Read Ariun Bible 2013 – Ариун Библи 2013 Үйлс 19 Bible Online

Үйлс 19 - Ariun Bible 2013 – Ариун Библи 2013 bible

Үйлс 19

¹Аполыг Коринтод байх үед Паул дээд нутгуудаар явсаар Ефест ирээд хэсэг дагалдагчдыг олж уулзав.

²Тэгээд тэдэнд —Та нар итгэхдээ Ариун Сүнсийг хүлээн авсан уу? гэхэд тэд түүнд —Үгүй. Ариун Сүнс байдгийг бид ер сонсоогүй юм байна гэв.

³Тэр —Тэгвэл та нар ямар баптисм хүртсэн юм бэ? гэхэд тэд —Иоханы баптисмыг гэжээ.

⁴Паул —“Миний араас ирж буй Нэгэн болох Есүст итгэгтүн” гэж хэлэн, Иохан гэмшлийн баптисм хүртээж байсан шүү дээ гэв.

⁵Үүнийг сонсоод тэд Эзэн Есүсийн нэрээр баптисм хүртэцгээв.

⁶Ийнхүү Паул тэдэн дээр гараа тавихад Ариун Сүнс тэдэн дээр ирж, тэд хэлээр ярьж, эш үзүүлжээ.

⁷Тэнд бүгд арван хоёр орчим хүн байв.

⁸Тэрээр синагогт орж, гурван сарын турш зоригтой ярин Бурханы хаанчлалын тухай сургамжлан ятгалаа.

⁹Харин зарим нь зөрүүдлэн эсэргүүцэж, цугласан олны өмнө энэхүү Замыг муучилж байв. Тэр тэднийг орхиж, дагалдагчдыг тусгаарлаад Туранны сургууль дээр өдөр бүр[29] сургамжлах болжээ.

¹⁰Ингэсээр Азид суурьшсан бүх иудей, грекүүд хоёр жил өнгөрөхөд Эзэний үгийг сонсоцгоожээ.

¹¹Паулын гараар Бурхан ер бусын гайхамшгуудыг үйлдэж байлаа.

¹²Түүний алчуур, бүсийг нь хүртэл биеэс нь салган авч яваад өвчтөнд хүргэхэд өвчин нь эдгэж, муу ёрын сүнснүүд зайлж байв.

¹³Гэвч мөн шившлэг хийдэг тэнүүлчин иудейчүүдийн зарим нь муу ёрын сүнстэй хүмүүст —Паулын тунхагладаг Есүсээр та нарыг би хөөж байна гэж Эзэн Есүсийн нэрийг ашиглахыг завджээ.

¹⁴Иудей ахлах тахилч Скюгийн долоон хөвгүүн үүнийг үйлдэж байв.

¹⁵Муу ёрын сүнс тэдэнд —Би Есүсийг танина. Паулыг ч мэднэ. Харин та нар хэн юм бэ? гэв.

¹⁶Тэгээд муу ёрын сүнстэй мөнөөх хүн тэдэн уруу ухасхийн дайрч мөнөөх хэдийг хүч түрэмгийлж, дийлэв. Нөгөө хэд ч гэмтэж шархдан тэр байрнаас нүцгэн шалдан гараад зугтжээ.

¹⁷Энэ явдал Ефест амьдардаг бүх иудей, грекүүдэд дуулдахад тэд бүгд айдаст автлаа. Эзэн Есүсийн нэр алдаршиж байлаа.

¹⁸Итгэгсдийн олонх нь ирж, үйлдэлээ улайж илчлэв.

¹⁹Ид шид үйлддэг байсан хүмүүсээс ихэнх нь номуудаа авчран овоолж, олны өмнө шатаажээ. Тэдгээр номын үнийг тэд тооцоолоход тавин мянган мөнгөн зоос[30] болжээ.

²⁰Ийн Эзэний үг үлэмж хүчтэйгээр тархан бэхэжсээр байлаа.

²¹Энэ бүхэн дууссаны дараа Паул Македони, Ахайг дайрч Иерусалим явъя гэж сүнсээр шийдэн,[31] «Тэнд хэсэг байгаад би Ромд очих ёстой» гэв.

