Read Ariun Bible 2013 – Ариун Библи 2013 Үйлс 26 Bible Online

Үйлс 26 - Ariun Bible 2013 – Ариун Библи 2013 bible

Үйлс 26

¹Агрийп тэгтэл Паулд —Өөрийнхөө төлөө ярихыг чинь зөвшөөрч байна гэхэд Паул гараа өргөөд өөрийгөө өмгөөлөн —

²Намайг иудейчүүдийн буруутгаад байгаа бүхэнд Агрийп хаан таны өмнө өнөөдөр өмгөөлөх гэж байгаадаа өөрийгөө би ерөөлтэй хэмээн тооцож байна.

³Ялангуяа, та иудейчүүдийн ёс заншил, маргаантай асуудлын талаар сайн мэддэг. Тиймээс ч намайг тэвчээртэй сонсохыг танаас би хүсье.

⁴Өөрийн үндэстний дунд болон Иерусалимд анхнаасаа өнгөрүүлсэн миний амьдралыг бага наснаас минь авахуулан иудейчүүд цөм мэднэ.

⁵Тэд намайг анхнаас нь мэддэг болохоор хэрэв хүсвэл намайг манай шашны хамгийн чанд бүлэглэлийн фарисай ёсоор амьдарч байсныг гэрчилж чадах билээ.

⁶Харин би одоо манай эцэг өвгөдөд Бурханы өгсөн амлалтын найдвараас болж шүүгдэж байна.

⁷Энэ нь манай арван хоёр овог Бурханд өдөр шөнөгүй зүтгэн үйлчилж, хүртэхийг найддаг тэрхүү амлалт мөн. Хаантан, энэ найдварын төлөө иудейчүүд намайг буруутгаж байгаа юм.

⁸Хэрэв Бурхан үхэгсдийг амилуулдаг бол энэ нь яагаад та нарын дунд үнэмшмээргүй хэмээгдэнэ вэ?

⁹Би Назарын Есүсийн нэрийн эсрэг ихийг хийх ёстой гэж бодож байсан.

¹⁰Үүнийгээ ч Иерусалимд үйлдсэн. Би ахлах тахилч нараас эрх мэдэл аваад, ариун хүмүүсээс олныг нь шоронд хийснээр барахгүй тэднийг алж байхад нь ч саналаа нэгтгэн өргөж байлаа.

¹¹Бүх синагогт би тэднийг дахин дахин залхааж, Бурханыг доромжлуулахыг хүчээр оролдон, тэдэнд хилэгнэн уурласандаа бүр харийн хотуудад ч очиж тэднийг мөшгөн мөрдөж байв.

¹²Ийнхүү би ахлах тахилч нараас эрх мэдэл, үүрэг даалгавартайгаар Дамаск явлаа.

¹³Хаантан, тэгтэл үд дунд зам дээр нарнаас ч хурц гэрэл тэнгэрээс гэрэлтэж, намайг болон надтай хамт явагсдыг хүрээлэн авахыг би харсан.

¹⁴Бид бүгдээрээ газар хөсөр унахад еврей хэлээр “Саул аа, Саул аа, юунд чи Намайг хавчина вэ? Хатгуурын өөдөөс өшиглөх нь чамд бэрх байх вий” гэж надад хэлэхийг би сонсов.

¹⁵Тэгээд би “Эзэн, Та хэн бэ?” гэхэд Эзэн “Чиний хавчиж буй Есүс бол Би байгаа юм.

¹⁶Гэвч бос, хөл дээрээ зогс. Зөвхөн Намайг[38] олж харсны чинь төдийгүй мөн хожим чамд үзүүлэх зүйлсийн минь үйлчлэгч ба гэрчээр томилохын тулд Би чамд үзэгдлээ.

¹⁷Чамайг Би энэ ард түмэн, харийнхнаас чөлөөлөн аваад, тэдэнд илгээж байгаа нь

¹⁸тэдний нүдийг нээлгэж, тэднийг харанхуйгаас гэрэл өөд, Сатаны эрхшээлээс Бурхан өөд эргүүлэхийн тулд юм. Тэгснээрээ тэд Надад итгэх итгэлээр ариусгагдагсдын дунд нүглийн уучлал ба өв хүртэх болно” гэсэн.

¹⁹Агрийп хаантан, тиймээс би тэнгэрлэг үзэгдэлд дуулгаваргүй байж болсонгүй.

²⁰Харин эхлээд Дамаск болон Иерусалимд, дараа нь Иудейн бүх нутгаар тэрчлэн харийнханд хүртэл “Та нар гэмшиж, Бурхан өөд эргэн, гэмшилд дүйцэх үйлс бүтээгтүн” гэж тунхаглаж байлаа.

²¹Ийм шалтгаанаас иудейчүүд намайг сүм дотор барьж авч алахыг оролдсон.

²²Ийнхүү Бурханы тусламжийг хүртэн, би өдгөөг хүртэл их, багад гэрчилж зогсохдоо эш үзүүлэгчид болон Мосегийн хэлсэн нь биелэх ёстой гэдгээс өөр юуг ч ярьж байгаагүй.

²³Энэ бол Христ зовлон эдэлж, үхэгсдээс хамгийн түрүүн амилснаар ард түмэнд маань болон харийнханд гэрлийг тунхаглана гэсэн үг юм гэжээ.

²⁴Паулыг өөрийгөө өмгөөлөн ийнхүү ярьж байтал Фест чанга дуугаар —Паул, чи солиорчээ. Их эрдэм ном чинь чамайг галзуу болгожээ гэхэд

²⁵Паул —Эрхэмсэг Фест ээ, би солиороогүй. Харин эрүүл ухаан, үнэн үгийг тунхаглаж байна.

²⁶Учир нь хаан энэ зүйлийн талаар мэддэг бөгөөд би түүнтэй зориг гарган ярьдаг. Энэ нь хүнгүй буланд үйлдэгдээгүй тул аль нь ч түүний харааны гадна байхгүй гэдэгт би итгэж байна.

²⁷Агрийп хаан та эш үзүүлэгчдэд итгэдэг биз дээ? Итгэдгийг тань би мэдэж байна гэв.

²⁸Агрийп, Паулд —Чи ч намайг төдхөн ятгаж Христитгэгч болгох нь ээ гэхэд

²⁹Паул —Төдхөн ч бай, үгүй ч бай зөвхөн та ч биш, харин өнөөдөр энд намайг сонсогсод бүгд энэхүү хүлээснээс бусдаар надтай адил болоосой гэж би Бурханд залбирмаар байна гэв.

³⁰Хаан, захирагч мөн Бернике болон тэдэнтэй хамт сууж байгсад босож,

³¹холдон зогсоод өөр хоорондоо ярилцаж —Энэ хүн үхэх эсвэл хоригдвол зохих хэрэг үйлдээгүй юм байна гэцгээв.

³²Агрийп, Фестэд —Хэрэв энэ хүн Цезарьт давж заалдана гээгүй бол чөлөөлж болох л байжээ гэв.