Read Ariun Bible 2013 – Ариун Библи 2013 Иошуа 20 Bible Online

Иошуа 20 - Ariun Bible 2013 – Ариун Библи 2013 bible

Иошуа 20

¹Тэгтэл ЭЗЭН, Иошуатай ярьж —

²Израилийн хөвгүүдэд хэл. “Мосегоор дамжуулан Миний та нарт айлдсан хоргодох хотуудыг өөрсдөдөө сонго.

³Урьдаас сэдэж төлөвлөлгүй, санамсаргүйгээр хүн алсан аливаа хүн та нар дотор гарвал тийшээ зугтаг. Тэдгээр хотууд нь цусан өшөө авагчдаас та нарыг хамгаалах хоргодох газар тань болог.

⁴Эдгээр хотын аль нэг уруу зугтсан хүн хотын хаалганы үүдэнд зогсон, тэр хотын настангуудад өөрийн хэргийг ярих ба тэд түүнийг хотод оруулан, тэдний дунд амьдрах оромжийг өгөх ёстой.

⁵Хэрэв цусан өшөө авагч нэгэн нь түүнийг нэхэн хөөж ирвэл, алуурчныг тэд түүний гарт өгөх ёсгүй. Учир нь тэр хөршөө урьдаас сэдэж төлөвлөж алаагүй ба урьд нь ч түүнд өс хонзон санадаггүй байсан.

⁶Хотол түмний өмнө зогсон шүүгдэх цаг иртэл, тэр үеийн тэргүүн тахилчийг насан өөд болтол, тэр хүн уг хотод хоргодон амьдрах ёстой. Дараа нь хүн алсан уг хэрэгтэн өөрийн хот, өөрийн гэрт буюу зугтан гарсан хотдоо буцаж болно” гэж хэлэв.

⁷Тийнхүү тэд Нафталийн уулархаг нутгийн Галил дахь Кедеш, Ефраимын уулархаг нутаг дахь Шехем, Иудагийн уулархаг нутаг дахь Кириат-арба (энэ нь Хеброн юм) зэрэг хотуудыг сонгов.

⁸Мөн Иерихогийн зүүнтээ Иорданы цаана, тэд Реубен овгоос тал газрын цөл дэх Безер, Гад овгоос Гилеад дахь Рамот мөн Манассе овгоос Башан дахь Голан зэрэг хотуудыг сонгов.

⁹Санамсаргүйгээр хүн алсан аливаа хүн хотол түмнийхээ өмнө зогсох хүртэлээ цусан өшөө авагчийн гарт үхэхгүйн тулд тийшээ зугтах боломжтой болжээ. Эдгээр хот нь Израилийн бүх хөвгүүдэд мөн тэдний дунд суугч ирмэл хүмүүст зориулагдсан байв.