²²Тэр өөрт нь тусалж байсан Тимот, Ераст хоёрыг Македони уруу илгээж, өөрөө Азид түр саатав.

²³Энэ үед Замаас болж багагүй үймээн гарлаа.

²⁴Мөнгөний дархан Деметр гэгч хүн Артемисийн мөнгөн сүмийг урлаж урчуудад багагүй орлого авчирдаг байв.

²⁵Деметр дархчуудыг цуглуулаад, тэдэнд —Хүмүүс ээ, бидний сайн сайхан байдал энэ ажлаас хамаардгийг та нар мэднэ.

²⁶Энэ Паул гэгч, гараар хийгдсэн нь бурхад биш гэж Ефес төдийгүй бараг бүх Азид ухуулж, олныг эргүүлснийг та нар харж, сонсож байгаа.

²⁷Үүнд бидний дарх муу нэртэй болох аюул байгаа төдийгүй бас их охинтэнгэр Артемисийн сүм юман чинээ тоогдолгүй, Ази болон дэлхийд шүтэгддэг бүгдийн сүр жавхлан буурах аюул байна гэжээ.

²⁸Үүнийг сонсоод тэд хилэгнэн уурлаж —Ефесийн Артемис бол агуу гээд л хашхирч гарав.

²⁹Хот үймээн самуунд автаж, Паултай ханьсан Македониос ирсэн Гаи, Аристарх нарыг хүмүүсийг санаа нийлэн чирсээр бөөнөөрөө үзвэрийн танхимд дайран орж ирэв.

³⁰Паул цугларагсдын дунд орохыг хүссэн хэдий ч дагалдагчид түүнийг явуулсангүй.

³¹Мөн Паулын анд болох Азийн хэсэг захирагчид хүн илгээн түүнийг үзвэрийн танхимд очихгүй байхыг ятгажээ.

³²Цугларсан олон будилж самуурсан байсан тул нэг хэсэг нь нэг зүйл хашхирч байхад нөгөө хэсэг нь ондоо зүйл хашхирч байлаа. Тэдний олонх нь юуны төлөө цугласнаа ч мэдэхгүй байлаа.

³³Тэгтэл иудейчүүд Александрыг олны өмнө урагш гаргахад хүмүүст чимээгээ намдахыг Александр гараараа дохиод олон түмний өмнө өөрсдийгөө өмгөөлөхийг хүсжээ.

³⁴Гэтэл хүмүүс түүнийг иудей гэдгийг таниад, бүгд нэгэн дуугаар —Ефесийн Артемис бол агуу хэмээн бараг хоёр цагийн турш хашхиралдав.

³⁵Хотын захирагч хурсан олныг тайвшруулаад —Ефесчүүд ээ, тэнгэрээс унасан дүр, агуу Артемисийн сүмийн сахиул нь Ефес хот мөн гэдгийг мэдэхгүй хэн байгаа юм бэ?

³⁶Иймээс энэ нь нэгэнт маргашгүй тул та нар гоомой юм үйлдэлгүй, тайван байх хэрэгтэй.

³⁷Та нарын авчирсан энэ хүмүүс сүмийг ч цөлмөөгүй, охинтэнгэрийг маань ч доромжлоогүй юм байна.

³⁸Тиймээс хэрэв Деметр болон урчууд нь хэн нэгний эсрэг гомдолтой байгаа бол шүүх хуралдаж болно. Мөн нутгийн захирагч ч байна. Тэд гомдолоо авч ирцгээг.

³⁹Хэрэв үүнээс өөр асуудал та нарт байгаа бол түүнийг чинь хуулийн дагуу хурлаар шийдвэрлэнэ.

⁴⁰Өнөөдрийн явдалтай холбоотой үймээн самуун дэгдээснийхээ төлөө бид буруутгагдах аюулд ороод байна. Учир нь үүнд үнэхээр шалтгаан байхгүй бөгөөд энэхүү эмх замбараагүй цуглааныг бид тайлбарлаж чадахгүй нь гэжээ.

⁴¹Ингэж хэлээд тэр цуглааныг тараасан аж.