Read Ariun Bible 2013 – Ариун Библи 2013 Иошуа 13 Bible Online

Иошуа 13 - Ariun Bible 2013 – Ариун Библи 2013 bible

Иошуа 13

¹Иошуа нас ахиж хөгшрөхөд ЭЗЭН түүнд —Чи нас ихэд өндөр болж хөгширчээ. Гэвч эзэмшилд авах маш их газар үлдсэн байна.

²Үлдсэн нутгууд гэвэл Филист болон Гешурын бүх бүс нутаг болох

³Египетийн зүүнтээх Шихор голоос хойд зүгийн Екроны нутгийн хил хүртэл (тэр нь канаанчуудынх гэж тооцогддог) бүх нутаг, газчууд, ашдодчууд, ашкелончууд, гитчүүд болон екрончууд хэмээгдэх филистчүүдийн таван ноёны газар нутаг буюу аввичуудын газар нутаг,

⁴өмнө зүгт канаанчуудын бүх нутаг болон аморичуудын хил нутаг дахь Афекийг хүртэлх сидончуудад харьяалагдах Меара,

⁵мөн гебалчуудын нутаг хийгээд Хермон уулын доорх Баал-гадаас Лебо-хаматыг хүртэлх, наран ургах зүгийн Ливан бүхэлдээ юм.

⁶Ливанаас авахуулаад Мисрефот-маим хүртэлх уулархаг нутгийн бүх оршин суугчид болох бүх сидончуудыг Би Израилийн хөвгүүдийн урдаас хөөн гаргах болно. Зөвхөн Миний чамд тушаасны дагуу энэ газрыг Израильд өв болгон шавга хаяж хуваарилагтун.

⁷Тэгэхээр одоо энэ нутгийг есөн овог болон Манассегийн хагас овогт өв болгон хуваа гэв.

⁸Манассегийн хагас овгийнхны хамт реубен болон гадынхан Иорданы зүүнтээд буюу нөгөө талд Мосегийн тэдэнд өгсөн өвийг хүлээн авсан билээ. ЭЗЭНий зарц Мосегийн тэдэнд өгсөн нутаг нь ийм болой.

⁹Энэ нь Арнон голын захад орших Ароер болон голын хөндийн дунд орших хотоос Дибоныг хүртэл Медебагийн бүх тал газар,

¹⁰мөн Хешбонд хаанчилж байсан аморичуудын хаан Сихоны бүх хотоос Аммоны хөвгүүдийн нутгийн хилийг хүртэл үргэлжилж байсан юм.

¹¹Мөн Гилеад, гешурчууд ба маакатчуудын нутаг дэвсгэр, Хермон уул бүхэлдээ бас Салекаг хүртэлх бүх Башаныг буюу

¹²Аштарот ба Едреид хаанчилж байсан Башан дахь Ог хааны (рефаимчуудаас үлдсэн хамгийн сүүлчийн хүн) бүхий л хаант улсыг багтааж байлаа. Мосе тэднийг цохиж, хөөн зайлуулсан юм.

¹³Гэвч Израилийн хөвгүүд гешурчууд болон маакатчуудыг хөөн гаргасангүй. Тиймээс ч Гешур болон Маакат нь израильчуудын дунд өнөөг хүртэл амьдарсаар байна.

¹⁴Зөвхөн Левийн овогт тэрбээр өв өгсөнгүй. ЭЗЭНий айлдсан ёсоор Израилийн Бурхан ЭЗЭНд өргөсөн галан тахилууд бол тэдний өв юм.

¹⁵Ийнхүү Мосе Реубений хөвгүүдийн овогт тэдний ургийн дагуу өвийг нь өгөв.

¹⁶Ингээд тэдний нутаг дэвсгэр нь Арнон голын захад орших Ароер мөн голын хөндийн дунд орших хот болон Медебагийн хажуудах бүх тал нутаг

¹⁷Хешбон ба тал нутаг дахь түүний бүх хот буюу Дибон, Бамот-баал, Бет-баал-меон,

¹⁸Иахаз, Кедемот, Мефаат,

¹⁹Кириатаим, Сибма ба хөндийн уулан дээрх Зерет-шахар,

²⁰Бет-пеор, Писгагийн хормой газар, Бет-иешимот зэрэг

²¹тал газрын бүх хот ба Хешбонд хаанчилж байсан аморичуудын хаан Сихоны бүх эзэнт улс байв. Мосе энэ хааныг уг нутагт амьдарч байсан Сихоны ноёд болох Мидианы удирдагчид Еви, Рекем, Зур, Хур, Реба нарын хамт бут цохив.

²²Израилийн хөвгүүд бусад алагдагсдын хамт Беорын хүү мэргэч Балаамыг ч бас илдээр цавчин алав.

²³Реубений хөвгүүдийн хил нь Иорданаар хязгаарлагдаж байлаа. Реубений хөвгүүдийн ургийн дагуух өв нь эдгээр хот тосгод байв.

²⁴Мосе мөн Гадын овог буюу Гадын хөвгүүдэд ургуудынх нь дагуу өвийг өгөв.

²⁵Тэдний нутаг дэвсгэр нь Иазер, Гилеадын бүх хот, мөн Раббагийн эсрэг тал дахь Ароерыг хүртэл Аммоны хөвгүүдийн нутгийн хагас,

²⁶мөн Хешбоноос Рамат-мизпа болон Бетонимыг хүртэл, Маханаимаас Дебирийн хил хүртэл,

²⁷мөн хөндийд Бет-харам, Бет-нимра, Суккот ба Зафон бас Хешбоны хаан Сихоны хаант улсын Иорданаар хязгаарлагдан үлдсэн хэсгээс Иорданы нөгөө тал буюу зүүн талд Хиннеретийн тэнгис хүртэлх нутаг байлаа.

²⁸Гадын хөвгүүдийн ургийн дагуух өв нь эдгээр хот болон тэдний тосгод байв.

²⁹Мосе бас Манассегийн овгийн хагаст буюу Манассегийн хөвгүүдийн овгийн хагаст, ургуудынх нь дагуу өгөв.

³⁰Тэдний нутаг дэвсгэр нь Маханаимаас бүх Башаныг оруулаад Башаны хаан Огийн эзэнт улс бүхэлдээ болон Башан дахь Иаирын бүх нүүдлийн тосгод, нийтдээ жаран хот тосгодыг хамарсан байв.

³¹Гилеадын хагас, мөн Башан дахь Огийн хаант улсын хотууд болох Аштарот Едреи зэрэг нь Манассегийн хүү Махирын хөвгүүдийн хагаст тэдний ургийнхны дагуу өгөгдсөн байв.

³²Иорданы цаад талд Иерихогийн зүүнтээд Моабын талд Мосе байхдаа эдгээр нутгийг өв болгон хуваасан юм.

³³Харин Мосе, Леви овогт ямар ч нутгийг өв болгон өгсөнгүй. Түүний амласны дагуу тэдний өв нь Израилийн Бурхан ЭЗЭН Өөрөө байлаа.