Read Ariun Bible 2013 – Ариун Библи 2013 Иошуа 11 Bible Online

Иошуа 11 - Ariun Bible 2013 – Ариун Библи 2013 bible

Иошуа 11

¹Хазорын хаан Иабин үүнийг сонсоод Мадоны хаан Иобаб мөн Шимрон ба Ахшафын хаанд,

²Хиннеротын өмнө талын Араба, өрнө зүгийн нам газрууд ба Дорын өндөрлөгт байгч хойд зүгийн уулархаг нутгийн хаадад буюу

³өрнө ба дорно зүгт байгч канаанчууд, мөн уулархаг нутгийн аморичууд, хитчүүд, перизчүүд, иебусчууд болон Мизпе нутгийн Хермоны хормойд орших хивичүүдэд хэл хүргүүлэв.

⁴Тэд өөрсдийн бүх цэрэг буюу далайн эргийн элс шиг тоо томшгүй хүн, их хэмжээний морьд ба тэрэгт цэрэгтэй хөдлөв.

⁵Тийнхүү эдгээр бүх хаад уулзан, Израилийн эсрэг дайтахаар Меромын усны хажууд ирж, хамтдаа буудаллав.

⁶ЭЗЭН, Иошуад —Тэднээс бүү айгтун. Учир нь маргааш өдийд Би Израилийн өмнө тэднийг бүгдийг нь үхдэл болгоно. Та нар тэдний морьдын шөрмөсийг тасалж, тэрэгнүүдийг нь галд шатаах болно гэлээ.

⁷Ийнхүү Иошуа дайчин эрсийн хамт Меромын усны дэргэд тэдний дээр гэнэт орж ирж, тэднийг довтлов.

⁸ЭЗЭН тэднийг Израилийн гарт өгч, Израиль тэднийг цохиж, агуу Сидон, Мисрефот-маим болон Мизпагийн хөндий хүртэл тэднийг дорно зүгт мөшгөн хөөж, зугтаалган алдалгүйгээр цохив.

⁹ЭЗЭН өөрт нь айлдсаныг Иошуа тэдэнд үйлдэж, морьдынх нь шөрмөсийг таслан, тэрэгнүүдийг нь галд шатаалаа.

¹⁰Тэр цагт Иошуа буцаж, Хазорыг эзлэн авч, хааныг нь илдээр цохив. Тэр үед Хазор эдгээр бүх хаанчлалын тэргүүн нь байв.

¹¹Тэд хот доторх амьтай бүгдийг устган, амьтай бүгдээс нэгийг нь ч үлдээлгүй илдний ирээр цохив. Хазорыг Иошуа галдан шатаав.

¹²Мөн Иошуа тэдгээр хаадын бүх хотыг хаадтай нь хамт эзлэн авч, тэднийг илдний ирээр цохин, ЭЗЭНий зарц Мосегийн тушаасанчлан хүйс тэмтрэв.

¹³Гэхдээ Иошуагийн шатаасан хот болох Хазораас бусад, толгод дээрх хотуудаас нэгийг нь ч Израиль шатаагаагүй юм.

¹⁴Израилийн хөвгүүд эдгээр хотуудын бүх олз хийгээд мал сүргийг өөрсдөдөө дээрэмдэн авлаа. Харин бүх хүнийг нь дуустал илдний ирээр цохижээ. Тэд амьтай нэг ч хүнийг эс үлдээв.

¹⁵ЭЗЭН өөрийн зарц Мосед тушаасны адил Мосе Иошуад тушааж, Иошуа ч ёсоор үйлдэв. Мосед ЭЗЭНий тушаасан бүхнээс Иошуа нэг ч зүйлийг хийлгүйгээр орхисонгүй.

¹⁶Ингээд Иошуагийн эзэлсэн бүх газар нутгийг тоочвол: уулархаг нутаг Негев, Гошены бүх нутаг, нам дор газар, Араба мөн Израилийн уулархаг нутаг болон нам дор газрууд,

¹⁷Сеир уруу өгссөн Халак уулаас авахуулаад Хермон уулын хормой дахь Ливаны хөндийн Баал-гад хүртэлх нутаг юм. Тэр мөн бүх хаадыг нь олзолж, тэднийг алав.

¹⁸Иошуа эдгээр бүх хаадтай урт хугацаагаар дайн хийв.

¹⁹Гибеоны оршин суугч хивичүүдээс өөр Израилийн хөвгүүдтэй энхийн гэрээ тогтоосон хот нэг ч байсангүй. Тэд бүх хотыг тулалдан авчээ.

²⁰Учир нь ЭЗЭН тэдний зүрхийг хатууруулаад, Израильтай дайтуулахаар ирүүлсэн нь Мосед ЭЗЭНий тушаасан ёсоор Израиль тэднийг ямар ч өршөөлгүйгээр, бүрмөсөн устгахын тулд байв.

²¹Тэр цагт Иошуа ирж, Хеброн, Дебир, Анаб, Иудагийн бүх уулархаг нутаг болон Израилийн бүх уулархаг нутгуудаас анакчуудыг таслан устгав. Иошуа тэднийг хотуудтай нь хамт бүрмөсөн устгасан билээ.

²²Израилийн хөвгүүдийн нутагт нэг ч анак үлдсэнгүй. Зөвхөн Газ, Гат болон Ашдодод зарим нь амьд үлджээ.

²³Тийнхүү Мосед ЭЗЭНий айлдсанчлан Иошуа бүхэл нутгийг аваад, үүнийгээ овгийн хуваарилалтынх нь дагуу Израильд өвлүүлэн өгөв. Ийнхүү тэр нутаг дайн дажнаас амсхийв.