Read Ariun Bible 2013 – Ариун Библи 2013 1Коринт 7 Bible Online

1Коринт 7 - Ariun Bible 2013 – Ариун Библи 2013 bible

1Коринт 7

¹“Эм хүнд хүрэхгүй байх нь эр хүнд зүгээр” гэж та нарын бичсэн[4] асуудлын тухайд гэвэл:

²садарлахгүйн тулд эр хүн бүр эхнэртэй, эм хүн бүр нөхөртэй байг.

³Нөхөр нь эхнэртээ, эхнэр нь мөн нөхөртөө үүргээ биелүүлэг.

⁴Эхнэрийн биеийг мэдэх эрх мэдэл өөрт нь бус харин нөхөрт нь байна. Үүнчлэн нөхрийн биеийг мэдэх эрх мэдэл өөрт нь бус харин эхнэрт нь байна.

⁵Өөрсдийгөө залбиралд зориулахаар тохиролцсон цагаас бусад үед нэг нэгнээсээ бүү холд. Дараа нь дахин хамт бай. Та нарыг биеэ барьж тэвчихгүйгээр чинь Сатан бүү уруу татаг.

⁶Харин үүнийг би тушаал бус зөвшөөл болгон хэллээ.

⁷Бүх хүн над шиг байгаасай гэж би хүсдэг. Гэхдээ хүн бүрд өөрийнх нь бэлэг Бурханаас байдаг бөгөөд нэг нь ийм байхад нөгөө нь өөр байдаг.

⁸Гэрлээгүй болон бэлэвсэн хүмүүст над шиг байгаа хэвээрээ байвал тэдэнд сайн гэж би хэлдэг.

⁹Гэвч хэрэв тэд биеэ захирч чадахгүй бол гэрлэг. Учир нь шатаж байснаас гэрлэх нь дээр.

¹⁰Эхнэр нь нөхрөөсөө салж болохгүй гэж гэрлэсэн хүмүүст хандан надаас биш Эзэнээс тушааж байна.

¹¹(Хэрэв тэр салбал дахин гэрлэхгүй байг эсвэл нөхөртэйгөө эвлэрэг.) Нөхөр нь эхнэрээ хаяж болохгүй.

¹²Харин бусдад нь хандаж Эзэн биш, би хэлэхэд, ах дүү нарын нэг нь итгэгч биш эхнэртэй байгаад, тэр эмэгтэй өөртэй нь амьдрахыг хүсвэл тэр эмэгтэйг бүү хая.

¹³Хэрэв эмэгтэй нь итгэгч биш нөхөртэй байгаад, нөхөр нь өөртэй нь амьдрахыг хүсвэл нөхрөө бүү хая.

¹⁴Учир нь үл итгэгч нөхөр нь эхнэрээрээ ариусгагдсан байна. Үл итгэгч эхнэр нь итгэгч нөхрөөрөө ариусгагдсан байна. Тийм бишсэн бол та нарын хүүхдүүд бузар байх байсан. Харин одоо тэд ариун аж.

¹⁵Хэрэв үл итгэгч нэг нь салбал тэр салаг. Ах дүү болон эгч дүү нар ийм тохиолдолд боолчлол дор байхгүй. Харин ч Бурхан биднийг амар амгаланд дуудсан юм.

¹⁶Эхнэр ээ, чи нөхрөө аврах эсэхийг яаж мэднэ вэ?[5] Нөхөр өө, чи эхнэрээ аврах эсэхийг яаж мэднэ вэ?[6]

¹⁷Харин хүн бүр Эзэний хувааж өгснөөр, хүн бүрийг Бурхан дуудсанаар тэр яваг. Би бүх чуулганд ийнхүү зааварчилдаг.

¹⁸Хозлуулсныхаа дараа дуудагдсан уу? Тэр нь хозлуулснаараа байг. Хозлуулаагүй нь дуудагдсан уу? Тэр нь бүү хозлуул.

¹⁹Хозлол нь юу ч биш, хозлуулахгүй нь ч юу ч биш. Харин Бурханы тушаалуудыг сахих нь чухал юм.

²⁰Хүн бүр дуудагдсан дуудлагадаа байг.

