Read Ariun Bible 2013 – Ариун Библи 2013 Марк 15 Bible Online

Марк 15 - Ariun Bible 2013 – Ариун Библи 2013 bible

Марк 15

¹Өглөө болмогц ахлах тахилч нар, ахлагчид, хуулийн багш нар бүх Зөвлөлийн хамт зөвлөлдөөд, Есүсийг хүлж аваачин Пилатад өгөв.

²Пилат, Есүсээс —Та иудейчүүдийн Хаан юм уу? гэж асуусанд Есүс хариуд нь —Та ч хэлж байна гэв.

³Ахлах тахилч нар Есүсийг олон зүйлд буруутгав.

⁴Пилат Түүнээс дахин асууж, —Та юу ч хариулахгүй юу? Тэд ямар олон зүйл Таны эсрэг тулгаж байгааг хараач гэв.

⁵Гэвч Есүс юу ч хариулсангүйд Пилат гайхав.

⁶Баяраар тэдний хүссэнчлэн нэг хоригдлыг сулладаг байлаа.

⁷Бослогын үеэр хүн алаад хоригдсон үймээн дэгдээгчдийн дунд Бараб гэгч эр байв.

⁸Хурсан олон ирж, өөрсдөд нь хийж заншсаныг Пилатаас гуйж эхлэв.

⁹Пилат тэдэнд —Иудейчүүдийн Хааныг та нарт суллаж өгөхийг надаас хүсэж байна уу? гэв.

¹⁰Учир нь ахлах тахилчид атаархсандаа Есүсийг барьж өгснийг тэр мэдэж байлаа.

¹¹Гэвч ахлах тахилч нар Барабыг оронд нь сулла гэж гуй хэмээн хурсан олныг ятгав.

¹²Тиймд Пилат тэдэнд дахин —Тэгвэл та нарын иудейчүүдийн Хаан гэж [нэрлээд байгаа] Хүнийг надаар яалгамаар байна вэ? гэхэд

¹³тэд —Түүнийг цовдол гэж хашхиралдлаа.

¹⁴Харин Пилат —Яагаад? Тэр ямар муу юм үйлдсэн юм бэ? гэж асуухад тэд —Түүнийг цовдол гэж улам ихээр хашхирч байлаа.

¹⁵Тэгэхэд Пилат хурсан олонд нийцүүлэхийг хүсэж, Барабыг тэдэнд суллан, Есүсийг ташуурдуулаад, цовдлуулахаар өгчээ.

¹⁶Тэгээд цэргүүд Есүсийг ордны хашаанд (тэр нь Праеториум юм) аваачиж бас бүтэн анги цуглуулав.

¹⁷Тэд Есүст час улаан нөмрөг нөмөргөж, сундуугаар титэм сүлжээд Түүн дээр тавьж —

¹⁸Иудейчүүдийн Хаанд мэндчилье гэж дооглон

¹⁹толгойг нь хулсаар цохилж, өөдөөс нь нулимж, өвдөг сөхрөн Түүнд мөргөцгөөж байлаа.

²⁰Тэд Есүсийг дооглосны дараа, улаан нөмрөгийг нь тайлж хувцсыг нь өмсгөв. Тэгээд Түүнийг цовдлохоор гадагш авч явлаа.

²¹Хөдөөнөөс ирээд түүгээр өнгөрч явсан Курений Симоныг албадаж Түүний загалмайг үүрүүлэв. Тэр Александр, Руф хоёрын эцэг билээ.

²²Гавалын газар гэсэн утгатай Голгота хэмээх газар Түүнийг тэд авчирлаа.

²³Цэргүүд Есүст мирр хольсон дарсыг өгсөн боловч Тэр авсангүй.

²⁴Тэд Түүнийг цовдлоод, хэн юу авахаа шодож шавга хаяцгаан, хувцсыг нь хувааж авав.

²⁵Тэд Түүнийг цовдлоход гуравдугаар цаг байсан юм.

