Read Ariun Bible 2013 – Ариун Библи 2013 Лук 1 Bible Online

Лук 1 - Ariun Bible 2013 – Ариун Библи 2013 bible

Лук 1

¹Бидний дунд биелсэн үйл явдлуудын тухай хүүрнэлийг олон хүн эмхтгэхийг хичээсэн билээ.

²Анхнаас нь нүдээр гэрчлэгчид хийгээд үгийн үйлчлэгч бологсдоос бидэнд уламжилсны адил

³би ч энэ бүгдийг эхнээс нь нягтлан судалсан тул танд дэс дараалан бичиж өгөх нь зүйтэй юм, эрхэм хүндэт Теофил минь!

⁴Таны заалгасан зүйлсийг бат үнэн гэдгийг үүгээр та мэдэх болно.

⁵Иудейн[1] хаан Херодын өдрүүдэд Абиагийн бүлгийн Захариа нэртэй нэгэн тахилч байжээ. Түүний эхнэр ч бас Аароны охидоос гаралтай бөгөөд түүнийг Елизабет гэдэг байв.

⁶Тэд хоёул, Эзэний бүх тушаал зааврыг өөгүй дагаж, Бурханы өмнө зөвт байлаа.

⁷Елизабет хүүсэр тул тэд үр хүүхэдгүй, бас тэд хоёул өтөлсөн байв.

⁸Захариа бүлгийнхээ ээлж ёсоор Бурханы өмнө тахилчийн албыг гүйцэтгэж байх зуур ийм явдал тохиожээ.

⁹Тахилчийн ёслолын заншлаар шодоход, Эзэний сүмд орж утлага уугиулах үүрэг түүнд ногдсон байна.

¹⁰Утлага уугиулах тэр цагт, цугларсан ард олон бүгд гадаа нь залбирцгааж байжээ.

¹¹Эзэний тэнгэрэлч утлагын тахилын ширээний баруун талд зогсож байгаа нь түүнд үзэгдэв.

¹²Захариа түүнийг хармагцаа сандарч, айжээ.

¹³Харин тэнгэрэлч түүнд —Захариа аа, бүү ай. Чиний гуйлт сонсогдсон бөгөөд эхнэр Елизабет чинь чамд хүү төрүүлнэ. Чи түүнд Иохан гэдэг нэр өгөх болно.

¹⁴Чи баяр жаргалтай болж, түүнийг төрөхөд олуул баярлана.

¹⁵Эзэний өмнө тэр агуу болох бөгөөд дарс ч, сархад ч ер амсахгүй, эхийнхээ хэвлийд байхын л тэр Ариун Сүнсээр дүүрсэн байх болно.

¹⁶Тэр, Израилийн хөвгүүдээс олныг Эзэн Бурханд нь эргүүлэх болно.

¹⁷Бас тэрээр Түүний өмнө Елиагийн сүнс ба хүч дор явж эцгүүдийн зүрхийг хүүхдүүд уруу нь, дуулгаваргүйчүүлийг зөвтийн мэргэн ухаанд эргүүлэн, Эзэний төлөө бэлтгэгдсэн ард олныг бэлэн болгох юм гэв.

¹⁸Захариа, тэнгэрэлчид —Би үүнийг юугаар мэдэх билээ? Би хөгшин хүн, эхнэр маань ч өтөлсөн гэхэд

¹⁹тэнгэрэлч хариуд нь түүнд —Би Бурханы өмнө зогсогч Габриел гэгч агаад энэхүү сайнмэдээг чамд тунхаглах мөн чамтай ярилцахаар илгээгдсэн юм.

²⁰Харагтун, цагтаа биелэх үгэнд минь чи итгээгүй учраас эдгээрийг тохиолдох өдрийг хүртэл чи хэлгүй болоод, ярьж чадахгүй гэлээ.

²¹Хүмүүс Захариаг хүлээн, түүнийг сүмд удсанд гайхацгааж байлаа.

²²Харин тэр гарч ирээд тэдэнтэй ярьж чадсангүй. Сүм дотор тэр үзэгдэл үзсэн юм байна гэж тэд ойлгожээ. Харин Захариа тэдэнд дохиж зангасаар байсан бөгөөд тийнхүү хэлгүй хэвээр хоцорчээ.

²³Тахилчийн алба гүйцэтгэх өдрүүд дуусахад тэр гэртээ харив.

