Read Ariun Bible 2013 – Ариун Библи 2013 2Коринт 13 Bible Online

2Коринт 13 - Ariun Bible 2013 – Ариун Библи 2013 bible

2Коринт 13

¹Би гурав дахь удаагаа та нар дээр очих гэж байна. Хоёр юмуу гурван гэрчийн амаар ямар ч үг батлагддаг.

²Хоёр дахь удаагаа та нар дээр очихдоо би урьдчилан сануулж хэлсэн. Урьд нь нүгэл үйлдсэн болон үлдсэн бүгдэд нь эдүгээ би урьдчилан хэлэхэд, би дахиж очвол та нарыг хэлтрүүлэхгүй.

³Та нар миний дотор Христ ярьдаг эсэх нотолгоог эрж байна. Тэр та нарын хувьд мөхөс бус, харин та нарын дотор хүчтэй юм.

⁴Учир нь Тэр мөхөсдөлөөс болж цовдлогдсон боловч Бурханы хүчээр амьд байна. Бид мөн Түүний дотор мөхөсдөвч та нарт хандсан Бурханы хүчээр Түүний хамт амьд байх болно.

⁵Та нар итгэлд байгаа эсэхээ шалга, өөрсдийгөө судал. Эсвэл Есүс Христ та нарын дотор байгааг та нар өөрсдөө мэддэггүй юм уу? Та нар үнэхээр шалгалтдаа унадаггүй л юм бол!

⁶Харин бид шалгалтдаа унадаггүйг та нар мэдэх болно гэдэгт би найдаж байна.

⁷Гэвч та нарыг бурууг бүү үйлдээсэй, ингэхдээ бидэнд үнэлэгдэхийн тулд бус, харин магадгүй бид ч адил чадаагүй тэр зөв зүйлсийг та нарыг үйлдээсэй хэмээн Бурханд бид залбирдаг юм.

⁸Бид үнэний эсрэг юу ч хийж чадахгүй. Харин үнэний төлөө бол чадна.

⁹Бид мөхөс, та нар хүчтэй байхад бид баярладаг. Та нарыг төгс болоосой гэж бид залбирдаг.

¹⁰Тиймээс би хол байхдаа энэ бүгдийг бичсэн нь та нар дээр очихдоо нураахын тулд бус байгуулахын тулд Эзэний өгсөн эрх мэдлийнхээ дагуу ширүүн дориун хандахгүй гэсэндээ юм.

¹¹Эцэст нь, ах дүү нар аа, баярлагтун. Цэгцэрцгээ. Ятгалгыг ав. Санаа нэгтэй байж, амар тайван амьдрагтун. Хайр ба амар тайвны Бурхан та нартай хамт байх болно.

¹²Ариун үнсэлтээр харилцан мэндчилээрэй.

¹³Ариун хүмүүс бүгд та нартай мэндчилж байна.

¹⁴Эзэн Есүс Христийн нигүүлсэл, Бурханы хайр, Ариун Сүнсний нөхөрлөл та бүгдтэй хамт байх болтугай.