²⁶Ялынх нь пайзан дээр «Иудейчүүдийн Хаан» гэсэн бичээс байлаа.

²⁷Цэргүүд Есүстэй хамт хоёр дээрэмчнийг, нэгийг нь баруун, нөгөөг нь зүүн талд нь цовдлов.

²⁸[«Тэр хилэнцтэнүүдийн хамт тоологдсон» гэсэн Бичвэр биелэгдэв.][26]

²⁹Дэргэдүүр нь өнгөрөгсөд толгойгоо сэгсрэн Түүнийг доромжилж, —Өө! Сүмийг нурааж, гурав хоногийн дотор барьдаг Чи,

³⁰Өөрийгөө авраач! Наад загалмайнаас буугаач гэцгээж байлаа.

³¹Ахлах тахилчид ч хуулийн багш нарын хамт мөн адил элэглэн, өөр хоорондоо —Тэр бусдыг аварсан ч Өөрийгөө аварч чадахгүй.

³²Израилийн Хаан энэ Христ одоо загалмайнаас бууг, тэгвэл бид хараад итгэнэ гэж байв. Хамт цовдлогдогсод ч Түүнийг бас доромжилжээ.

³³Зургадугаар цагаас эхлээд нийт нутгийг харанхуй нөмөрч есдүгээр цаг хүрэв.

³⁴Есдүгээр цагт Есүс чанга дуугаар —Елой, Елой, лема сабахтани? (орчуулбал «Бурхан минь, Бурхан минь, юунд Та Намайг орхив?») гэж хашхирлаа.

³⁵Тэнд зогсогсдын зарим нь сонсоод, —Хараач, Тэр Елиаг дуудаж байна гэв.

³⁶Нэг нь гүйж, далайн хөвөнд цагаан цуу шингээгээд хулсны үзүүрт торгоон, Түүнд уулгахаар өгөнгөө, —Елиа Түүнийг буулгаж авахаар ирэх эсэхийг харцгаая гэв.

³⁷Есүс чанга дуу гаргаад, амьсгал хураав.

³⁸Сүмийн хөшиг дээрээсээ доош хоёр хуваагдан цуурлаа.

³⁹Түүний эсрэг талд зогсож байсан зуутын дарга Есүсийг амьсгаа хураахыг[27] хараад —Энэ үнэхээр Бурханы Хүү байжээ гэв.

⁴⁰Тэнд бас хэсэг эмэгтэйчүүд холоос харж байлаа. Тэдний дунд Магдалын Мариа болон жижиг Иаков, Иос хоёрын эх Мариа, Саломе нар байв.

⁴¹Тэд Есүсийг Галилд байхад нь дагаж, Түүнд үйлчилдэг байсан юм. Иерусалимд Түүнтэй хамт ирсэн өөр олон эмэгтэй тэнд байсан билээ.

⁴²Амралтын өдрийн урьдах бэлтгэлийн өдрийн орой болох үед,

⁴³Бурханы хаанчлалыг хүлээж байсан Ариматын Иосеф гэгч Зөвлөлийн хүндэт гишүүн ирэв. Тэр зориглон Пилатад бараалхаж, Есүсийн цогцсыг гуйхад

⁴⁴Пилат Есүсийг хэдийнээ үхсэнд гайхаж, зуутын захирагчийг дуудаад, Түүний аль хэдийнээ үхсэн эсэхийг асуужээ.

⁴⁵Зуутын захирагчаас энэ тухай баттай мэдээд, Пилат цогцсыг Иосефт өгөв.

⁴⁶Тэр маалинган даавуу худалдан авч, Түүнийг буулгаж даавуунд ороогоод, хаданд ухаж янзалсан булшинд тавив. Тэгээд нэгэн бул чулууг өнхрүүлж, булшны үүдийг тэр таглажээ.

⁴⁷Магдалын Мариа болон Иосын эх Мариа Түүний цогцсыг хаана тавихыг харжээ.