Read Ariun Bible 2013 – Ариун Библи 2013 Дэд хууль 15 Bible Online

Дэд хууль 15 - Ariun Bible 2013 – Ариун Библи 2013 bible

Дэд хууль 15

¹Долоон жил тутамд жилийн эцсээр чи өр авлагаа цуцал.

²Өр авлага цуцлалтыг ингэж хийнэ. Зээлдүүлэгч хүн бүр хөршөөсөө авах авлагаа цуцлах ёстой. ЭЗЭНий авлага цуцлалт зарласан учир тэр хөршөөсөө эсвэл ах дүүсээсээ өрөө бүү нэх.

³Гаднын хүнээс өрөө нэхэж болно. Харин ах дүүсээсээ авах бүх өрийг гар чинь цуцлах ёстой.

⁴Бурхан ЭЗЭНий чинь чамд өв болгон эзэмшүүлэхээр өгч буй газар дээр ЭЗЭН чамайг өгөөмрөөр ивээх учир та нарын дунд ядуу хүн байхгүй болно.

⁵Өнөөдөр миний чамд даалган өгч байгаа энэ бүх тушаалыг сахин мөрдөхийн тулд чи гагцхүү ЭЗЭН Бурханыхаа дуу хоолойд дуулгавартай бай.

⁶ЭЗЭН Бурхан чинь чамд амласан ёсоороо чамайг ивээх үед чи олон үндэстнүүдэд зээлдүүлнэ, харин чи зээлж авахгүй. Чи олон үндэстнүүдийг захирна, харин чи тэдэнд захирагдахгүй.

⁷Хэрэв ЭЗЭН Бурханы чинь чамд өгч буй газар нутаг дээрх аль нэгэн хотод чиний ах дүүсийн дотор ядуу хүн байвал чи тэр ядуу ах дүүдээ хатуу зүрх бүү гарга, түүнээс гараа бүү тат.

⁸Харин чи түүнд гараа сунгаж, түүний гачигдаж буй аливаа хэрэгцээнд нь дуртайяа зээлүүл.

⁹Үл бүтэх бодол зүрхэндээ тээхээс болгоомжил! “Өр авлага цуцлах долоо дахь жил ойртлоо” гээд ядуу ах дүүгээ муухай харж, түүнд юу ч өгөхгүй байвал тэрээр ЭЗЭНд чиний эсрэг мэдүүлж, тэр нь чамд гэм нүгэл болно.

¹⁰Чи түүнд дуртайяа өгөх ёстой. Түүнд өгөхдөө харам зүрхтэй бүү бай. Тэгвэл ЭЗЭН Бурхан чинь чиний бүх ажил бүтээл, гарын чинь үйл бүхнийг ивээх болно.

¹¹Газар дэлхий дээр ядуу зүдүү хүн хэзээ ч тасрахгүй. Тиймээс би чамд “Өөрийнхөө газар нутаг дээрх гачигдаж буй ядуу зүдүү ах дүүстээ чи гараа сунгаж бай” гэж тушааж байна.

¹²Хэрэв чиний ах дүү болох еврей эр эсвэл еврей эм чамд худалдагдаад,[8] зургаан жил чамд зарцлагдсан бол чи түүнийг долоо дахь жилд нь чөлөөлж явуул.

¹³Чи түүнийг чөлөөлж явуулахдаа гар хоосон бүү явуул.

¹⁴Чи түүнд мал сүргээсээ, үтрэмээсээ, дарс шахуургаасаа өгөөмрөөр өг. ЭЗЭН Бурхан чинь чамайг юугаар ивээсэн, тэрнээсээ түүнд өг.

¹⁵Чи Египетийн нутагт боол байснаа, Бурхан ЭЗЭН чинь чамайг гаргаж авсныг санаж яв. Тиймээс би өнөөдөр чамд үүнийг тушааж байна.

¹⁶Гэвч хэрэв боол чинь чамд бас танай гэр бүлийнхэнд хайртай бөгөөд чамтай хамт байх нь илүү сайн гэж үзсэн тул чамд “Би танаас холдож явахгүй” гэвэл

¹⁷чи шөвөг аваад, түүний чихийг хаалганд нааж байгаад цоол. Тэгвэл тэр үүрд чиний зарц болно. Чи шивэгчиндээ ч мөн үүнчлэн үйлд.

¹⁸Зарц чинь чамд зургаан жилийн турш зарцлагдахдаа хөлсний хүнээс хоёр дахин[9] илүү байсан учраас чи түүнийг чөлөөлж явуулах нь хэцүү гэж бүү бод. Тэгвэл ЭЗЭН Бурхан чинь чиний хийх бүх зүйлд чамайг ивээнэ.

¹⁹Чи үхэр, хонин сүргийнхээ ууган эр төл бүрийг Бурхан ЭЗЭНдээ ариусган зориул. Чи үхрийнхээ ууган төлийг ажилд бүү зүтгүүл. Чи хониныхоо ууган төлийг бүү хярга.

²⁰Чи болон гэрийнхэн чинь ЭЗЭНий сонгож авах газарт жилээс жилд ЭЗЭН Бурханыхаа өмнө түүнийгээ идэх ёстой.

²¹Харин тэр нь доголон юмуу сохор эсвэл өөр ямар нэгэн согогтой муу байвал түүнийг ЭЗЭН Бурхандаа тахил болгон өргөж болохгүй.

²²Чи түүнийг хотынхоо дотор ид. Бузартсан ба цэвэр хүний аль нь ч түүнийг гөрөөс, бугын мах мэтээр ид.

²³Харин чи цусыг нь бүү ид. Цусыг нь газарт ус шиг асга.