²⁴Хэд хоногийн дараа эхнэр Елизабет нь жирэмслэн, таван сарын турш хүний нүдэнд үл өртөж —

²⁵Хүмүүсийн дунд буй шившгийг минь зайлуулахаар Эзэн намайг таалан харж, энэ өдрүүдэд үүнийг надад бүтээж өгсөн нь энэ ажээ гэв.

²⁶Габриел тэнгэрэлчийг Галилын Назар хот уруу зургадугаар сард Бурхан илгээсэн ажээ.

²⁷Давидын удмын Иосеф гэдэг хүнтэй сүй тавьсан онгон бүсгүйн гэрт Габриел хүрч ирлээ. Түүнийг Мариа гэдэг байв.

²⁸Орж ирээд тэнгэрэлч түүнд —Ивээгдэгч ээ, баярла! Эзэн чамтай хамт байна гэв.

²⁹Харин Мариа энэ үгэнд ихэд цочиж, энэ нь юун мэндчилгээ байж болох талаар эргэцүүлэв.

³⁰Тэнгэрэлч, түүнд —Мариа, бүү ай. Чи Бурханы тааллыг олжээ.

³¹Үзэгтүн, чи хэвлийдээ үртэй болж Хүү төрүүлнэ. Түүнийг чи Есүс гэж нэрлэх болно.

³²Тэр Хүү аугаа Нэгэн болох ба Хамгийн Дээдийн Хүү гэж дуудагдана. Эзэн Бурхан Түүнд өвөг Давидынх нь хаан ширээг өгөх болно.

³³Тэр Иаковын гэрийг үүрд хаанчлах бөгөөд хаанчлалд нь төгсгөл гэж үгүй гэсэнд

³⁴Мариа тэнгэрэлчид —Би онгон атал энэ нь яаж бүтэх билээ? гэхэд

³⁵тэнгэрэлч —Ариун Сүнс чам дээр ирж, Хамгийн Дээдийн хүч чамайг бүрхэнэ. Тиймээс төрөх Хүү нь Ариун Нэгэн байх бөгөөд Бурханы Хүү гэж дуудагдах болно.

³⁶Үзэгтүн, чиний садан Елизабет, хүүсэр гэгдэж байсан тэр эмэгтэй мөн өтөл насандаа хүүхэд олоод, одоо зургаан сартай.

³⁷Бурханд боломжгүй юм гэж нэг ч байхгүй гэж хэлэв.

³⁸Мариа —Эзэний шивэгчнийг харагтун. Хэлсэн үгсийн тань дагуу надад биелэх болтугай гэхэд нь тэнгэрэлч түүнийг орхин одлоо.

³⁹Тэр өдрүүдэд Мариа босоод уулархаг нутгийг зорин Иудагийн нэгэн хот уруу яаран явж,

⁴⁰Захариагийн гэрт орж Елизабеттай мэндлэв.

⁴¹Мариагийн мэндийг Елизабет сонсмогц хэвлий дэх хүүхэд нь хөдөлжээ. Елизабет Ариун Сүнсээр дүүрч,

⁴²чанга дуугаар хашхиран —Ерөөгдсөн нь олон эмэгтэйн дундаас чи билээ. Хэвлий дэх үр чинь ч ерөөгдсөн ажээ.

⁴³Яасан гэж Эзэний минь эх над дээр ирдэг билээ?

⁴⁴Харагтун, мэндийн дуу чинь чихэнд минь сонсогдмогц хэвлий дэх үр минь баярлан хөдлөв.

⁴⁵Эзэнээс өөрт нь айлдсан зүйл биелнэ гэдэгт итгэсэн тэр эмэгтэй чи ерөөлтэй еэ! хэмээв.

⁴⁶Мариа —Сэтгэл минь Эзэнийг дээдэлнэм,

⁴⁷Сүнс минь ч Аврагч Бурхандаа баяслаа.

⁴⁸Учир нь Тэрээр шивэгчнийхээ Дарууг олж харсан билээ. Харагтун, энэ цагаас хойш намайг Ерөөгдөгч гэж бүх үеийнхэн тооцно.

⁴⁹Учир нь Хүчит Нэгэн нь миний төлөө Агуу үйлсийг хийсэн билээ. Түүний нэр ариун билээ.

⁵⁰Өршөөл нь Түүнээс эмээгчдэд Үеэс үед байх болно.

⁵¹Хүчит үйлсийг мутраараа Тэр бүтээж, Зүрхнийхээ бодлуудад бардамнагчдыг Тэр тараасан билээ.

