бурханы хаанчлал айсуй. Гэмшиж, сайнмэдээнд итгэгтүн гэж байлаа.

¹⁶Есүс Галил нуурын эргээр явж байхдаа, нуурт тор шидэж буй Симон, түүний дүү Андрей нарыг харав. Тэд загасчид аж.

¹⁷Есүс тэдэнд —Намайг дага. Би та нарыг хүмүүсийн загасчид болгоно гэлээ.

¹⁸Тэд тэр даруй тороо орхиж, Түүнийг дагалаа.

¹⁹Тэр жаахан цааш яваад Зебедеен хүү Иаков, түүний дүү Иохан нарыг завин дотроо тороо сэлбэж буйг харав.

²⁰Тэр даруй Есүс тэднийг дуудсанд тэд эцэг Зебедеегээ хөлсний ажилчдын хамт завинд орхиод, Түүнийг дагалаа.

²¹Тэд Капернаумд ирэв. Амралтын өдөр Есүс даруй синагогт орж заав.

²²Хүмүүс сургаалыг нь гайхаж байлаа. Учир нь Есүс хуулийн багш нар шиг бус, эрх мэдэлтэй Нэгэний хувьд тэдэнд зааж байв.

²³Тэр үед тэдний синагогт бузар сүнстэй нэгэн хүн байв. Тэр хашхиран —

²⁴Назарын Есүс ээ! Бид Танд ямар хамаатай билээ? Та биднийг устгахаар ирэв үү? Таны хэн болохыг, Бурханы Ариун Нэгэн гэдгийг би мэднэ гэв.

²⁵Есүс түүнийг зандарч —Дуугүй бай. Түүнээс гар гэв.

²⁶Бузар сүнс тэр хүнийг унагаж татвалзуулаад, чанга дуугаар орилон түүнээс гарав.

²⁷Бүгд гайхаж, өөр хоорондоо асуун —Энэ чинь юу вэ? Эрх мэдэлтэй шинэ сургаал байна! Тэр бузар сүнснүүдэд эрх мэдлээр тушаахад тэд Түүнд дуулгавартай байна гэж байлаа.

²⁸Түүний тухай зар тэр даруй Галил орчмын бүх нутгаар тархжээ.

²⁹Синагогаас гарч ирсэн даруйдаа тэд Иаков Иохан нарын хамт Симон Андрей хоёрын гэрт очив.

³⁰Симоны хадам эх халуураад хэвтэж байлаа. Тэд Есүст даруй түүний тухай хэлэхэд

³¹Тэр түүн уруу очиж гараас нь барин босгомогц халуун нь арилж, тэр эмэгтэй босоод тэдэнд үйлчлэв.

³²Тэр орой нар жаргах үеэр тэд өвчтэй ба чөтгөр шүглэсэн олон хүнийг Түүнд авчрав.

³³Хотынхон бүгдээрээ үүдэнд нь цугласан байлаа.

³⁴Есүс төрөл бүрийн өвчтэй олон хүнийг эдгээсэн бөгөөд олон чөтгөрийг зайлуулахдаа, юм ярихыг чөтгөрүүдэд эс зөвшөөрөв. Учир нь Түүнийг хэн гэдгийг тэд мэдэж байсан юм.

³⁵Үүр шөнөөр Тэр босоод гадагш гарч зэлүүд газар очин, тэндээ залбирч байв.

³⁶Симон болон хамт байгсад нь Түүнийг хайж,

³⁷олоод —Бүгд Таныг эрж байна гэхэд

³⁸Есүс —Цөмөөрөө зэргэлдээх суурингуудад очицгооё. Би тэнд ч бас тунхаглах болно. Учир нь Би үүний төлөө ирсэн билээ гэж айлдав.

³⁹Есүс, Галил даяар явахдаа синагогуудад нь очиж тунхаглан, чөтгөрүүдийг зайлуулж байлаа.

⁴⁰Уяман өвчтөн Түүн дээр ирээд, өмнө нь сөгдөж —Та хүсвэл намайг цэвэр болгож[3] чадна шүү дээ гэж гуйхад

⁴¹Тэр өрөвдөн[4] гараа сунгаж түүнд хүрээд —Би хүсэж байна. Цэвэрш гэхэд

⁴²тэр даруй уяман өвчин нь түүнээс зайлж, тэрээр цэвэршжээ.

⁴³Есүс түүнд хатуу сануулаад, даруй түүнийг явуулав.

⁴⁴Тэр түүнд —Хэнд ч бүү ярь! Харин явж, өөрийгөө тахилчид үзүүл. Тэдэнд гэрчлэхийн тулд цэвэршсэнийхээ төлөө Мосегийн тогтоосон өргөлийг өргө гэж айлдав.

⁴⁵Гэтэл тэр гараад болсон бүхнийг зарлаж эхэлсэн ба үүнээс болоод Есүс хотод ил явах боломжгүй болж, зэлүүд газраар байх болов. Тэд зүг бүрээс Түүнийг зорин ирсээр байлаа.