Read Ariun Bible 2013 – Ариун Библи 2013 Үйлс 12 Bible Online

Үйлс 12 - Ariun Bible 2013 – Ариун Библи 2013 bible

Үйлс 12

¹Энэ үед Херод хаан[19] тэднийг хорлох зорилгоор чуулганаас заримыг нь баривчлав.

²Иоханы ах Иаковыг тэр цавчин алуулжээ.

³Иудейчүүдэд энэ нь таалагдсаныг ажигласан тэрээр Петрийг ч мөн баривчлахаар шийдэв. Энэ нь Исгээгүй талхны баярын өдрүүдэд болжээ.

⁴Тэгээд түүнийг баривчлан шоронд хийж, дөрвөн дөрөвтөөр мануулав. Алгасал баярын дараа Петрийг ард олны өмнө гаргах бодолтой байлаа.

⁵Петрийг шоронд хоригдож байхад чуулган Бурханд хандаж түүний төлөө тасралтгүй залбирч байв.

⁶Херод түүнийг гаргах гэж байсан яг тэр шөнө Петр хоёр цэргийн дунд давхар гинжээр гинжлээстэй унтаж байлаа. Хаалганы өмнөх харуулууд ч шоронг манаж байв.

⁷Үзэгтүн, Эзэний тэнгэрэлч ирж, шоронгийн өрөөнд гэрэл цацрав. Тэнгэрэлч Петрийг хажуу уруу нь ёврон сэрээж, —Түргэн бос гэхэд түүний гараас гинж нь мултарч уналаа.

⁸Тэнгэрэлч түүнд —Бүсээ бүсэлж, шаахайгаа уя гэхэд тэр үйлдэв. Тэгээд тэр —Нөмрөгөө нөмөр, намайг дага гэжээ.

⁹Петр гадагш гарч түүнийг дагав. Тэрээр тэнгэрэлчээр үйлдэгдэж буй нь бодитой гэдгийг мэдсэнгүй, харин үзэгдэл үзэж байна гэж бодсон аж.

¹⁰Тэд нэг, хоёр дахь харуулуудыг өнгөрөөд, хот уруу ордог төмөр хаалган дээр иртэл хаалга өөрөө нээгдэв. Тэд гарч, явсаар нэгэн гудамж өнгөрөхөд тэнгэрэлч гэнэт түүнийг орхин одов.

¹¹Петр сэхээ орж —Эзэн тэнгэрэлчээ илгээж, намайг Херодын гараас болон Иудейн ард түмний хүлээж байсан тэр бүхнээс аварчээ гэдгийг би одоо л баттай мэдлээ гэв.

¹²Ийнхүү ухаарсан тэр, Марк гэгдэх Иоханы эх Мариагийн гэрт ирэв. Тэнд олуулаа цуглаад залбирч байлаа.

¹³Петр даамангийн хаалгыг тогшиход Роде гэх зарц охин чагнахаар гарч ирээд,

¹⁴Петрийн дууг танин, баярласандаа дааман хаалгаа ч тайлалгүй дотогш гүйн орж, Петр дааман хаалган дээр байна гэж мэдэгджээ.

¹⁵Тэгтэл тэд түүнд —Чи өөрийн ухаантай байна уу? гэхэд харин ч охин тийнхүү ирсэн болохыг батлахад тэд —Тэгвэл түүний тэнгэрэлч байна гэцгээв.

¹⁶Харин Петр тогшсоор л байлаа. Тэд онгойлгоод түүнийг хармагцаа гайхан сүрджээ.

¹⁷Гэвч Петр тэдэнд чимээгүй байхыг гараараа дохиод Эзэн түүнийг шоронгоос хэрхэн гаргасныг ярьж —Энэ тухай Иаковт болон ах дүү нарт мэдэгд гээд өөр газар уруу одов.

¹⁸Өглөө болоход Петрийн яасан тухайд цэргүүдийн дунд багагүй сандрал болжээ.

¹⁹Түүнийг эрээд олоогүй Херод харуулуудыг байцаагаад, тэднийг цаазлахыг тушаалаа. Херод Иудейгээс Кайсарид очиж, тэндээ байв.

²⁰Херод, Тирийнхэн болон Сидоныхонд ихэд хилэгнэдэг байв. Тэндхийнхэн хааны нутгаас хоол хүнсээр хангагддаг байсан тул хааны түшмэл Бластыг талдаа татаж нэгэн санаагаар түүн уруу ирж найрамдахыг гуйжээ.

²¹Товлосон өдөр Херод сэнтийдээ хааны хувцастай заларч тэдэнд үг хэлж эхлэв.

²²Ард олон —Хүний дуу биш, бурхны дуу байна гэж хашхирч байлаа.

²³Бурханд алдрыг өргөөгүй тул түүнийг тэр даруй Эзэний тэнгэрэлч цохижээ. Тийнхүү тэр өт хорхойд идүүлж үхэв.

²⁴Харин Эзэний үг түгэн түгсээр байлаа.

²⁵Барнаб, Саул хоёр үйлчлэлээ дүүргээд Марк гэгддэг Иоханыг дагуулан Иерусалимаас[20] буцав.