Read Ariun Bible 2013 – Ариун Библи 2013 Дэд хууль 20 Bible Online

Дэд хууль 20 - Ariun Bible 2013 – Ариун Библи 2013 bible

Дэд хууль 20

¹Чи дайсантайгаа тулалдахаар гараад, морьд, тэрэгт цэрэг, өөрийнхөөс чинь илүү олон хүнийг харвал тэднээс бүү ай. Учир нь чамайг Египет нутгаас авчирсан ЭЗЭН Бурхан чинь чамтай хамт байна.

²Та нарыг тулалдааны газар ойртох үед тахилч хүрч очоод, ард түмэнд хандан ярьж

³тэдэнд “Израиль аа, сонс! Өнөөдөр та нар дайсантайгаа тулалдахаар хүрч ирээд байна. Бүү зүрх алд, та нар тэднээс бүү ай, бүү чичир, бүү цочирд!

⁴Учир нь та нарын төлөө дайсантай чинь байлдахаар, та нарыг аврахаар та нартай хамт явагч нь Бурхан ЭЗЭН чинь юм” гэж хэлнэ.

⁵Түшмэд ард олонд “Шинэ байшин бариад, ёслолоо хийгээгүй хүн хэн байна вэ? Тэр хүн гэртээ буц. Тэрээр дайнд амиа алдаж, өөр хүн байшингийнх нь ёслолыг хийх вий.

⁶Усан үзмийн цэцэрлэг тариад, түүнээсээ амсаагүй хүн хэн байна вэ? Тэр хүн гэртээ буц. Тэрээр дайнд амиа алдаж, өөр хүн түүнээс нь идэх вий.

⁷Бүсгүй хүнтэй сүй тавьсан боловч түүнийгээ авч амжаагүй хүн хэн байна вэ? Тэр хүн гэртээ буц. Тэр дайнд амиа алдаж, өөр хүн түүнийг нь авах вий” гээд,

⁸үргэлжлүүлэн түшмэд ард олонтой ярьж тэдэнд “Аймхай, зүрхгүй хүн хэн байна вэ? Тэр хүн гэртээ буц. Тэрээр өөрийнхөө зүрх шиг, ах дүү нараа зүрх алдуулах вий” гэж хэлнэ.

⁹Түшмэд ард олонд ярьж дуусахад, ард олныг тэргүүлэх цэргийн дарга нарыг тэд томилох болно.

¹⁰Чи аль нэг хотыг дайран эзлэхээр ойртон очих үедээ, тэр хотынхонд амар тайвныг зарлан тунхагла.

¹¹Хэрэв тэр хот амар тайвны хариу өгч, чамд хаалгаа нээж өгвөл тэр хотын оршин суугч бүгд чамд албадан ажилчин ба зарц болно.

¹²Хэрэв тэр хотынхон чамд амар тайвны хариу эс илэрхийлж, чамайг эсэргүүцэн байлдвал чи тэр хотыг бүслэгтүн.

¹³ЭЗЭН Бурхан чинь тэр хотыг чиний гарт тушаах үед чи тэр хотын бүх эрчүүдийг илдний ирээр цавч.

¹⁴Харин эмэгтэйчүүд, хүүхдүүд, мал сүрэг болон хотын олз бүхнийг өөртөө ав. Бурхан ЭЗЭНий чинь чамд өгсөн, дайснуудаасаа олзолсон эд юмсыг чи эдэлж хэрэглэ.

¹⁵Дэргэдэх эдгээр үндэстнүүдэд хамаарахгүй өөрөөс чинь хол байгаа хотуудад чи үүнийг үйлдэгтүн.

¹⁶Харин ЭЗЭН Бурханаас чинь чамд өв болгон өгч буй эдгээр ард түмний хотуудаас амь амьсгалтай юуг ч бүү үлдээ.

¹⁷ЭЗЭН Бурхан чинь тушаасан ёсоор чи хит, амори, канаан, периз, хиви, иебусчуудыг хүйс тэмтэр.

¹⁸Эс тэгвэл тэд бурхдадаа үйлдсэн жигшүүрт бүхнээ та нарт зааж, та нараар ЭЗЭН Бурханд чинь нүгэл үйлдүүлэх болно.

¹⁹Та нар аль нэг хотыг эзлэхээр дайтан, удаан хугацаагаар бүслэх үед, сүхээ далайж тэндхийн моддыг бүү устга. Та нар тэр моддоос идэх учраас тэдгээрийг бүү цавчин унага. Талбайн модод чинь хүн юм уу? Та нар яахин түүнийг бүсэлнэ вэ?

²⁰Харин идэж болох жимстэй мод биш болохыг нь мэдэж байгаа моддыг устга. Тэгээд цавчин бэхлэлт хийж, та нартай байлдаж байгаа тэр хотынхныг ялагдах хүртэл нь хэрэглэ.