Read Ariun Bible 2013 – Ариун Библи 2013 Дэд хууль 25 Bible Online

Дэд хууль 25 - Ariun Bible 2013 – Ариун Библи 2013 bible

Дэд хууль 25

¹Хэрэв хүмүүс хоорондоо маргалдан шүүхэд ирвэл тэднийг шүүж, зөвтнийг нь зөвтгөж, буруутныг нь шийтгэх ёстой.

²Буруутанд жанчих шийтгэл ногдуулах нь зөв байвал шүүгч түүнийг өмнөө хэвтүүлээд хийсэн гэм буруугийнх нь хэрээр түүнийг ташуурдуулна.

³Түүнийг дөч хүртэл ташуурдаж болно, харин түүнээс хэтрүүлж болохгүй. Хэрэв чи үүнээс илүү ташуурдвал ах дүү чинь хэтэрхий дорд үзэгдэхэд хүрэх вий.

⁴Тариа цайруулж байгаа үхэрт хошуувч бүү хий.

⁵Ах дүүс цугтаа амьдарч байгаад нэг нь өөд болохдоо хөвгүүнгүй байвал, эхнэр нь гэр бүлийнхээ гадуурх гаднын хүнтэй гэрлэж болохгүй. Харин нөхрийн ах дүү нь түүн дээр орж, өөрийн эхнэр болгон авч, нөхрийн ах дүүгийн үүргийг түүнд гүйцэтгэх ёстой.

⁶Мөнөөх өөд болсон хүний нэрийг Израилиас алга болгохгүйн тулд тэр эмэгтэйн төрүүлэх ууган хүү нь түүний голомтыг залгамжлах ёстой.

⁷Харин хүн ах дүүгийнхээ эхнэрийг авах хүсэлгүй байвал ах дүүгийнх нь эхнэр хотын хаалган дээрх ахмадуудад очиж, “Миний нөхрийн ах дүү Израилийн дунд ах дүүгийнхээ нэрийг авч явахаас татгалзаж байна. Тэр надад нөхрийн ах дүүгийн үүргийг гүйцэтгэхгүй байна” гэж хэлнэ.

⁸Хотын ахмадууд түүнийг дуудан авчирч, ярилцахад тэрээр “Би түүнийг авах дургүй” гэж шийдвэртэйгээр хэлбэл

⁹ах дүүгийнх нь эхнэр ахмадуудын нүдэн дээр түүн уруу хүрч очоод, шаахайг нь хөлөөс нь мултлан авч, нүүр уруу нь нулиман хариу болгож “Ахынхаа гэрийг босгодоггүй хүнийг ингэвэл таарна” гэж хэлнэ.

¹⁰Тэгээд Израилийн дунд түүнийг “Шаахайгаа мултлуулсан хүний гэр бүл” гэж хочлох болно.

¹¹Хэрвээ хоёр хүн бие биентэйгээ зодолдож байхад нэгийнх нь эхнэр цохиж байгаа хүний гараас нөхрөө аврахаар ойртон очоод, гар сунган нөгөөгийнх нь бэлэг эрхтнээс барьж авбал

¹²чи тэр эмэгтэйн гарыг таст. Түүнийг бүү өрөвдөж хар.

¹³Чи халаасандаа том туухай болон жижиг туухай бүү хий.

¹⁴Чи гэртээ том хэмжүүр болон жижиг хэмжүүр байлгаж болохгүй.

¹⁵Чи бүрэн бүтэн, зөв туухайтай, бүрэн бүтэн, зөв хэмжүүртэй байх ёстой. Тэгвэл ЭЗЭН Бурханаас чинь чамд өгч буй газарт чи урт насална.

¹⁶Тийм зүйл хийдэг, шударга бусыг үйлддэг хэн боловч ЭЗЭН Бурханд чинь жигшүүртэй билээ.

¹⁷Египетээс гарч ирэхэд замд чинь Амалек чамд юу хийснийг санагтун.

¹⁸Тэд ЭЗЭН Бурханаас чинь эмээлгүй, та нарыг аян замдаа ядарч зүдэрч явахад чинь уулзаад, ард чинь яваа сул дорой хүмүүсийг цохисон билээ.

¹⁹Тиймээс ЭЗЭН Бурхан чинь чамд өв болгон эзэмшүүлэхээр өгч буй тэр газар нутаг дээр эргэн тойронд чинь байгаа бүх дайснаас чиний Бурхан ЭЗЭН чамайг ангижруулж, амраах тэр цагт чи Амалекийн тухай дурсамжийг тэнгэрийн доороос арчин хаях ёстой. Чи үүнийг бүү март!