Read Ariun Bible 2013 – Ариун Библи 2013 1Тесалоник 5 Bible Online

1Тесалоник 5 - Ariun Bible 2013 – Ариун Библи 2013 bible

1Тесалоник 5

¹Ах дүү нар аа, цаг хугацаа болон үеийн талаар та нарт бичих шаардлагагүй.

²Учир нь Эзэний өдөр нь шөнийн хулгайч мэт ирэхийг та нар өөрсдөө сайн мэднэ.

³“Амар амгалан, аюулгүй байдал” гэж ярьж байхад нь жирэмсэн эмэгтэйд төрөлтийн өвдөлт ирэх адил тэдэн дээр сүйрэл гэнэт ирэхэд тэд зугтааж огт чадахгүй.

⁴Гэвч ах дүү нар аа, та нар харанхуйд байдаггүй учраас тэр өдөр нь та нарыг хулгайч мэт бариад авахгүй.

⁵Учир нь та нар бүгд гэрлийн хөвгүүд, өдрийн хөвгүүд юм. Бид шөнийнх ч, харанхуйнх ч биш.

⁶Тиймээс бид бусдын адил унталгүй, харин сэргэг бөгөөд эрүүл ухаантай байцгаая.

⁷Учир нь унтагсад шөнө унтдаг, согтуурагчид шөнө согтдог.

⁸Харин бид өдрийнх тул итгэл ба хайрын хуяг, авралын найдварын дуулга өмсөн, эрүүл ухаантай байцгаая.

⁹Учир нь Бурхан биднийг уур хилэнд бус, харин бидний Эзэн Есүс Христээр аврал авахад зориулжээ.

¹⁰Бид сэрүүн ч бай, унтсан ч бай Өөртэй нь хамт амьд байхын тулд Тэр бидний өмнөөс үхсэн юм.

¹¹Тиймээс та нар үйлддэг шигээ л нэг нэгнээ тайтгаруулж, нэг нэгнээ барьж байгуулагтун.

¹²Ах дүү нар аа, дунд чинь зүдэн зүтгэдэг ба Эзэн дор та нарыг удирдаж, зааварладаг хүмүүсийг хүндэлж,

¹³ажлынх нь төлөө та нар хайраар тэднийг өндрөөр үнэлэхийг хүсэж байна. Өөр хоорондоо эв найртай бай.

¹⁴Ах дүү нар аа, зүгээр суугсдад зааварлаж, хулчгаруудыг зоригжуулж, доройд нь тусалж, бүгдэд тэвчээртэй хандахыг та нараас гуйж байна.

¹⁵Хэн ч хэн нэгний мууг муугаар хариулахгүй байхад анхаар. Харин үргэлж бие биендээ болон бүгдийн төлөө сайнд тэмүүл.

¹⁶Үргэлж баяртай бай.

¹⁷Тасралтгүй залбир.

¹⁸Бүх зүйлд талархалаа өргө. Учир нь энэ бол та нарын төлөөх Христ Есүс дэх Бурханы хүсэл мөн.

¹⁹Сүнсийг бүү бөхөө.

²⁰Эш үзүүллэгийг бүү басамжил.

²¹Харин бүхнийг шалга, сайнаас зуур.

²²Ёр муугийн алив хэлбэрийг цээрлэ.

²³Амар амгалангийн Бурхан Өөрөө та нарыг бүрэн ариусгатугай. Сүнс, сэтгэл, бие тань бүхлээрээ бидний Эзэн Есүс Христийг ирэхэд гэм зэмгүй хэвээр байх болтугай.

²⁴Та нарыг Дуудагч нь итгэмжит бөгөөд Тэр мөн үүнийг биелүүлэх болно.

²⁵Ах дүү нар аа, бидний төлөө ч залбир.

²⁶Бүх ах дүү нарт ариун үнсэлтээр мэндчилээрэй.

²⁷Энэ захидлыг бүх ах дүү нарт уншиж өгөхийг би та нараас Эзэнээр гуйж байна.

²⁸Эзэн Есүс Христийн маань нигүүлсэл та нартай хамт байх болтугай.