Read Ariun Bible 2013 – Ариун Библи 2013 Дэд хууль 19 Bible Online

Дэд хууль 19 - Ariun Bible 2013 – Ариун Библи 2013 bible

Дэд хууль 19

¹ЭЗЭН Бурхан чинь эдгээр үндэстнийг устгаад, ЭЗЭН Бурхан чинь газар нутгийг нь чамд өгөхөд чи тэднийг байлдан эзлээд, тэдний хот, орон байруудад нь амьдран суухдаа

²ЭЗЭН Бурханы чинь чамд эзэмшүүлэхээр өгч буй нутаг дунд өөрсдөдөө гурван хотыг тусгаарла.

³Чи өөртөө замууд засаж, ЭЗЭН Бурханаас чинь чамд эзэмшил болгон өгч буй нутаг дэвсгэрийг гурван хэсэгт хуваа. Тэгснээр алуурчин хүн тийшээ зугтан очиг.

⁴Тийшээ зугтан очиж амь мултарч болох алуурчны хэрэг ийм байх юм. Тэр хөршөө урьдын өс хонзонгоор биш, санамсаргүйгээр алсан тохиолдолд

⁵(тухайлбал хүн хөрштэйгөө хамт мод огтлохоор ойд очиж, мод унагахаар гартаа барьсан сүхээр цавчтал сүхний толгой нь ишнээсээ мулт үсрээд, хөршийг нь цохиж, өнөөх хүн үхвэл) тэрээр тэдгээр хотын аль нэгэнд зугтан очиж, амь мултарч болно.

⁶Хөршөө урьд өмнийн өс хонзонгоор алаагүй түүнийг алах нь зохисгүй атал цусан өшөө авагчийн уур хилэн нь буцалж, алуурчныг мөрдөн хөөгөөд зам нь урт тул түүнийг гүйцэж очоод алах вий.

⁷Тиймээс би чамд “Өөртөө гурван хотыг тусгаарлан ав” гэж тушааж байна.

⁸Хэрэв чиний ЭЗЭН Бурхан эцэг өвгөдөд чинь тангарагласан ёсоороо чиний нутгийн хилийг тэлж, эцэг өвгөдөд чинь өгөхөөр амласан бүх газрыг чамд өгвөл

⁹мөн чи Бурхан ЭЗЭНээ хайрлан, ямагт Түүний замаар явахын тулд өнөөдөр миний чамд тушааж байгаа энэ бүх тушаалыг даган биелүүлбэл энэ гурваас гадна өөр гурван хотыг нэмж ав.

¹⁰Энэ нь ЭЗЭН Бурханаас чинь чамд өв болгон өгч буй тэр газар дээр гэмгүй цусыг урсгахгүй бөгөөд өөртөө цусны бурууг үүрэхгүйн тулд юм.

¹¹Харин хүн хөршөө үзэн ядаж, түүнийг отож байгаад, дайран босож амийг нь цохин хөнөөснөөр нөгөө хүн нь үхээд, алуурчин тэдгээр хотын аль нэгэнд зугтан очвол

¹²тэр хотын ахмадууд хүн илгээж, түүнийг тэндээс бариад цусан өшөө авагчийнх нь гарт тушааж, түүнийг алуулах ёстой.

¹³Сайн сайхан явахын тулд чи түүнийг бүү өрөвдөн хар. Харин гэмгүй цус урсахыг Израилиас зайлуул.

¹⁴ЭЗЭН Бурханы чинь чамд эзэмшүүлэхээр өгч байгаа тэр газарт буюу чиний өвлөн авах газар дээр өвөг дээдсийн тогтоосон хөршүүдийнхөө шавыг бүү хөдөлгө.

¹⁵Ямар нэг хилэнц эсвэл нүгэл үйлдсэн хүний эсрэг ганцхан гэрчийг босгож болохгүй. Харин хоёр юмуу гурван гэрчийн амаар тэр хэргийг тогтоох ёстой.

¹⁶Хэрэв хүнийг хэрэгтэн хэмээн буруутгахаар хуурамч гэрч гарч ирвэл,

¹⁷маргалдаж байгаа хоёр хүн ЭЗЭНий өмнө, тэр өдрийнх нь тахилчид, шүүгчдийн өмнө зогсоно.

¹⁸Шүүгчид тэр хэргийг нягтлан шалгахад, харагтун, хэрэв гэрч нь хуурамч гэрч байгаад ах дүүгийнхээ эсрэг худал мэдүүлгэ өгсөн байвал

¹⁹ах дүүгийнхээ эсрэг хийх гэж төлөвлөснийг нь өөрт нь хийгтүн. Та нар дундаасаа ёрын мууг ийнхүү зайлуул.

²⁰Тэгвэл үлдсэн хүмүүс сонсоод айн эмээж, та нар дунд ийм ёрын муу хэрэг дахин үйлдэгдэхгүй болно.

²¹Түүнийг бүү өрөвдөн хар. Харин амийг амиар, нүдийг нүдээр, шүдийг шүдээр, гарыг гараар, хөлийг хөлөөр.