⁵²Удирдагчдыг сэнтийнээс нь буулган Даруу байгсдыг Тэр өргөмжлөв.

⁵³Өлссөн хүмүүсийг сайнаар бялхуулж, Баячуудыг гар хоосон буцаав.

⁵⁴Өөрийнхөө зарц Израильд Өршөөлөө бодож Тэр туслав.

⁵⁵Бидний эцэг өвгөдөд Абрахамд болон үр удамд нь Өнө айлдсанчлан үйлдсэн билээ.

⁵⁶Мариа, Елизабетын хамт гурван сар орчим байгаад, гэртээ буцлаа.

⁵⁷Елизабетын төрөх цаг нь болж, хүү төрүүлэв.

⁵⁸Эзэн түүнд өршөөлөө агуу ихээр үзүүлснийг хөршүүд нь болон садан төрлүүд нь дуулаад хамтдаа баярлаж байлаа.

⁵⁹Ингээд найм дахь өдөр нь тэд хүүхдийг хозлохоор[2] ирээд, хүүг эцгийнх нь нэрээр Захариа гэж нэрлэх гэхэд нь

⁶⁰түүний эх —Үгүй, тэр Иохан гэж дуудуулна гэв.

⁶¹Тэд түүнд —Төрөл садан дотор чинь ийм нэртэй хэн ч байхгүй шүү дээ гээд,

⁶²хүүг хэн гэж нэрлэхийг хүсэж байгааг эцгээс нь дохио зангаагаар асуусанд

⁶³Захариа самбар гуйж дээр нь «Түүний нэр нь Иохан» гэж бичихэд тэд бүгд гайхаж хоцров.

⁶⁴Тэр даруй түүний ам нээгдэн, хэл нь эвлээд Бурханыг магтан ярьж эхэлжээ.

⁶⁵Эргэн тойронд нь амьдрагсад бүгд айдаст автаж, Иудейн уулархаг нутаг даяар энэ бүхний тухай яриа болж байлаа.

⁶⁶Үүнийг сонссон бүхэн зүрхэндээ хадгалж —Энэ хүүхэд тэгвэл яах бол? гэцгээж байв. Эзэний мутар гарцаагүй түүний хамт байлаа.

⁶⁷Эцэг Захариа нь Ариун Сүнсээр дүүрч, эш үзүүлэн,

⁶⁸—Израилийн Бурхан Эзэн магтагдах болтугай! Учир нь Тэр бидэн дээр ирж, Ард түмнийхээ төлөө Золилтыг гүйцээсэн юм.

⁶⁹Бидний төлөө авралын эврийг Зарц Давидынхаа гэрт Тэр босгов.

⁷⁰Ариун эш үзүүлэгчдийнхээ амаар эртнээс нааш Айлдсанаараа Тэрээр үйлджээ.

⁷¹Энэ нь дайснуудаас маань болоод Биднийг үзэн ядагсдын гараас аврах аврал бөгөөд

⁷²Өршөөлийг эцэг өвгөдөд минь үзүүлж, Өөрийн ариун гэрээг дурсахын тулд юм.

⁷³Бидний эцэг Абрахамд тангарагласан тангараг нь тэр гэрээ юм.

⁷⁴Бид дайснуудын гараас аврагдаж Айдас түгшүүргүйгээр

⁷⁵Ариун ба зөвт байдалд Үүрд Түүний өмнө үйлчлэхийн тулд болой.

⁷⁶Хөвүүн, чи Хамгийн Дээд Нэгэний эш үзүүлэгч гэж дуудагдах нь Чи замыг нь бэлдэхээр Эзэний өмнө явж,

⁷⁷Нүглийнх нь уучлалаар авралын мэдлэгийг Ард түмэндээ өгөхийн тулд юм.

⁷⁸Ийн Бурханы маань нигүүлсэнгүй өршөөлөөр Дорнын гэгээ дээрээс бидэнд айлчлан ирэх нь

⁷⁹Харанхуй хийгээд үхлийн сүүдэрт суугсдын дээр гийж, Хөлийг маань амар тайвны замд чиглүүлэхийн тулд юм гэсэн хэмээв.

⁸⁰Хүүхэд өсөж, сүнсээр хүчирхэг болсон бөгөөд Израилийн өмнө гарч ирэх өдрөө хүртэл цөлд амьдрав.