Read Ariun Bible 2013 – Ариун Библи 2013 Иохан 18 Bible Online

Иохан 18 - Ariun Bible 2013 – Ариун Библи 2013 bible

Иохан 18

¹Есүс энэ үгсийг айлдаад, шавь нарынхаа хамт Кидроны гууг гатлан гарч, тэнд байдаг цэцэрлэгт шавь нартайгаа оров.

²Есүсийг барьж өгсөн Иудас ч мөн энэ газрыг мэддэг байжээ. Учир нь Есүс тэнд шавь нартайгаа олонтаа цугладаг байв.

³Тэгтэл Иудас цэргийн баг, ахлах тахилч нар болон фарисайчуудаас харуулуудыг нь дагуулж ирэв. Тэд дэнлүү, бамбар, зэвсэг барин хүрч ирлээ.

⁴Өөрт нь тулгарах бүгдийг мэдэж байсан Есүс урагш гарч тэднээс —Та нар хэнийг эрнэ вэ? гэв.

⁵Тэд Түүнд —Назарын Есүсийг гэж хариулахад, Есүс —Тэр чинь Би байгаа юм гэв. Түүнийг барьж өгсөн Иудас ч мөн тэдэнтэй хамт зогсож байлаа.

⁶Есүсийг тэдэнд “Тэр чинь Би байгаа юм” гэхэд тэд ухарч газар унацгаав.

⁷Есүс дахин —Та нар хэнийг эрнэ вэ? гэж асуусанд тэд —Назарын Есүсийг гэлээ.

⁸Есүс хариулан —Тэр чинь Би байна гэж Би та нарт хэлсэн. Та нар Намайг эрж байгаа бол эднийг явуул гэсэн нь

⁹“Таны Надад өгснүүдээс нэгийг нь ч Би алдаагүй” гэж Түүний айлдсан үг биелэгдэхийн тулд юм.

¹⁰Симон Петр илдээ сугалаад, тэргүүн тахилчийн зарцын баруун чихийг тас цавчжээ. Тэр зарцын нэрийг Малх гэдэг байв.

¹¹Тэгтэл Есүс, Петрт —Илдээ хуйнд нь хий. Эцэгийн Надад өгсөн аяганаас Би уухгүй гэж үү? гэв.

¹²Ингээд цэргүүд, мянгатын дарга болон иудейчүүдийн харуулууд Есүсийг барьж хүлээд,

¹³эхлээд Түүнийг Аннас дээр авч ирэв. Учир нь Аннас тэр жилийн тэргүүн тахилч Каиафын хадам эцэг байсан юм.

¹⁴Каиаф бол ард түмний төлөө нэг хүн үхэх нь дээр гэж иудейчүүдэд зөвлөсөн тэр хүн билээ.

¹⁵Симон Петр бас өөр нэг шавь нь Есүсийг дагав. Тэр шавь тэргүүн тахилчийг таньдаг тул хашаанд нь Есүсийн хамт оров.

¹⁶Харин Петр хаалганы гадаа үлдэв. Тэгтэл тэргүүн тахилчийн танил нөгөө шавь гарч ирээд, үүдний сахиултай ярилцаж Петрийг дотогш оруулав.

¹⁷Тэрхүү үүдний сахиул шивэгчин, Петрт —Чи энэ хүний шавь нарын нэг нь биш бил үү? гэхэд тэр —Би биш ээ гэв.

¹⁸Хүйтэн байсан тул зарц нар, харуулууд модны нүүрс түлж дулаацан зогсож байлаа. Петр ч мөн тэдний хамт тэнд зогсоод дулаацаж байв.

¹⁹Тэргүүн тахилч, Есүсээс шавь нарынх нь тухай мөн сургаалынх нь тухай шалгаав.

²⁰Есүс —Би ертөнцөд ил ярьсан. Би үргэлж бүх иудейчүүдийн цугладаг синагогт болон сүмд сургаал зааж байсан. Би нууцаар юу ч яриагүй.

²¹Та яагаад Надаас асууна вэ? Миний юу ярьсныг сонссон хүмүүсээс асуу. Харагтун, тэд юу ярьсныг минь мэднэ гэв.

