Read Ariun Bible 2013 – Ариун Библи 2013 Дэд хууль 18 Bible Online

Дэд хууль 18 - Ariun Bible 2013 – Ариун Библи 2013 bible

Дэд хууль 18

¹Леви тахилчид болох бүх Леви овог нь Израилийн дунд хувь ч үгүй, өв ч үгүй болно. Тэд ЭЗЭНд өргөх галан тахил болон Түүний өвөөс идэх болно.

²Тэд ах дүү нарынхаа дунд өвгүй байна. Учир нь ЭЗЭН тэдэнд амласан ёсоороо Өөрөө өв нь байх юм.

³Ард түмнээс буюу үхэр эсвэл хониор нядлах тахилыг өргөдөг тэднээс тахилчдын авах хувь гэвэл, тахилчдад хаа, хоёр эрүү, гэдэс дотрыг өгөх ёстой.

⁴Чи түүнд үр тариа, шинэ дарс, тосныхоо дээж мөн хониныхоо ноосны дээжийг өгөх ёстой.

⁵ЭЗЭН Бурхан чинь танай бүх овгийн дундаас түүнийг мөн түүний хөвгүүдийг зогсоон ЭЗЭНий нэрээр үйлчлүүлэхийн тулд үүрд сонгожээ.

⁶Хэрэв Израилийн бүх нутаг дээрх аль нэг хотод амьдран суудаг леви хүн тэндээсээ явж, ЭЗЭНий сонгосон газарт сэтгэлийн хүслээр хүрч ирвэл

⁷ЭЗЭНий өмнө тэнд зогсож байгаа бүх леви ах дүүсийнхээ нэгэн адил тэрээр ЭЗЭН Бурханыхаа нэрээр үйлчлэх болно.

⁸Тэдний хоол хүнсний хувь нь адил байх бөгөөд эцгээс өвлөснөө худалдаж олсон нь ч түүнийх болой.

⁹ЭЗЭН Бурханы чинь чамд өгч байгаа тэр газарт чи хүрч очихдоо, тэндхийн үндэстнүүдийн жигшүүрт үйлсийг хийхэд бүү суралц.

¹⁰Та нар дунд хүү юмуу охиноо гал дундуур гаргагч, мэргэ төлгөч, совин тайлагч, ид шидтэн, илбэчин,

¹¹хараалч, сүнс зуучлагч, хар домч, үхэгсдийг дуудагч бүү байг.

¹²Эдгээрийг үйлдэгч хэн боловч ЭЗЭНд жигшүүртэй юм. Ийм жигшүүрт үйлээс болж ЭЗЭН Бурхан чинь тэднийг нүднээс чинь далд оруулна.

¹³Чи Бурхан ЭЗЭНийхээ өмнө гэм зэмгүй бай.

¹⁴Чиний байлдан эзлэх энэ үндэстнүүд совин тайлагч, мэргэ төлгөчдийг сонсдог. Харин чиний хувьд, ЭЗЭН Бурхан чинь тэгэхийг чамд зөвшөөрөхгүй.

¹⁵Миний адил эш үзүүлэгчийг ах дүү нарын чинь дундаас ЭЗЭН Бурхан чинь та нарын төлөө гаргаж ирнэ. Та нар түүнийг[11] сонсогтун.

¹⁶Хореб ууланд хуран чуулсан тэр өдөр ЭЗЭН Бурханаасаа та нар “ЭЗЭН Бурханы минь дуу хоолойг надад дахин бүү сонсгооч. Энэ их галыг надад дахин бүү харуулаач. Би үхэх нь ээ!” гэж хэлсэн бүхний чинь дагуу ингэсэн билээ.

¹⁷ЭЗЭН надад “Тэдний хэлсэн үг зөв байна.

¹⁸Би ах дүү нарынх нь дундаас чам шиг нэгэн эш үзүүлэгчийг гаргаж, Өөрийнхөө үгийг түүний аманд өгнө. Миний түүнд тушаах бүхнийг тэр[12] тэдэнд хэлнэ.

¹⁹Миний нэрээр ярих эш үзүүлэгчийн хэлэх үгийг сонсоогүй хэн бүхэн Миний шийтгэлийг хүлээх болно.

²⁰Харин Миний хэлэгтүн гэж тушаагаагүй үгийг Миний нэрээр дураараа ярих эсвэл өөр бурхдын нэрээр ярих эш үзүүлэгч байвал тэр эш үзүүлэгч үхэх болно” гэсэн.

²¹Та нар зүрхэндээ “ЭЗЭНий айлдаагүй үг гэдгийг бид яаж мэдэх билээ?” гэж бодох аваас

²²хэрэв эш үзүүлэгч ЭЗЭНий нэрээр ярьж, тэр зүйл нь болох ч үгүй, биелэх ч үгүй байвал тэр нь ЭЗЭНий айлдаагүй үг юм. Тэр эш үзүүлэгч үүнийг дураараа хэлсэн байх тул чи түүнээс бүү ай.