Read Ariun Bible 2013 – Ариун Библи 2013 Үйлс 4 Bible Online

Үйлс 4 - Ariun Bible 2013 – Ариун Библи 2013 bible

Үйлс 4

¹Ийнхүү тэд ард олонтой ярьж байх зуур тахилч нар,[5] сүмийн харуулын дарга бас садукайчууд тэдэн дээр ирэв.

²Учир нь элч нар ард олонд сургаал зааж, үхэгсдийн амилал Есүсээр гэдгийг тунхаглаж байсан тул тэд ихэд төвөгшөөж байлаа.

³Тэд, тэднийг баривчилж, өглөө болтол шоронд хорив. Учир нь хэдийнээ орой болсон байжээ.

⁴Үгийг сонсогсдоос олноороо итгэсэн ба тоо нь таван мянга орчим болжээ.

⁵Дараачийнх нь өдөр захирагчид, ахлагчид мөн хуулийн багш нар Иерусалимд цугларцгаав.

⁶Тэнд тэргүүн тахилч Аннас бас Каиаф, Иохан, Александр болон тэргүүн тахилчийн удмынхан бүгд байлаа.

⁷Тэд нөгөө хэдийг голдоо зогсоогоод, —Ямар хүч, ямар нэрээр та нар үүнийг үйлдэнэ вэ? гэж байцаав.

⁸Энэ үед Петр Ариун Сүнсээр дүүрч тэдэнд —Ард түмний захирагчид болон ахлагч нар аа!

⁹Бид уг өвчтэй хүнд сайн үйл хийснийнхээ төлөө, тэр хэрхэн эдгэрсний тухайд өнөөдөр байцаагдаж байгаа бол,

¹⁰та нарын цовдолсон, үхэгсдээс Бурханы амилуулсан, Назарын Есүс Христийн нэрээр, энэ л нэрээр энэ хүн та нарын өмнө цоо эрүүл зогсож байгааг та бүхэн бас бүх израиль түмэн мэдтүгэй.

¹¹Тэр бол барилгачид та нарт гологдсон ч булангийн тулгуур чулуу болсон юм.

¹²Өөр хэний ч дотор аврал үгүй. Учир нь бид аврагдаж болох өөр нэр тэнгэрийн доор хүмүүнд эс өгөгдөв.

¹³Эрдэм номгүй, юм сураагүй Петр, Иохан хоёрын зоригтой байгааг тэд хараад гайхацгаан, Есүстэй хамт байсныг нь мэдэв.

¹⁴Эдгэрсэн хүн тэдэнтэй зогсож буйг хараад, тэдэнд эсэргүүцэн хэлэх юу ч байсангүй.

¹⁵Тэгээд тэднийг Зөвлөлөөс гарахыг тушаагаад өөр хоорондоо зөвлөлдөн —

¹⁶Энэ хүмүүсийг бид одоо яах вэ? Тэдний үйлдсэн илт гайхамшиг нь Иерусалимд суудаг бүхэнд нэгэнт тодорхой тул бид үгүйсгэж чадахгүй.

¹⁷Харин цаашид үүнийг ард олны дунд улам тархаахгүйн тулд энэ нэрээр дахин хэнтэй ч ярихгүй байхыг тэдэнд сануулъя гэцгээв.

¹⁸Ингээд тэднийг дуудаж, Есүсийн нэрээр огт ярьж, заахгүй байхыг тушаав.

¹⁹Гэвч Петр Иохан нар тэдэнд —Та нарыг Бурханаас илүү сонсох нь Бурханы өмнө зөв үү? Өөрсдөө шүүн тунгаагтун.

²⁰Учир нь бид үзсэн, сонссоноо ярихаа зогсоож чадахгүй гэжээ.

²¹Тэднийг шийтгэх ямар ч үндэслэл олоогүй, бас тохиолдсон зүйлийн улмаас ард олон бүгд Бурханыг алдаршуулсан тул дахин сүрдүүлээд тэр хоёрыг явууллаа.

²²Гайхамшгаар эдгэсэн тэрээр дөч гаран насны хүн байлаа.

²³Суллагдмагцаа тэд өөрсдийнхөн дээрээ ирж, ахлах тахилч нарын болон ахлагчдын хэлсэн бүхнийг уламжлав.

²⁴Тэд үүнийг сонсоод, Бурханд нэгэн санаагаар өндөр дуугаар өгүүлрүүн —Өө, Эзэнтэн! Тэнгэр, газар, тэнгис болон түүн доторх бүхнийг бүтээсэн нь Та билээ.

²⁵Та бидний өвөг, зарц Давидынхаа амаар дамжуулан Ариун Сүнсээр айлдахдаа, “Юунд харийнхан уурсаж, Ард түмнүүд дэмий зүйл сэднэ вэ?

²⁶Эзэн ба Түүний Христийн эсрэг Газар дэлхийн хаад сууцгааж, Захирагчид цугларцгаав” гэсэн.

²⁷Таны тосолсон, ариун зарц Есүсийн тань эсрэг Херод, Понти Пилат нар харийнхан болон израильчуудтай үнэхээр энэ хотод цугласан билээ.

²⁸Энэ нь Таны мутар ба урьдаас тогтоосон шийдвэр бүхэн тань биелэгдэхийн тулд билээ.

²⁹Одоо Эзэн, тэдний заналхийллийг хараач. Таны үгийг ярих зоригийг боолууддаа соёрхооч.

³⁰Таны ариун зарц Есүсийн нэрээр эдгээх гайхамшиг ба тэмдгүүдийг үйлдүүлэхийн тулд Та мутраа сунгаач гэв.

³¹Ийнхүү залбирч байтал тэдний цугларан байсан газар нь доргив. Тэд бүгд Ариун Сүнсээр дүүрч, Бурханы үгийг зоригтойгоор ярьцгаав.

³²Итгэсэн олон, нэг зүрх, сэтгэлтэй байсан ба тэдний хэн нь ч өөртөө байгаагаа минийх гэсэнгүй, харин тэдний бүх юм нийтийнх байв.

³³Элч нар Эзэн Есүсийн амилсныг агуу хүчээр гэрчилж байсан бөгөөд тэд бүгдийн дээр бялхам их нигүүлсэл байсан билээ.

³⁴Гачигдсан хүн тэдний дунд байсангүй. Учир нь газар, орон байр эзэмшигчид цөм түүнийгээ зараад, худалдсан өртгийг нь авчирч,

³⁵элч нарын хөлд тавихад, тэд хүн бүрд хэрэгцээнийх нь хэрээр хуваарилдаг байлаа.

³⁶Элч нарт Барнаб (орчуулбал «Тайвшралын хүү») гэж нэрлэгддэг, Кипрээс гаралтай Леви овгийн Иосеф

³⁷өмчилж байсан талбайгаа зараад, мөнгийг нь авчран элч нарын хөлд тавьжээ.