²²Тэр ийн хэлтэл дэргэд нь зогсож байсан харуул Есүсийг алгадаж —Чи тэргүүн тахилчид ингэж хариулдаг юм уу? гэлээ.

²³Есүс түүнд —Би буруу ярьсан бол бурууг нь гэрчил. Зөв бол чи юунд Намайг цохино вэ? гэв.

²⁴Тэгээд Аннас Есүсийг хүлээтэйгээр нь тэргүүн тахилч Каиафт илгээв.

²⁵Симон Петр дулаацаад зогсож байтал тэд түүнд —Чи чинь Түүний шавь нарын нэг нь биш бил үү? гэсэнд тэр үгүйсгэн —Би биш гэв.

²⁶Тэргүүн тахилчийн зарц нарын нэг, Петрт чихээ цавчуулсан хүний хамаатан —Чамайг Түүнтэй хамт цэцэрлэгт байхыг чинь би хараагүй бил үү? гэж хэллээ.

²⁷Петр дахин үгүйсгэсэн тэр мөчид тахиа донгодов.

²⁸Тэд Есүсийг Каиафынхаас амбан захирагчийн ордонд аваачив. Тэгэхэд эрт байлаа. Тэд биеэ бузарлахгүй байж Алгасал баярын зоогийг идэхийн тулд, ордонд орсонгүй.

²⁹Тиймээс Пилат тэдэн дээр гарч очоод —Та нар энэ Хүнийг юу гэж буруутгаж байгаа юм бэ? гэхэд

³⁰тэд —Энэ Хүн ёр мууг үйлдэгч бишсэн бол бид Түүнийг танд тушаахгүй л байх байсан гэлээ.

³¹Тэгтэл Пилат —Түүнийг ав. Өөрсдийнхөө хуулиар Түүнийг шүүгтүн гэхэд иудейчүүд —Хүн цаазлахыг бидэнд зөвшөөрдөггүй шүү дээ гэцгээв.

³²Ямар үхлээр үхэхээ илэрхийлэн хэлж байсан Есүсийн үг биелэгдэхийн тулд тийн хэлжээ.

³³Пилат дахин ордондоо орж, Есүсийг дуудаад —Та иудейчүүдийн Хаан мөн үү? гэхэд

³⁴Есүс —Та үүнийг өөрөөсөө ярьж байна уу? Эсвэл өөр хүмүүс Миний тухай танд хэлэв үү? гэжээ.

³⁵Пилат —Би иудей хүн биш биз дээ? Танай үндэстэн болон ахлах тахилч нар л Таныг надад тушаасан юм. Та юу хийчихсэн юм бэ? гэж асуув.

³⁶Есүс —Миний хаанчлал бол энэ ертөнцийнх биш ээ. Хаанчлал минь энэ ертөнцийнх байсан бол Намайг иудейчүүдийн гарт өгөхгүйн тулд зарц нар минь тэмцэх байсан. Харин одоо Миний хаанчлал эндхийнх биш гэлээ.

³⁷Пилат Түүнд —Тэгэхлээр Та Хаан байх нь ээ? гэхэд Есүс хариуд нь —Намайг Хаан гэж та хэлж байна. Би үнэнийг гэрчлэхээр төрсөн бөгөөд үүний төлөө ертөнцөд ирсэн. Үнэний хүн бүр Миний дууг сонсоно гэж айлдлаа.

³⁸Пилат Түүнээс —Үнэн гэж юу вэ? гэв. Үүнийг хэлээд Тэр иудейчүүд уруу дахин очиж —Би Түүнээс ямар ч гэм бурууг олсонгүй.

³⁹Алгасал баяраар та нарын төлөө, нэг хүнийг суллах ёстой гэсэн заншил та нарт бий. Тиймээс иудейчүүдийн Хааныг та нарт суллаж өгөхийг надаас хүсэж байна уу? гэхэд

⁴⁰тэд дахин —Энэ хүнийг биш харин Барабыг гэж хашхиралдлаа. Бараб бол дээрэмчин ажээ.