Read Ariun Bible 2013 – Ариун Библи 2013 Филиппой 2 Bible Online

Филиппой 2 - Ariun Bible 2013 – Ариун Библи 2013 bible

Филиппой 2

¹Тиймээс Христ дотор ямар нэгэн зоригжуулал, хайрын тайвшрал, Сүнсний нөхөрлөл,[2] энэрэнгүй болоод өрөвч сэтгэл бий бол

²адил сэтгэж, адил хайртай байж, нэгдэн, нэгэн бодолтой байж, баярыг минь гүйцээ.

³Юуг ч аминч санаархал эсвэл ихэрхэг зангаар бүү хий. Харин даруугаар бие биенээ өөрөөсөө дээр гэж үзэж,

⁴хүн бүр өөрийн ашиг сонирхлыг бус, харин бусдын ашиг сонирхлыг хар.

⁵Өөр хоорондоо Христ Есүст байсан тийм бодолтой бай.

⁶Хэдийгээр Тэрээр Бурханы дүр байсан ч, Бурхантай тэгш байхыг[3] булаах гэсэнгүй,

⁷харин Өөрийгөө юу ч үгүй болгон Боолын дүрийг авч, хүнтэй адил болжээ.

⁸Хүн төрхийг олсон Тэрээр Өөрийгөө мөхөс болгож, Үхэлд, загалмайн үхэлд хүртэл дуулгавартай байв.

⁹Тиймээс ч Бурхан үлэмжийн дээдээр Түүнийг өргөмжилсөн бөгөөд Алив нэрээс дээд нэрийг Түүнд соёрхов.

¹⁰Энэ нь Есүсийн нэрд Тэнгэр, газар дээр, газрын доорх[4] бүгд өвдөг сөгдөж,

¹¹Бурхан Эцэгийн алдрын төлөө Есүс Христ бол Эзэн гэж Хэл бүхэн хүлээн зөвшөөрөхийн учир ажээ.

¹²Иймээс хайртууд минь, та нар үргэлж дуулгавартай байсныхаа адил, зөвхөн намайг байхад ч биш, харин эдүгээ байхгүй байхад минь бүр илүүгээр өөрсдийн авралыг айдас ба чичрэлээр гүйцээ.

¹³Учир нь Өөрийн сайн тааллын төлөө та нарын хүсэх, ажиллахын аль алинд нь та нарын дотор үйлдэгч нь Бурхан Өөрөө юм.

¹⁴Бүхнийг гомдол маргаан үгүйгээр хийцгээ.

¹⁵Ингэснээр та нар ертөнцийн гэрэл мэт гялалзан, гажууд үеийнхний дотор Бурханы өөгүй, буруугүй хүүхдүүд байх юм.

¹⁶Амийн үгээс баттай баривал би дэмий гүйж, дэмий зүдэж зүтгээгүй хэмээн Христийн өдөр сайрхах болно.

¹⁷Би тахил ба итгэлийн үйлчлэл дээр чинь ундаан өргөл болон асгагдсан ч баярлаж, та бүхэнтэй баярлан хөөрнө.

¹⁸Үүнчлэн та нар ч баярлаж, надтай баярлан хөөрөөрэй.

¹⁹Тимотыг та нар уруу удахгүй илгээнэ гэж би Эзэн Есүст найдаж байна. Тэгвэл байдлыг чинь мэдээд, би бас урамтай байх болно.

²⁰Та нарын төлөө үнэхээр санаа тавих адилхан санаатай хэн ч надад алга.

²¹Тэд бүгд Христ Есүсийнхийг бус, өөрсдийнхийг эрдэг.

²²Харин Тимот надтай хүү нь эцэгтээ үйлчилдэг шиг сайнмэдээнд үйлчлэн өөрийгөө нотолсныг та нар мэднэ.

²³Тиймээс байдлаа ажаад даруй түүнийг илгээнэ гэж би найдаж байна.

²⁴Би өөрөө мөн удахгүй очно гэж Эзэнд итгэж байна.

²⁵Харин миний дүү хийгээд хамтран зүтгэгч, хамт байлдагч, мөн та нарын элч, хэрэгцээнд минь үйлчилдэг Епафродитыг та нар уруу илгээх нь чухал гэж би бодлоо.

²⁶Тэр та бүгдийг үгүйлэн, өвчтэй буйг нь та нар сонссоноос болж шаналсан юм.

²⁷Тэр үнэхээр үхтлээ өвдсөн юм. Харин Бурхан түүнийг өршөөсөн. Зөвхөн түүнийг ч биш, уй гашуу дээр уй гашуу нэмэгдэх вий гэж намайг ч бас өршөөв.

²⁸Тиймд та нар Епафродитыг дахин хараад баярлаж, би бага зовнихын тулд түүнийг яаран илгээлээ.

²⁹Тиймээс түүнийг Эзэн дотор бүхий л баяр хөөрөөр хүлээн ав. Тийм хүмүүсийг хүндлээрэй.

³⁰Яагаад гэвэл тэрээр надад та нарыг нөхөн, эдгээр үйчлэлийг тохинуулахаар амь өрсөн явж Христийн ажлын төлөө үхэх шахсан.