²¹Чи боол байхдаа дуудагдсан уу? Үүндээ санаа бүү зов. Чи чөлөөлөгдөх боломжтой бол түүнийгээ ашигла.[7]

²²Учир нь боол байхдаа Эзэн дотор дуудагдсан нь Эзэний чөлөөлөгдсөн хүн мөн. Үүнтэй адил чөлөөтэй байхдаа дуудагдсан нь Христийн боол мөн.

²³Та нарыг үнэтэйгээр худалдан авсан юм. Хүмүүсийн боол бүү бологтун.

²⁴Ах дүү нар аа, хэн юун дотор дуудагдсан, түүн дотроо Бурхантай хамт үлд.

²⁵Онгон бүсгүйчүүдийн талаар Эзэний тушаал надад байхгүй. Харин Эзэний өршөөлөөр итгэмжит болсны хувьд саналаа хэлье.

²⁶Тэгэхлээр миний бодоход өнөөгийн зовлон гачаалын учир, байсан хэвээрээ байх нь хүмүүнд сайн аж.

²⁷Чи эхнэртэй холбогдсон уу? Салах гэж бүү оролд. Чи эхнэрээс салсан уу? Эхнэр бүү хай.

²⁸Гэхдээ чи гэрлэлээ ч гэсэн нүгэл үйлдээгүй хэрэг. Онгон бүсгүй гэрлэх аваас нүгэл үйлдээгүй хэрэг. Гэвч эд махбоддоо төвөгтэй болно. Би та нарыг гамнамаар байна.

²⁹Ах дүү нар аа, үүнийг би та нарт хэлье. Цаг хугацаа охор богино болжээ. Цаашдаа эхнэртэй нь эхнэргүй мэт,

³⁰уйлж буй нь уйлаагүй мэт, баярлаж буй нь баярлаагүй мэт, худалдан авч буй нь өмчлөөгүй мэт,

³¹энэ ертөнцийг ашиглаж буй нь бүрэн дүүрнээр ашиглаагүй мэт болох ёстой аж. Учир нь энэ ертөнцийн хэлбэр өнгөрөн одож байна.

³²Гэвч та нарыг санаа зоволгүй байхыг би хүсдэг. Гэрлээгүй нь Эзэнд яаж таалагдах вэ гэж Эзэний юмст санаа тавьдаг.

³³Харин гэрлэсэн нь эхнэртээ яаж таалагдах вэ гэж хорвоогийн юмст санаа тавьдаг бөгөөд

³⁴тэрээр хуваагдсан байдаг аж. Гэрлээгүй ба онгон бүсгүй нь бие болон сүнсээрээ ариун байхын тулд Эзэний юмст санаа тавьдаг. Харин гэрлэсэн эмэгтэй нь нөхөртөө яаж таалагдах вэ гэж хорвоогийн юмст санаа тавьдаг.

³⁵Би та нарыг боогдуулах гэсэндээ бус, харин та нарын тусын тулд зохистой байдлаар мөн сатааралгүйгээр Эзэнд үнэнч байхын чинь төлөө үүнийг хэлж байна.

³⁶Хэрэв хэн нэгэн нь онгон бүсгүйдээ зүй бус хандлаа гэж бодож байгаа бол, тэр бүсгүй нь насанд хүрсэн бөгөөд тийм байх ёстой юм бол тэр хүн хүссэнээ хийг. Тэр нүгэл үйлдээгүй. Тэд гэрлэг.

³⁷Харин хэн зүрхэндээ бат зогсож, үл шаардан хүсэлээ захирсан бөгөөд онгон бүсгүйгээ хэвээр нь байлгахаар[8] зүрхэндээ шийдсэн байна, тэрээр сайныг үйлдэж буй хэрэг.[9]

³⁸Тиймээс тэрээр гэрлэвэл сайн,[10] эс гэрлэвэл[11] бүр л сайн биз.

³⁹Эхнэр хүн нөхрөө амьд байхад нь түүнтэй холбогдсон байдаг. Нөхөр нь харин нойрсвол тэр эмэгтэй хүссэнтэйгээ гэрлэх эрх чөлөөтэй болно. Зөвхөн Эзэн дотор.

⁴⁰Харин миний саналаар тэр эмэгтэй байгаагаараа үлдвэл илүү ерөөлтэй. Надад ч бас Бурханы Сүнс буй гэж би боддог.