Read Ariun Bible 2013 – Ариун Библи 2013 Иошуа 18 Bible Online

Иошуа 18 - Ariun Bible 2013 – Ариун Библи 2013 bible

Иошуа 18

¹Ингээд Израилийн хөвгүүдийн даяар хотол түмэн Шилод цуглан, тэнд Хурлын майхан босгов. Уг нутаг тэдний захиргаанд байв.

²Израилийн хөвгүүдийн дунд өв залгамжлалаа хүлээн аваагүй долоон овог үлдсэн байлаа.

³Иймээс Иошуа Израилийн хөвгүүдэд —Эцэг өвгөдийн тань Бурхан ЭЗЭНий та нарт өгсөн газар нутгийг дайлж эзэмшихээр явалгүй та нар хэчнээн лазагнах гэсэн юм бэ?

⁴Овог бүр дундаасаа гурав гурван хүнийг томил. Газар газрыг нь тодорхойлон бичүүлэхийн тулд би тэднийг явуулна. Тэд босож, уг нутгаар явж, тусбүрийн өв залгамжлалын газрыг дүрслэн бичээд над дээр буцаж ирэх учиртай.

⁵Тэдгээр нутгийг долоон хэсэгт хуваа. Иуда өмнө зүгт өөрийн нутагтаа үлдэх бөгөөд Иосефын гэр хойд зүгт өөрийн нутагтаа хэвээр үлдэх ёстой.

⁶Та нар уг нутгийг долоон талаар тодорхойлон бичиж, дараа нь түүнийгээ надад авчир. Бидний Бурхан ЭЗЭНий өмнө би та нарын төлөө энд шавга[9] орхих болно.

⁷Харин левичүүдэд та нарын дундаас ямар ч ногдох хэсэг байхгүй учир нь ЭЗЭНий тахилчийн үйлчлэл бол тэдний өв юм. Гад, Реубен болон Манассегийн хагас овог ч Иорданы зүүнтээд өөрсдийн өвийг авсан. ЭЗЭНий зарц Мосе үүнийг тэдэнд өгсөн юм гэв.

⁸Ингээд нутгийг тодорхойлон бичихээр хүмүүс босож явав. Иошуа тэдэнд —Нутаг даяар явж, түүнийг тодорхойлон бичээд, над уруу эргэж ир. Тэгэхэд би энд ЭЗЭНий өмнө Шилод та нарт зориулан шавга орхих болно гэж тушаав.

⁹Тийнхүү хүмүүс уг нутгаар явж, түүний талаар хот хотоор нь, долоон хэсэг тусбүрээр номд тодорхойлж бичив. Тэд тэгээд Шило дахь хүрээ буудалд, Иошуа дээр эргэн ирлээ.

¹⁰Иошуа тэдэнд зориулан Шилод ЭЗЭНий өмнө шавга орхисон ба тэнд Иошуа уг нутгийг овог овгийнх нь хуваарилалтын дагуу Израилийн хөвгүүдэд хуваав.

¹¹Бениамины хөвгүүдийн овогт ургуудынх нь дагуу шавга буулаа. Тэдэнд шавгаар ногдсон нутаг нь Иуда болон Иосефын хөвгүүдийн овгийн нутгийн завсарт байв.

¹²Тэдний хилийн шугам нь хойд талаараа Иорданаас эхэлж, Иерихогийн хойд тал уруу өгсөж гараад, баруун зүгт уулархаг нутгийг дамжин өгсөж, Бет-Авены цөлд ирэн төгсөж байв.

¹³Энэ нь улмаар Луз хүртэл (энэ нь Бетел) үргэлжлэн өмнөд бэлээр нь гарч, доод Бет-хороны өмнө талд орших уулын дэргэдэх Атарот-Аддар уруу уруудсан байв.

¹⁴Эндээсээ уг хил Бет-хороны өмнө зүгт орших уулаар дамжин баруун талаар нь өмнө зүгт эргэн, Иудагийн хөвгүүдийн хот Кириат-баалд (энэ нь Кириат-иеарим) ирээд төгсөж байв. Энэ нь баруун тал нь байлаа.

¹⁵Өмнөд тал нь Кириат-иеаримын баруун захаас эхлэн Нефтоагийн ус булгийг хүртэл баруун тийш явсан байлаа.

¹⁶Тэгээд уг хил Рефаимын хөндийн хойно байдаг Бен-хинномын хөндийд орших уулын хормой хүртэл уруудаад, иебусчуудын бэлийн өмнөд талаар дамжин Хинномын хөндий болон Ен-рогел уруу үргэлжилж байв.

¹⁷Энэ нь хойд зүг уруу сунан, Ен-шемеш уруу явж, Адуммимын өгсүүрийн эсрэг орших Гелилот тийш үргэлжлэн, Реубений хүү Боханы хад уруу уруудсан байлаа.

¹⁸Тэгээд тэндээсээ Бет-Арабагийн хойд бэлээс үргэлжлэн, доошоо Араба уруу явсан байв.

¹⁹Уг хилийн шугам Бет-хоглагийн хойд бэлээр, Иорданы өмнөд адагт ирэн, Давст тэнгисийн хойд тохойд төгсөж байв. Энэ нь өмнөд хил нь байлаа.

²⁰Түүнээс гадна, Иордан гол зүүн хил болж байв. Эдгээр нь Бениамины хөвгүүдийн овгийн бүх ургийн дагуу хуваасан өвийн эргэн тойрны нийт нутгийн хил нь байлаа.

²¹Бениамины хөвгүүдийн овгийн ураг ургийн дагуу ногдсон хотууд нь: Иерихо, Бет-Хогла ба Емек-кезиз,

²²Бет-Араба, Земараим ба Бетел,

²³Аввим, Пара ба Офра,

²⁴Хефар-аммони, Офни ба Геба зэрэг арван хоёр хот, тосгодынхоо хамт,

²⁵Гибеон, Рама ба Беерот,

²⁶Мизпа, Хефира ба Моза,

²⁷Рекем, Ирпеел ба Тарала,

²⁸Зела, Хаелеф ба иебусчуудын хот (энэ нь Иерусалим), Гибеа ба Кириат зэрэг арван дөрвөн хот, тосгодынхоо хамт байв. Энэ нь Бениамины хөвгүүдийн ураг ургийн дагуу ногдсон хотууд буюу тэдний өв билээ.